HOSỌ OPLỌN TỌN 6
OHÀN 18 Mí Yọ́n Pinpẹn Ofligọ lọ Tọn
Jonamẹ Jehovah Tọn—Nuhewutu Mí Yọ́n Pinpẹn Etọn
“Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn.”—JOH. 3:16.
NUHE E BẸHẸN
To hosọ ehe mẹ, mí na mọnukunnujẹ dodonu he ji Jehovah jona mí te mẹ, ehe na zọ́n bọ mí na hẹn pinpẹn nutọn mítọn na jonamẹ etọn siso dogọ.
1, 2. Nawẹ ninọmẹ gbẹtọvi lẹ tọn taidi jọja sunnu he yin nùdego to hukan tintan mẹ lọ tọn gbọn?
YÍ NUKUN homẹ tọn do pọ́n jọja sunnu de he whẹ́n to whẹndo adọkunnọ de mẹ. To gbèdopo, nujijọ ylankan de jọ; mẹjitọ etọn lẹ kú to asidan de mẹ. Owẹ̀n lọ hẹn ẹn jẹflumẹ taun. Amọ́, owẹ̀n devo he hẹnmẹ jọsi sọ to tepọn jọja sunnu ehe. E sè dọ mẹjitọ etọn lẹ ko hẹn adọkun whẹndo lọ tọn gú bosọ duahọ dahodaho lẹ dai. Todin, yí nukun homẹ tọn do pọ́n dọ kakati ni dugu adọkun yetọn tọn, ahọ́-gú wẹ e dù, bọ ahọ́tọnọ lẹ to jijlo dọ yè ni suahọ emi to afọdopolọji. E ma ka gán penugo bo suahọ lọ lẹpo pọ́n gbede.
2 To linlẹn de mẹ, ninọmẹ mítọn taidi jọja sunnu ehe tọn. Mẹpipe lẹ wẹ mẹjitọ mítọn tintan lẹ Adam po Evi po yin bo nọ nọ̀ paladisi whanpẹnọ de mẹ. (Jen. 1:27; 2:7-9) Yé do todido lọ nado duvivi gbẹzan ayajẹnọ de tọn kakadoi. Amọ́, nulẹpo wá diọ. Yé hẹn owhé yetọn he yin Paladisi lọ po todido lọ nado nọgbẹ̀ kakadoi po bu. Ogú tẹwẹ yé gán jodo na ovi he yé na wá ji lẹ? Biblu dọna mí dọmọ: “Ylando gbọn mẹdopo [Adam] gblamẹ biọ aihọn mẹ podọ okú gbọn ylando gblamẹ wá, gbọnmọ dali okú dlẹnkan jẹ mẹlẹpo dè, na yemẹpo wẹ ko waylando wutu.” (Lom. 5:12) Ogú he Adam jodo na mí wẹ ylando, ehe zọ́n bọ mí nọ kú. Ylando he mí dugu etọn ehe taidi ahọ́ daho de, ehe depope mítọn ma gán sú.—Salm. 49:8.
3. Naegbọn mí gán yí ylando mítọn lẹ jlẹdo “ahọ́” go?
3 Jesu yí ylando jlẹdo “ahọ́” go. (Mat. 6:12; Luku 11:4) Whenue mí waylando, e taidi dọ mí duahọ de do Jehovah wẹ nkọ. Mí dona suahọ ylando he mí wà tọn. Eyin ahọ́ ehe ma yin súsú, be kiki whenue mí kú wẹ e na yin hùzẹdeji.—Lom. 6:7, 23.
4. (a) Matin alọgọ, etẹwẹ na jọ do ylandonọ lẹpo go? (Salmu lẹ 49:7-9) (b) Etẹwẹ hogbe lọ “ylando” nọ dlẹnalọdo to Biblu mẹ? (Pọ́n apotin lọ “ Ylando.”)
4 Be e yọnbasi dọ mí ni vọ́ nuhe Adam po Evi po hẹnbu lẹpo mọyi ya? Eyin mítọn kẹdẹ wẹ, e ma gán pà mí. (Hia Salmu lẹ 49:7-9.) Matin alọgọ, mí ma na do todido nado nọgbẹ̀ to sọgodo kavi yin finfọnsọnku. Na nugbo tọn, taidi kanlin lẹ, mí na nọ kú poun matin todido.—Yẹwh. 3:19; 2 Pita 2:12.
5. Nawẹ Otọ́ owanyinọ mítọn gọalọna mí nado suahọ ylando he mí dugu etọn lọ tọn gbọn? (Sọ pọ́n yẹdide.)
5 Eyin mí vọ́ nulẹnpọn do jọja sunnu he yin nùdego wayi lọ ji, nawẹ e na ṣí na ẹn eyin dawe adọkunnọ de desọn ojlo mẹ bo suahọ etọn lẹpo? Matin ayihaawe, pinpẹn nutọn sisosiso na whàn ẹn nado kẹalọyi nunina alọtútlú tọn enẹ. Mọdopolọ, Otọ́ owanyinọ mítọn Jehovah ko na mí nunina de nado suahọ ylando he mí dugu etọn sọn Adam dè lọ tọn. Jesu basi zẹẹmẹ etọn dole: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Joh. 3:16) Humọ, nunina ehe dopolọ hùn dotẹnmẹ dote na mí nado tindo haṣinṣan dagbe de hẹ Jehovah whladopo dogọ.
Jesu lá wẹndagbe gando jonamẹ Jehovah tọn he sinai do avọ́sinsan ofligọ lọ tọn ji go. (Joh. 3:16) Enẹgodo, e ze ogbẹ̀ edetiti tọn jo sọn ojlo mẹ wá nado hẹn ofligọ enẹ yọnbasi (Pọ́n hukan 5tọ)
6. Hogbe Biblu tọn tẹlẹ wẹ mí na gbadopọnna to hosọ ehe mẹ, podọ etẹwutu?
6 Nawẹ mí gán mọaleyi sọn nunina jiawu ehe mẹ, na ylando kavi “ahọ́” mítọn lẹ nido yin jijona mí gbọn? Gblọndo kanbiọ enẹ tọn tin to hogbe he Biblu nọ yizan delẹ mẹ taidi, whẹgbigbọ, ovẹsè, avọ́nunina oyẹsu tọn, ofligọ, mẹfligọ po yinyin lilá di dodonọ po. To hosọ ehe mẹ, mí na dọhodo zẹẹmẹ hogbe ehelẹ dopodopo tọn ji. Dile mí to ayihamẹlẹnpọn do zẹẹmẹ ehelẹ ji, pinpẹn nutọn mítọn na dodonu he ji Jehovah nọ jona mí te na jideji.
YANWLE LỌ: WHẸGBIGBỌ
7. (a) Onú devo tẹlẹ wẹ Adam po Evi po hẹnbu? (b) Taidi ovivi Adam po Evi po tọn lẹ, etẹ sin hudo wẹ mí do vẹkuvẹku? (Lomunu lẹ 5:10, 11)
7 Gbọnvona dọ Adam po Evi po hẹn todido ogbẹ̀ madopodo tọn bu, yé sọ hẹn haṣinṣan họakuẹ yetọn hẹ Otọ́ yetọn Jehovah gble ga. To tintan whenu, Adam po Evi po yin apadewhe whẹndo Jiwheyẹwhe tọn. (Luku 3:38) Amọ́ whenue yé vẹtolina Jehovah, yé yin yinyan sọn whẹndo etọn mẹ whẹpo do bẹ vijiji. (Jen. 3:23, 24; 4:1) Taidi ovivi yetọn lẹ, mí dona gbọwhẹ hẹ Jehovah. (Hia Lomunu lẹ 5:10, 11.) To hogbe devo mẹ, mí dona wleawuna haṣinṣan dagbe de hẹ ewọ. Sọgbe hẹ owe dodinnanu tọn de, hogbe Glẹkigbe tọn he yin yiyizan tofi na “gbọwhẹ” gán zẹẹmẹdo nado “hẹn kẹntọ de zun họntọn.” E jiawu dọ Jehovah lọsu wẹ ze afọdide tintan nado hẹn ehe yọnbasi. Gbọnna?
TITO LỌ: OVẸSÈ
8. Etẹwẹ yin (a) ovẹsè? (b) avọ́nunina oyẹsu tọn?
8 Ovẹsè yin tito de he Jehovah zedai nado hẹn haṣinṣan dagbe yọnbasi whladopo dogọ to ewọ po gbẹtọvi ylandonọ lẹ po ṣẹnṣẹn. Tito ehe bẹ nude yíyí do diọ nudevo he sọzẹn hẹ ẹ hẹn. Gbọnmọ dali, nuhe yin hinhẹnbu kavi yin hinhẹngble de gán vọ́ yin mimọ kavi yin didiọ. Owe-wiwe Glẹki tọn yí hogbe mọnkọ he tindo zẹẹmẹ dopolọ hẹ “ovẹsè” zan, enẹ wẹ “avọ́nunina oyẹsu tọn.” (Lom. 3:25) Ovẹsè yin nuyiwa de he nọ zọ́n bọ mẹde nọ nọ̀ jijọho mẹ hẹ Jiwheyẹwhe bosọ nọ tindo haṣinṣan dagbe de hẹ ewọ.
9. Tito ojlẹ gli tọn tẹwẹ Jehovah zedai na ylando Islaelivi lẹ tọn nido sọgan yin jijona?
9 Na Islaelivi lẹ nido duvivi haṣinṣan dagbe de tọn hẹ Jehovah, ewọ ze tito ojlẹ gli tọn de dai na jona ylando yetọn lẹ tọn. To Islaeli, Azán Ovẹsè Tọn nọ wá aimẹ whladopo to owhe dopo mẹ. To azán enẹ gbè, yẹwhenọ daho lọ nọ yí kanlin lẹ do basi avọ́sinsan do akọta lọ tamẹ. Na nugbo tọn, avọ́sinsan kanlin tọn lẹ ma gán ṣinyọnnudo ylando Islaelivi lẹ tọn, na kanlin ma gán yin yiyijlẹdo gbẹtọvi go wutu. Amọ́, dile e dẹnsọ bọ Islaelivi he lẹnvọjọ lẹ nọ basi avọ́sinsan he Jehovah biọ lẹ, ewọ to gbesisọ mẹ nado jo ylando yetọn lẹ na yé. (Heb. 10:1-4) Humọ, tito enẹ po avọ́sinsan he yé nọ basi whẹwhẹ na ylando yetọn lẹ po nọ vọ́ nuflin Islaelivi lẹ gando ninọmẹ ylandonọ-yinyin tọn yetọn gọna pọngbọ tẹgbẹ tọn he yé do hudo etọn go.
10. Tito tẹgbẹ tọn tẹwẹ Jehovah basi nado jo ylando lẹ namẹ?
10 Jehovah do tito tẹgbẹ tọn de to ayiha mẹ nado jo ylando lẹ namẹ. E basi tito na Visunnu yiwanna etọn nido “yí ede do sanvọ́ whladopo podọ kakadoi . . . nado hẹn ylando mẹsusu tọn.” (Heb. 9:28) Jesu ze “ogbẹ̀ etọn jo taidi ofligọ de do ota mẹsusu tọn mẹ.” (Mat. 20:28) Etẹwẹ ofligọ de yin?
AHỌ́ LỌ: OFLIGỌ LỌ
11. (a) Sọgbe hẹ Biblu, etẹwẹ ofligọ de yin? (b) Etẹwẹ e na biọ na ofligọ ehe nido yin súsú?
11 Sọgbe hẹ Biblu, ofligọ de yin ahọ́ he yin súsú nado hẹn ovẹsè po whẹgbigbọ po yọnbasi. a To pọndohlan Jehovah tọn mẹ, e nọ wleawuna dodonu de nado gọ̀ nuhe bu de mọ. To aliho tẹ mẹ? Flindọ Adam po Evi po hẹn ogbẹ̀ pipé gọna todido lọ nado nọgbẹ̀ kakadoi bu. Enẹwutu, ofligọ lọ dona yin ahọ́ de he sọzẹn pẹẹ hẹ nuhe yin hinhẹnbu lọ. (1 Tim. 2:6) E gán yin súsú kiki gbọn dawe de he (1) yin mẹpipe; (2) tindo nugopipe lọ nado nọgbẹ̀ kakadoi to aigba ji; podọ (3) wleawufo nado ze ogbẹ̀ etọn jo kavi yí i do sanvọ́ do ota mítọn mẹ dali. Gbọnmọ dali kẹdẹ wẹ ogbẹ̀ dawe enẹ tọn gán diọtẹnna kavi suahọ ogbẹ̀ he yin hinhẹnbu lọ tọn.
12. Naegbọn Jesu penugo bo sú ofligọ-kuẹ he dona yin súsú lọ?
12 Lẹnnupọndo whẹwhinwhẹ́n atọ̀n he wutu Jesu penugo bo suahọ ofligọ lọ tọn ji. (1) E yin mẹpipe—“e ma waylando depope.” (1 Pita 2:22) (2) Enẹwutu, e tindo nugopipe lọ nado nọgbẹ̀ kakadoi to aigba ji. (3) E wleawufo nado kú podọ nado ze ogbẹ̀ etọn jo do ota mítọn mẹ. (Heb. 10:9, 10) Taidi dawe pipé de, Jesu sọzẹn hẹ Adam, enẹ wẹ dawe tintan lọ jẹnukọnna ylando etọn. (1 Kọl. 15:45) Enẹwutu gbọn okú Jesu tọn gblamẹ, e penugo bo basi ovẹsè na ylando Adam tọn, enẹ wẹ nado gọ̀ nuhe Adam ko hẹnbu lọ do otẹn etọn mẹ. (Lom. 5:19) Gbọnmọ dali, Jesu lẹzun “Adam godo tọn.” E masọ biọ dọ mẹpipe devo ni wá suahọ nuhe Adam hẹnbu lọ tọn ba. Jesu kú “whladopo podọ kakadoi.”—Heb. 7:27; 10:12.
13. Vogbingbọn tẹwẹ tin to tito ovẹsè tọn po ofligọ lọ po ṣẹnṣẹn?
13 Eyin mọ wẹ, vogbingbọn tẹwẹ to tito ovẹsè tọn po ofligọ lọ po ṣẹnṣẹn? Tito ovẹsè tọn yin nuhe Jiwheyẹwhe wà nado gọ̀ haṣinṣan dagbe he to ewọ po gbẹtọvi lẹ po ṣẹnṣẹn do otẹn etọn mẹ. Ofligọ yin ahọ́ de he yin súsú nado hẹn ovẹsè yọnbasi na ylando gbẹtọvi lẹ tọn. Ohùn họakuẹ Jesu tọn he e sọndai do ota mítọn mẹ wẹ nọtena ahọ́ he yin súsú ehe.—Efe. 1:7; Heb. 9:14.
KỌDETỌN LỌ LẸ: MẸFLIGỌ PO YINYIN LILÁ DI DODONỌ PO
14. Etẹwẹ mí na gbadopọnna todin, podọ etẹwutu?
14 Etẹwẹ yin kọdetọn tito ovẹsè tọn lọ tọn lẹ? Biblu yí hogbe susu lẹ zan nado zinnudo ale lọ lẹ ji. Dile etlẹ yindọ zẹẹmẹ hogbe ehelẹ tọn lẹ di yede, hogbe lọ lẹ dopodopo zinnudo adà tito ovẹsè tọn lọ tọn de ji he hùn dotẹnmẹ dote na jonamẹ Jehovah tọn. Dile mí na to dogbapọnna hogbe ehelẹ, mí nasọ mọ lehe yé gando mí go do tlọlọ.
15, 16. (a) To Biblu mẹ, etẹwẹ hogbe lọ “mẹfligọ” nọ dlẹnalọdo? (b) Nawẹ ehe gando mí go gbọn?
15 To Biblu mẹ, mẹfligọ nọ dlẹnalọdo tundote kavi jonamẹ he ofligọ lọ súsú nọ hẹnwa. Apọsteli Pita dọ ẹ to aliho ehe mẹ: “Mì yọnẹn dọ e ma yin nuhe sọgan gble lẹ, di fataka kavi sika, wẹ yè yí do tún mì dote [to paa mẹ, “do fli mì gọ̀”] sọn aliho gbẹninọ tọn ovọ́ he mì dugu etọn sọn tọgbo mìtọn lẹ dè mẹ gba. Ṣigba po ohùn họakuẹ de po wẹ, taidi lẹngbọvu madoblọ podọ madodiho de tọn, yèdọ Klisti tọn.”—1 Pita 1:18, 19; Odò.
16 Avọ́sinsan ofligọ lọ tọn zọ́n bọ mí gán yin tuntundote sọn nuyiwadomẹji ylankan ylando po okú po tọn si. (Lom. 5:21) Matin ayihaawe, mí do whẹwhinwhẹ́n dagbe nado mọdọ mí duahọ daho do Jehovah po Jesu po, na mẹfligọ lọ he yin bibasi po ohùn họakuẹ kavi ogbẹ̀ Jesu tọn po.—1 Kọl. 15:22.
17, 18. (a) Etẹwẹ e zẹẹmẹdo nado yin lilá di dodonọ? (b) Nawẹ ehe gando mí go gbọn?
17 Nado yin lilá di dodonọ zẹẹmẹdo dọ owhẹ̀ he mí hù lẹ ko yin jijona mí bọ nuṣiwa mítọn lẹ ko sọ yin hùzẹdeji kavi yin súnsúnsún sẹ̀. Gbọnmọ dali, Jehovah ma tùnafọ nujinọtedo dodo tọn he ewọ lọsu zedai lẹ ji. E ma lá mí di dodonọ na mí jẹna wutu gba; mọ e ma yialọ na ylando mítọn lẹ. Amọ́ na yise mítọn to tito ovẹsè tọn po ofligọ-kuẹ he yin súsú lọ po mẹ wutu, Jehovah tindo dodonu de nado zẹhudo ahọ́ mítọn lẹ ji.—Lom. 3:24; Gal. 2:16.
18 Etẹwẹ ehe zẹẹmẹdo na dopodopo mítọn? Mẹhe ko yin dide nado dugán hẹ Jesu to olọn mẹ lẹ ko yin lilá di dodonọ taidi ovi Jiwheyẹwhe tọn lẹ. (Titu 3:7; 1 Joh. 3:1) Ylando yetọn lẹ ko yin jijona yé. To linlẹn de mẹ, yé masọ do owhẹ̀ depope to okọ̀ ba, podọ yé gbọnmọ dali pegan nado nọ Ahọluduta lọ mẹ. (Lom. 8:1, 2, 30) Mẹhe do todido aigba ji tọn lẹ ko yin lilá di dodonọ taidi họntọn Jiwheyẹwhe tọn lẹ, podọ ylando yetọn lẹ ko yin jijona yé. (Jak. 2:21-23) Gbẹtọ susugege he na lùn Amagẹdọni tọ́n lọ do todido ma nado kú gbede. (Joh. 11:26) “Dodonọ” po “mawadodonọ” he to amlọndọ to okú mẹ lẹ po na yin finfọnsọnku. (Owalọ 24:15; Joh. 5:28, 29) To godo mẹ, devizọnwatọ Jehovah tọn he to aigba ji lẹpo na “tindo mẹdekannujẹ gigonọ he yin ovi Jiwheyẹwhe tọn lẹ tọn.” (Lom. 8:21) Dona jiawu nankọ die tito ovẹsè tọn hẹn ẹn yọnbasi, enẹ wẹ whẹgbigbọ mlẹnmlẹn hẹ Otọ́ olọn mẹ tọn mítọn Jehovah!
19. Nawẹ ninọmẹ mítọn diọ to aliho dagbe mẹ gbọn? (Sọ pọ́n apotin lọ “ Nuhe E Zẹẹmẹdo Na Mí.”)
19 Na nugbo tọn, to ojlẹ de mẹ wayi ninọmẹ mítọn taidi jọja sunnu he yin nùdego to bẹjẹeji lọ tọn, yèdọ mẹhe hẹn onú lẹpo bu bosọ dugu ahọ́ daho he e ma gán sú gbede de tọn. Amọ́ Jehovah gọalọna mí. Ninọmẹ mítọn diọ na tito ovẹsè tọn po ofligọ lọ he yin súsú po wutu. Yise mítọn to Jesu Klisti mẹ na mí dotẹnmẹ nado yin fifligọ kavi yin tuntundote sọn ylando po okú po si. Ylando mítọn lẹ gán sọ yin hùzẹdeji bọ sẹ́nhẹngba mítọn lẹ gán yin súnsúnsún sẹ̀. Amọ́ hú popolẹpo, mí gán tindo haṣinṣan dagbe de hẹ Otọ́ owanyinọ olọn mẹ tọn mítọn Jehovah todin.
20. Etẹ ji wẹ mí na dọhodo to hosọ he bọdego mẹ?
20 Dile mí to ayihamẹlẹnpọn do nuhe Jehovah po Jesu po wà na mí lẹ ji, ahun mítọn nọ gọ́ na pinpẹn-nutọn-yinyọnẹn. (2 Kọl. 5:15) Eyin yetọn dẹ́n, mí ma na tindo todido paali! Amọ́, etẹwẹ jonamẹ Jehovah tọn zẹẹmẹdo na dopodopo mítọn taun? Mí na dọhodo enẹ ji to hosọ he bọdego mẹ.
OHÀN 10 Mì Pà Jehovah, Jiwheyẹwhe Mítọn!
a To ogbè delẹ mẹ, zẹẹmẹ tlọlọ hogbe lọ “ofligọ” tọn wẹ “ogbẹ̀-kuẹ” kavi “ahọ́ he yin súsú.”
