Be A Sọgan Dejido Sinsẹ̀n Go Na Nuhe Dù Awhàn Ya?
Be A Sọgan Dejido Sinsẹ̀n Go Na Nuhe Dù Awhàn Ya?
Alberto he yin awhànfuntọ na nudi owhe ao dọmọ: “Sinsẹ̀ngán mítọn nọ hodẹ̀ na mí dọ, ‘Jiwheyẹwhe tin hẹ mì.’ Amọ́, ayiha ṣie nọ dotukla mi dọ, ‘Gbẹtọ hù gbè a jei mọọ, Biblu ka dọ dọ “hiẹ ma na hùmẹ.”’”
Ray he yin awhànfuntọ tọji tọn to Wẹkẹ-Whàn II whenu, kanse sinsẹ̀ngán yetọn to gbèdopo dọmọ: “Mì nọ wá bato lọ mẹ nado hodẹ̀ na awhànpa mítọn lẹ podọ na mí nido duto awhàn lọ ji, amọ́ be e ma yin nue kẹntọ mítọn lẹ lọsu nọ wà niyẹn?” Sinsẹ̀ngán lọ gblọn dọ yè ma sọgan mọdona azọ́n Oklunọ tọn lẹ.
Eyin nuhe sinsẹ̀ngán lọ dọ dotukla we, yọnẹn dọ mọ wẹ e te na mẹdevo lẹ lọsu.
ETẸWẸ BIBLU PLỌN MÍ?
Jesu dọ dọ dopo to gbedide Jiwheyẹwhe tọn he klohugan lẹ mẹ wẹ nado “yiwanna kọmẹnu towe di dewe.” (Malku 12:31) Be Jesu dọ dọ fie kọmẹnu mítọn nọ nọ̀ kavi otò he mẹ e wá sọn go wẹ mí dona pọ́n do bo do yiwanna ẹn ya? Lala. E dọna devi etọn lẹ dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.” (Johanu 13:34, 35) Owanyi yetọn na ode awetọ na sinyẹn sọmọ bọ enẹ wẹ yè na do nọ yọ́n yé. Yé na tin to gbesisọ mẹ nado kú do ode awetọ tamẹ kakati nado hùmẹ.
Gbẹzan Klistiani dowhenu tọn lẹ tọn sọgbe hẹ hogbe Jesu tọn enẹlẹ. Otànwe sinsẹ̀n tọn de basi zẹẹmẹ dọmọ: “Nukọntọ ṣọṣi dowhenu tọn lẹ gọna Tertullien po Origen po zinnudeji dọ yè dosẹ́n na Klistiani lẹ ma nado hùmẹ, podọ nubiọtomẹsi ehe zẹẹmẹdo dọ yé ma dona yin apadewhe awhànpa Lomu tọn.” —The Encyclopedia of Religion.
NAWẸ KUNNUDETỌ JEHOVAH TỌN LẸ NỌ YINUWA GBỌN?
Diblayin otò lẹpo mẹ wẹ Kunnudetọ Jehovah tọn lẹ tin te, podọ e nọ wá jọ bọ otò he mẹ yé te lẹ nọ funawhàn sọta yede. Etomọṣo, yé nọ wà nuhe go yé pé lẹpo nado hẹn owanyi yetọn go, yèdọ ohia he yè do nọ yọ́n yé.
Di apajlẹ, to whenue Hutu po Tutsi lẹ po to akọ̀-whàn fùn to 1994 to Rwanda, Kunnudetọ Jehovah tọn lẹ ma doalọ to awhàn lọ mẹ to aliho depope mẹ. Kunnudetọ he wá sọn akọ̀ awe enẹlẹ mẹ lẹ nọ yí yedelẹ do owhé yetọn lẹ gbè, dile enẹ tlẹ sọgan zọ́n bọ yé na yin hùhù. To whenue Kunnudetọ Hutu awe yin wiwle na yé ze mẹmẹsunnu yetọn Tutsi lẹ whlá do owhé yetọn lẹ gbè wutu, awhànfuntọ Hutu tọn Interahamwe lẹ dọmọ: “Na mì gọalọna Tutsi lẹ nado họ̀ngán wutu, mì jẹna okú.” E blawu dọ Kunnudetọ Hutu awe enẹlẹ yin hùhù.—Johanu 15:13.
Etẹwẹ a lẹn: Be nuyiwa Kunnudetọ Jehovah tọn lẹ tọn sọgbe hẹ hogbe Jesu tọn lẹ gando owanyi mẹde-yido-sanvọ́ tọn go ya?
[Asisa Nudọnamẹ lẹ Tọn to weda 5]
Sọgbe hẹ yẹdide Awhànpa États-Unis tọn
[Nudọnamẹ tangan lẹ to weda 5]
Be sinsẹ̀ngán lẹ nọ plọnmẹ owanyi nugbo Klistiani tọn ya?
