Jẹhọn he yin hinhẹnflu nọ hẹnnugble to nutogbẹ̀ he to aigba ji lẹ go. Dopo poun to kanweko ji gbẹtọ lẹ tọn wẹ to jẹhọn dagbe gbọ́n sọgbe hẹ nuhe Titobasinanu Aihọn Tọn Na Agbasalilo dọ.

Jẹhọn he yin hinhẹnflu ko zọ́n bọ mẹdelẹ ma nọ gbọ̀ ganji, bo ko sọ dekọtọn do kansẹẹ afuje tọn po ahun-zọ̀n po mẹ. Nudi gbẹtọ 7000000 wẹ nọ kú azán mape to whemẹwhemẹ na jẹhọn he yin hinhẹnflu wutu.

Planẹti mítọn do nugopipe lọ nado nọ wleawuna jẹhọn dagbe he sin hudo nutogbẹ̀ he to aigba ji lẹpo tindo. Ehe na yọnbasi kiki eyin gbẹtọ lẹ ma nọ hẹn lẹdo mẹ flu. Lẹnnupọndo apajlẹ delẹ ji.

• Mẹsusu wẹ yọnẹn dọ zungbo lẹ tindo nugopipe lọ nado nọ gbọ́n jẹhọn ylankan dioxyde de carbone. Amọ́, mẹsusu ma yọnẹn dọ atin delẹ he nọ yin mangroves bo nọ wú to tọ̀mẹ kavi gbàmẹ tlẹ gán sọ gbọ́n jẹhọn ylankan enẹ hugan zungbo lẹ. Adà daho taun wẹ mangrove lẹ nọ yiwà, na yé nọ gbọ́n dioxyde de carbone he zungbo lẹ nọ gbọ́n donu atọ́n.

• Dodinnanu agọe tọn delẹ dohia dọ, amà tọ̀mẹ tọn delẹ (varech) nọ gbọ́n dioxyde de carbone sọn jẹhọn mẹ. Amà wunmẹ ehelẹ nọ do tonù de he mẹ jẹhọn nọ gọ́, ehe nọ zọ́n bọ yé gán nọ otọ̀ nukunmẹ kaka yì fidindẹn lẹ. Eyin amà ehelẹ wá dẹn do agé, nudi apò lọ lẹ nọ là bọ amà he mẹ dioxyde de carbone gọ́ lọ lẹ nọ yì ohù-sabọ́. Enẹgodo, yé nọ gbọṣi finẹ na owhe kanweko susu.

• Nugopipe jẹhọn tọn nado nọ vọ́ ede jlado to whenue e ko yin hinhẹnflu godo họnwun hezeheze to azọ̀n COVID-19 tọn whenu he mẹ mẹlẹ nọ họ̀nsudo te. To 2020, whenue azọ́nwhé po mọto lẹ po masọ nọ hẹn jẹhọn flu sọmọ, bleun dopo wẹ jẹhọn dagbe gọjẹ tintin ji. Linlin de dohia dọ hugan 80 to 100 ji otò he mẹ yè basi dodinnanu gbọn lẹ tọn wẹ dọ dọ jẹhọn dagbe tin ojlẹ kleun de to whenue mẹlẹ nọ họ̀nsudo godo. (2020 World Air Quality Report)

Aṣẹpatọ lẹ gbẹ́ to ayinamẹ na azọ́nwhé lẹ nado de jẹhọn hinhẹnflu pò. Podọ weyọnẹntọ lẹ gbẹ́ to aliho yọyọ lẹ mọ nado vọ́ nuhe jẹhọn he yin hinhẹnflu nọ hẹngble lẹ jlado. Di apajlẹ, yé nọ zan wanvú delẹ nado hù aṣẹ na nuhe nọ hẹnnu flu lẹ. Weyọnẹntọ lẹ sọ to tulina mẹlẹ nado nọ zọ̀n afọ kavi kùn kẹkẹ afọ tọn kakati nado nọ kùn mọto po zokẹkẹ po bosọ de nuhe nọ de azọ̀ tọ́n lẹ zinzan pò to owhé yetọn lẹ gbè.

Amọ́, vivẹnudido enẹ ma ko pé, dile linlin 2022 tọn de he ogbẹ́ aihọn tọn lẹ na dohia do, ehe bẹ Titobasinanu Aihọn Tọn Na Agbasalilo po Akuẹsẹdotẹn Aihọn Tọn po hẹn.

Linlin lọ dohia dọ to 2020, nudi mado-atọ̀n gbẹtọvi lẹ tọn wẹ nọ zan nuhe nọ hẹn jẹhọn flu lẹ do danú. To lẹdo susu mẹ, omẹ vude poun wẹ gán zan aliho nudida tọn kavi adò he na zọ́n bọ yè ma na hẹn jẹhọn flu.

“Nuhe Jiwheyẹwhe nugbo lọ, yèdọ Jehovah dọ die, yèdọ Didatọ olọn tọn podọ . . . Mẹlọ he dlẹn aigba jẹgbonu po sinsẹ́n etọn lẹ po, Mẹlọ he nọ na gbọfufu mẹhe tin to e ji lẹ.”—Isaia 42:5.

Jiwheyẹwhe wẹ yin dowatọ jẹhọn he mí nọ gbọ́n do homẹ po tito jọwamọ tọn he nọ hẹn ẹn do wiweji po tọn, podọ huhlọn etọn ma do dogbó bọ e sọ yiwanna gbẹtọvi lẹ taun. Enẹwutu, be e sọgbe nado lẹndọ ewọ na blá alọ dogo gando jẹhọn he to yinyin hinhẹnflu go ya? Pọ́n hosọ lọ “Jiwheyẹwhe Dopà Dọ Aigba Ma Na Yin Vivasudo.”