Dọnsẹpọ Jiwheyẹwhe

Jehovah Nọ Na Mí Dotẹnmẹ Nado Basi Nudide

Deutelonomi 30:11-20

“N’ MA yọ́n nuhewutu n’nọ saba dibu dọ n’ma na penugo nado yin nugbonọ na Jehovah.” Nuhe mẹmẹyọnnu de dọ niyẹn na e nọ lẹndọ numimọ ylankan he emi tindo to ovu whenu lẹ zọ́n bọ emi na gboawupo to gbẹ̀mẹ janwẹ. Be mọ wẹ whẹho lọ yin ya? Nado dọ hójọhó, be ninọmẹ mítọn ko ylan bọ e vọ́ do finẹ wẹ ya? Lala. Jehovah Jiwheyẹwhe na mí nunina mẹdekannujẹ nudide bibasi tọn, enẹwutu mí sọgan de aliho he mẹ mí na zan gbẹzan mítọn te. Jehovah jlo dọ mí ni basi nudide dagbe lẹ, podọ Ohó etọn Biblu dọ lehe mí sọgan wàmọ gbọn na mí. Lẹnnupọndo nuhe Mose dọ lẹ ji, dile e yin kinkàndai do to Deutelonomi weta 30 mẹ.

Be e vẹawu nado yọ́n nuhe Jiwheyẹwhe biọ to mí si lẹ bo wà yé wẹ ya? a Jiwheyẹwhe dọ gbọn Mose gblamẹ dọmọ: “Gbedide ehe he yẹn degbena we to egbehe, e ma yin sinsinyẹn gbau na we gba, mọ e ma tin dẹn boboe gba.” (Wefọ 11) Jehovah ma nọ biọ nuhe go mí ma pé to mí si. Nubiọtomẹsi etọn lẹ sọgbe hẹ lẹnpọn dagbe podọ mí sọgan jẹ yé kọ̀n. Mí sọ sọgan yọ́n yé. E ma biọ dọ mí ni “hẹji yì jẹ olọn mẹ” kavi zingbejizọnlin “yì ohù lọ godo dọ́n” nado sọgan plọn nuhe Jiwheyẹwhe biọ to mí si lẹ. (Wefọ 12, 13) Biblu do lehe mí dona zan gbẹzan mítọn gbọn hia mí hezeheze.—Mika 6:8.

Ṣigba, Jehovah ma nọ hẹn mí gánnugánnu nado setonuna ẹn gba. Mose dọmọ: “Yẹn ko ze to egbehe do nukọn towe ogbẹ̀ po dagbe po, podọ okú po oylan po.” (Wefọ 15) Mí vò nado de dopo to ogbẹ̀ po okú po, kavi dagbe po oylan po ṣẹnṣẹn. Mí sọgan de nado sẹ̀n Jiwheyẹwhe bo setonuna ẹn bo gbọnmọ dali mọ dona lẹ yí, kavi mí sọgan de nado vẹtolina ẹn bo jiya kọdetọn ylankan lẹ tọn. Depope he whẹho lọ yin, nudide mítọn wẹ.—Wefọ 16-18; Galatianu lẹ 6:7, 8.

Be nudide he mí basi nọ duahunmẹna Jehovah ya? Gbau! Jiwheyẹwhe gbọdo Mose nado dọmọ: “De ogbẹ̀.” (Wefọ 19) Ṣigba, nawẹ mí sọgan de ogbẹ̀ gbọn? Mose basi zẹẹmẹ dọmọ: “Nado nọ yiwanna OKLUNỌ lọ Jiwheyẹwhe towe, nado nọ setonuna ogbè etọn, podọ nado nọ dọnsẹpọ jẹ e dè.” (Wefọ 20) Eyin mí yiwanna Jehovah, mí na jlo nado dotoaina ẹn bo setonuna ẹn bosọ gbọn nugbonọ-yinyin dali dọnsẹpọ ẹ pẹkipẹki mahopọnna nudepope he na to jijọ. Eyin mí nọ wàmọ, mí na dohia dọ mí de ogbẹ̀—yèdọ aliho gbẹninọ tọn dagbe hugan todin po todido ogbẹ̀ madopodo tọn po to aihọn yọyọ Jiwheyẹwhe tọn he ja lọ mẹ.—2 Pita 3:11-13; 1 Johanu 5:3.

Nuhe Mose dọ lẹ vọ́ jidenamẹ dọ: Mahopọnna nudepope he a ko pehẹ to aihọn ylankan ehe mẹ, ninọmẹ towe ma ko ylan bọ e vọ̀ do finẹ gba; mọjanwẹ a ma ko gboawupo dote to gbẹzan towe mẹ do niyẹn. Jehovah ko yí nunina mẹdekannujẹ nudide bibasi tọn do doyẹyigona we. Mọwẹ, a sọgan de nado yiwanna Jehovah bo dotoaina ẹn bosọ gbọṣi nugbonọ-yinyin mẹ na ẹn. Eyin a basi nudide mọnkọtọn, Jehovah na dona vivẹnudido towe lẹ.

Nugbo lọ dọ mí vò nado de na míde nado yiwanna Jehovah bo sẹ̀n ẹn, miọnhomẹna mẹmẹyọnnu he go mí donù to aga lọ. E dọmọ: “N’yiwanna Jehovah. Ṣigba dai, n’nọ wọnji to whedelẹnu dọ nuhe yin nujọnu hugan lọ wẹ yindọ n’yiwanna Jehovah. Todin, n’mọdọ n’sọgan yin nugbonọ.” Po alọgọ Jehovah tọn po, hiẹ lọsu sọgan wàmọ.

[Nudọnamẹ odò tọn]