Asu po asi po he nọ do sisi hia yedelẹ nọ do owanyi hia ode awetọ, etlẹ yin to gbemanọpọ lẹ whenu. Owe de dọmọ: “Yé ma nọ dike nuhahun lẹ ni klan yé. Kakatimọ, yé nọ dọhodopọ gando nuhahun lẹ go. Yé nọ dotoaina linlẹn yedelẹ tọn po sisi po bo nọ dín pọngbọ he yọ́n na yé omẹ awe lẹ.”​—Ten Lessons to Transform Your Marriage.

AYINAMẸ BIBLU TỌN: “Owanyi . . . ma nọ dín ale edetiti tọn lẹ.”​—1 Kọlintinu lẹ 13:4, 5.

“Nado do owanyi hia asi ṣie zẹẹmẹdo dọ n’dona nọ wlebòna ẹn bo ma na nọ wà nudepope he na vẹna ẹn kavi gbà alọwle mítọn.”​—Sunnu de he nọ yin Micah.

Eyin alọwlemẹ lẹ ma tindo sisi na yede, hodọdopọ yetọn gán nọ lẹzun homọdọdomẹgo, mẹṣanko, podọ etlẹ yin wangbẹna—yèdọ awugbopo delẹ he dodinnanutọ lẹ dohia dọ yé nọ wá hẹn gbẹdai wá.

“Ohó kavi aslan mẹdèpo tọn lẹ, gọna hogbe gbigble lẹ yiyizan gando asi towe go na nọ dowinyan ẹn bo na gbà alọwle mìtọn.”​—Sunnu de he nọ yin Brian.

KANSE DEWE

Na ayidonugo hodọdopọ po nuyiwa mìtọn po na osẹ dopo. Enẹgodo, kanse dọ:

• ‘Be n’nọ yawu mọhodọdo awetọ ṣie go wẹ kavi n’nọ yawu pà ẹ?’

• ‘Aliho tẹlẹ mẹ wẹ n’nọ do sisi hia awetọ ṣie te?’

DỌHODOPỌ HẸ AWETỌ TOWE

• Nuyiwa po hogbe tẹlẹ po wẹ na nọ do sisi hia ode awetọ?

• Nuyiwa po hogbe tẹlẹ po wẹ na nọ do sisi matindo hia ode awetọ?

AYINAMẸ DELẸ

• Lẹnnupọndo aliho atọ̀n delẹ ji he mẹ a na jlo dọ yè ni do sisi hia we te. Dọna awetọ towe nado wà nudopolọ. Enẹgodo, dọna awetọ towe nado nọ do sisi hia we to aliho enẹlẹ mẹ.

• Lẹnnupọndo jijọ delẹ he a yiwanna to awetọ towe mẹ ji. Enẹgodo, dọ lehe a yiwanna jijọ enẹlẹ sọ na ẹn.

“Nado do sisi hia asu ṣie zẹẹmẹdo dọ nuyiwa ṣie lẹ na nọ dohia dọ n’nọ wlebòna ẹn bo jlo dọ ni do ayajẹ. E ma nọ biọ onú daho de dandan; onú flinflin delẹ wiwà whẹwhẹ gán dohia dọ a do sisi nujọnu tọn na ẹn.”—Yọnnu de he nọ yin Megan.

To popolẹpo mẹ, e ma yin hiẹ lọsu wẹ na mọdọ emi nọ do sisi hia awetọ towe kavi lala gba; awetọ towe wẹ na yọnẹn eyin a nọ wàmọ.

AYINAMẸ BIBLU TỌN: “Mì yí owanyi sisosiso awuvẹmẹ tọn, homẹdagbe, whiwhẹ, walọmimiọn po homẹfa po dogo.”​—Kolosinu lẹ 3:12.