Goyiyi gán zọ́n bọ mí na nọ do nuvẹun. Goyitọ nọ mọ ede mẹ bo nọ lẹndọ emi pọnte hú mẹdevo lẹ. E nọ lẹndọ mẹdepope he gbọnvo na emi ma vó nú kaka de. Owù lọ wẹ yindọ mẹdepope go wẹ enẹ gán jọ do. Otànwe he nọ yin Encyclopædia Britannica dọ dọ: “Diblayin akọ̀ lẹpo wẹ nọ lẹndọ aṣa emitọn, núdùdù emitọn, nusisọ́ emitọn, walọ emitọn, sinsẹ̀n emitọn, jijọ emitọn po nudevo devo lẹ po yọ́n hú akọ̀ he pò lẹ tọn.” Etẹwẹ mí gán wà ma nado nọ lẹnnupọn domọ?

“Mì nọ gbọn whiwhẹ dali pọ́n mẹdevo lẹ dọ yé yiaga hú mì.”—FILIPINU LẸ 2:3.

Etẹwẹ wefọ lọ to pinplọn mí? Nado hùaṣẹ na goyiyi, mí dona plọn nado nọ whiwhẹ míde. Whiwhẹ nọ zọ́n bọ mí nọ yọnẹn dọ mẹlẹ pọnte hú mí to nudelẹ mẹ. Akọ̀ de ma tin bo yọ́n to nulẹpo mẹ.

Pọ́n apajlẹ Stefan tọn. E whẹ́n to otò Communiste tọn de mẹ, amọ́ e wá jo nuvẹun do bo jẹ nudagbe lẹn gando otò he ma yin Communiste tọn lẹ go ji. E dọmọ: “N’yọnẹn dọ  nado jo nuvẹun do, yè dona nọ mọdọ mẹdevo lẹ pọnte hú mí. N’ma yọ́n nulẹpo nẹ. Podọ mẹdepope dè wẹ n’gán plọnnu sọn.”

Dogán ma nado nọ mọ dewe mẹ, bo yọnẹn dọ emi nọ jẹdò to fidelẹ. Nọ flindọ nue nọ glo we lẹ nọ pà mẹdevo lẹ. Ma nọ lẹndọ mẹe to akọ̀ kavi pipli de mẹ lẹpo wẹ to alọ dopolọ ji blo.

Kakati nado nọ lẹnnu agọ̀ gando mẹhe to akọ̀ kavi pipli de mẹ lẹ go, nọ kanse dewe dọ:

• ‘Be nue n’ma yiwanna to mẹlọ lẹ go ylan nugbonugbo wẹ ya, kavi jijọ mítọn lẹ gbọnvo poun wẹ?’

• ‘Be yelọsu ma gán mọ nue yé ma yiwanna de to go e ya?’

• ‘Be nudelẹ ma tin he nọ glo mi bo ka nọ pà yé ya?’

Kanbiọ ehelẹ gán gọalọna we nado dọ nugbo na dewe. Enẹ na zọ́n bọ a na jo nuvẹun do bọ nú mẹlẹ tọn na nọ jẹ towe ji.