TO OJLẸ he mẹ Biblu yin kinkàn te, asigbàn nọ yin nina whẹndo asiyọyọ lọ tọn to whenue whẹndo awe kọngbedopọ dọ ovi yetọn lẹ gán wlealọ. Asigbàn sọgan ko nọ bẹ onú akuẹgegenu tọn lẹ, kanlin kavi akuẹ hẹn. To whedelẹnu, e nọ yin súsú gbọn azọ́n de wiwà dali, dile e yin do to whẹho Jakọbu tọn mẹ, mẹhe yigbe nado wazọ́n na otọ́ Laheli tọn na owhe ṣinawe nado sọgan wlealọ hẹ viyọnnu etọn. (Jen. 29:17, 18, 20) Etẹwẹ yin yanwle aṣa ehe tọn?

Weyọnẹntọ Biblu tọn de he nọ yin Carol Meyers dọmọ: “Asigbàn sọgan súdo azọ́n he viyọnnu de nọ wà tọn to whẹndo asiyọyọ lọ tọn mẹ, ehe yin nujọnu taun to whẹndo he mẹ yè nọ wà glezọ́n te lẹ.” Asigbàn gán sọ zọ́n bọ haṣinṣan he to ṣẹnṣẹn na whẹndo he alọwle kọndopọ lọ lẹ na lodo dogọ. Haṣinṣan whẹndo tọn enẹlẹ sọgan yin aliho de nado mọ alọgọ to ojlẹ awusinyẹn tọn lẹ mẹ. Humọ, asigbàn nọ dohia dọ yọnnu de ko dopà alọwle tọn, podọ dọ ewọ na tlọ́n nukunpedomẹgo otọ́ etọn tọn glọ wá asu etọn tọn glọ.

Asigbàn nina ma zẹẹmẹdo dọ yọnnu lọ ko lẹzun nutindo de, he sọgan yin hihọ̀ kavi yin sisà. Owe de dọmọ: “Na taun tọn, alọwle Islaelivi lẹ tọn nọ taidi ajọwiwa, na dandan wẹ dọ yè ni na whẹndo yọnnu lọ tọn akuẹ sọha de kavi nuhe sọzẹn hẹ ẹ de. Amọ́, e taidi dọ [asigbàn] nọ yin pinpọnhlan di ahọsumẹ de na whẹndo yọnnu lọ tọn bọ e ma yin akuẹ he yin súsú nado họ̀ yọnnu lọ.”—Ancient Israel-Its Life and Institutions.

To otò delẹ mẹ to egbehe, mẹlẹ gbẹ́ nọ hodo aṣa asigbàn nina tọn. Whenue mẹjitọ Klistiani lẹ biọ asigbàn, yé nọ dike na ‘lẹnpọn dagbenọ-yinyin yetọn ni yin yinyọnẹn na mẹlẹpo,’ bo ma nọ biọ zẹ̀ nuhe sọgbe hẹ lẹnpọn dagbe go. (Flp. 4:5; 1 Kọl. 10:32, 33) Gbọnmọ dali, yé nọ dohia dọ yé ma yin “wanyina akuẹtọ,” kavi nukunkẹnnọ. (2 Tim. 3:2) Humọ, eyin mẹjitọ Klistiani lẹ nọ biọ asigbàn he to jlẹkaji de, asu sọgodo tọn lọ ma na to dandannu glọ nado to alọwle lọ sisẹ́ do nukọn kakajẹ whenue e na mọ akuẹ he pé nado sú asigbàn lọ. Kavi asu sọgodo tọn lọ ma na mọdọ emi na gbọ bo jo sinsẹ̀nzọn gbehosọnalitọ tọn emitọn do, na e dona wazọ́n na whenu-gigọ́ nado mọ akuẹ he e biọ nado na asigbàn he yì nukunkẹ de wutu.

To awà aihọn lọ tọn delẹ ji, osẹ́n lẹ tin gando asigbàn nina go. To fie e to mọ te lẹ, mẹjitọ Klistiani lẹ nọ setonuna osẹ́n enẹlẹ. Etẹwutu? Ohó Jiwheyẹwhe tọn biọ dọ Klistiani lẹ ni yin “mẹmẹglọ na aṣẹpipa daho lẹ,” bosọ nọ setonuna osẹ́n he ma jẹagọdo osẹ́n Jiwheyẹwhe tọn lẹ.—Lom. 13:1; Owalọ 5:29.