Plọn Ovi Towe Lẹ

Ylọnẹn-Ylọvi Paulu Tọn—E Whlẹn Ylọnẹn Etọn

BE A yọnẹn dọ hẹnnumẹ apọsteli Paulu tọn delẹ yin hodotọ Jesu tọn ya? a— Biblu dohia dọ nọviyọnnu Paulu tọn po visunnu nọviyọnnu lọ tọn po yin Klistiani. Podọ ylọnẹn-ylọvi Paulu tọn enẹ whlẹn ẹn! Mí ma yọ́n yinkọ etọn kavi yinkọ onọ̀ etọn tọn, ṣigba mí yọ́n nuhe e wà. Be a jlo na yọ́n nulọ ya?—

Paulu ṣẹṣẹ gọ̀ sọn gbejizọnlin mẹdehlan tọn etọn atọ̀ntọ bo tin to Jelusalẹm. Owhe 56 W.M. mẹ wẹ. Paulu ko yin wiwle bo dona yì owhẹ̀ nukọn. Ṣigba kẹntọ Paulu tọn lẹ ma jlo dọ owhẹ̀ etọn ni yin didọ. Yé jlo dọ e ni yin hùhù! Enẹwutu yé basi tito na omẹ 40 nido họ̀n whlá do fide to aliji bo hù Paulu.

Mí ma yọ́n lehe ylọnẹn-ylọvi Paulu tọn wagbọn bo sè nuhe yé jlo na wà lọ. Be a yọ́n nuhe e wà ya?— E yì Paulu dè bo dọna ẹn. To afọdopolọji, Paulu dọna awhàngán de dọmọ: “Hẹn dawe he yì awhàngán daho dè: na e tindo nude na dọ na ẹn.” Awhàngán lọ plan visunnu lọ yì awhàngán daho Klaudiu Lusia dè bo dọna ẹn dọ dẹpẹ lọ jlo na dọ onú titengbe de na ẹn. Klaudiu plan ylọnẹn-ylọvi Paulu tọn jẹla bọ e dọ ohó lọ lẹpo na ẹn.

Klaudiu gbẹ́ na ylọnẹn-ylọvi Paulu tọn dọ: “A dọna mẹde dọ hiẹ ko do onú helẹ hia mi blo.” Enẹgodo, e ylọ awhàngán awe bo dọna yé nado wleawuna awhànfuntọ 200, osọ́nọ 70, po owhán-yìntọ 200 po nado yì Sesalea. To ogàn ṣinẹnẹ zánmẹ tọn mẹ, awhànfuntọ 470 lọ lẹ plan Paulu yì Togán Lomu tọn Feliksi dè to Sesalea awuyẹyẹ-afọyẹyẹ. To wekanhlanmẹ he Klaudiu dohlan Feliksi mẹ, e dọho gando tito he yin bibasi nado hù Paulu go.

Enẹwutu Ju lẹ to dandannu glọ nado pannukọn Paulu to owhẹ̀ nukọn to Sesalea nado dọ nuhe yé mọ jẹagọdo e. Ṣigba, yé ma tindo kunnudenu depope dọ Paulu wà nude jẹagọ. Etomọṣo, Paulu yin ginglọndo gànpamẹ na owhe awe matin whẹwhinwhẹ́n depope. Enẹwutu, e biọ dọ owhẹ̀ etọn ni  yin vivọdọ to Lomu podọ e sọ yin didohlan dọ́n.—Owalọ lẹ 23:16–24:27; 25:8-12.

Etẹwẹ mí sọgan plọn sọn kandai he gando ylọnẹn-ylọvi Paulu tọn go ehe mẹ?— Mí plọn dọ e nọ biọ adọgbo nado dọ nuhe e jẹ dọ mẹdevo lẹ ni sè podọ eyin mí wàmọ, mí sọgan whlẹn yé gán. Di apajlẹ, to whenue Jesu tlẹ yọnẹn dọ kẹntọ etọn lẹ “to dindin nado hù i,” e zindonukọn nado dọhona gbẹtọ lẹ gando Ahọluduta Jiwheyẹwhe tọn go. Jesu biọ dọ mí ni wà nudopolọ. Be mí na wàmọ ya? Mí na wàmọ eyin mí nọ gboadọ taidi ylọnẹn-ylọvi Paulu tọn.—Johanu 7:1; 15:13; Matiu 24:14; 28:18-20.

Paulu na tuli họntọn etọn, Timoti, he yin jọja de dọmọ: “Payi dewe po mẹpinplọn towe po go; nọ nọte to yé mẹ; na ehe wiwà mẹ hiẹ na whlẹn dewe, po yé he to ohó towe sè lẹ po.” (1 Timoti 4:16) Matin ayihaawe, ylọnẹn-ylọvi Paulu tọn yinuwa sọgbe hẹ nuhe ylọnẹn etọn dọ. Be hiẹ lọsu na wàmọ ya?

[Nudọnamẹ odò tọn]

Kanbiọ Lẹ:

○ Hẹnnumẹ Paulu tọn tẹlẹ wẹ a yọnẹn, podọ etẹwẹ mí plọn gando yé go?

○ Etẹwẹ ylọnẹn-ylọvi Paulu tọn wà nado whlẹn ẹn?

○ Sọgbe hẹ nuhe Jesu dọ, etẹwẹ mí sọgan wà nado whlẹn gbẹtọ lẹ to egbehe?