Whenu susu nọ juwayi whẹpo mẹdelẹ do nọ plọnnu sọn nuṣiwa sinsinyẹn yetọn lẹ mẹ. Nuhe jọ do go e niyẹn. N’yin jiji bo yin pinplọn whẹ́n to Barcelone, yèdọ tòdaho awetọ he klohugan to Espagne. Whẹndo mítọn nọ nọ̀ lẹdo de he nọ yin Somorrostro mẹ, yèdọ lẹdo de he yí adà daho hugan huto tòdaho lọ tọn. Somorrostro yin yinyọnẹn taidi lẹdo de he mẹ sẹ́nhẹngba po amasin adínọ yiyizan po gbayipe te.

 Ovi ṣinẹnẹ wẹ mẹjitọ ṣie lẹ tindo bọ yẹn wẹ yin mẹho to yé mẹ. Na whẹndo mítọn yin wamọnọ wutu, otọ́ ṣie nọ do mi hlan nado yì wazọ́n taidi mẹhe nọ ṣinyan bọlu na bọlu-hògbẹ́ tennis tọn de. Owhe ao wẹ n’tindo bo nọ wazọ́n na gànhiho ao to gbèdopo. Enẹwutu, n’ma gán yì wehọmẹ dile ohá ṣie lẹ nọ wà do. Whenue n’do owhe 14, n’jẹ azọ́nwa ji to maṣinu-zọ́nwatẹn de.

 To 1975, n’yin oylọ basina nado plọn awhànzọ́n, ehe yin dandannu de na tòvi Espagne tọn lẹ to whenẹnu. E nọ jlo mi nado yí gbẹzan ṣie do wà ojlofọndotenamẹnu he na biọ dọ ma tọ́nwhẹ̀n delẹ, enẹwutu n’ze dee jo nado kọnawudopọ hẹ pipli awhànfuntọ Espagne tọn he to Tògodo delẹ tọn to Melilla, yèdọ aigba-denamẹ Espagne-nu lẹ tọn de to Agewaji Aflika tọn. To ojlẹ enẹ mẹ, n’tlọ dee do aṣa ylankan amasin adínọ yiyizan po ahàn sinsinyẹn ṣiṣizan tọn po mẹ.

 To whenue n’tọ́n sọn pipli awhànfuntọ lẹ tọn lọ mẹ, n’lẹkọyi Barcelone bo do pipli jaguda-gbẹ́ tọn de ai. Mí nọ fìn nudepope he alọ mítọn plá. Enẹgodo, mí nọ sà nuhe mí fìn lẹ nado mọ akuẹ do họ̀ amasin adínọ he mí na zan. N’jẹ amasin adínọ delẹ taidi L.S.D po amphétamine lẹ po zan ji bosọ tlọ dee do gbẹzan fẹnnuwiwa zanhẹmẹ tọn, ahàn sinsinyẹn ṣiṣizan gọna akọhiho tọn de mẹ. Gbẹzan ylankan ehe zọ́n bọ n’wá peve to danuwiwa mẹ. N’nọ saba hẹn ohí, asiọvi, kavi ajìmẹ de, podọ obu ma nọ di mi nado yí depope to yé mẹ zan eyin e biọ domọ.

 To gbèdopo, yẹn po jaguda-gbẹ́ ṣie po fìn mọto de bọ ponọ lẹ jẹgodona mí. E taidi sinima de wẹ nkọ. Mí kùnhún lọ na nudi Kilomẹtlu 30, kakajẹ whenue ponọ lẹ jẹ sòdedo mí ji. To godo mẹ, húnkùntọ mítọn kùnhún lọ sọnú bọ mímẹpo jẹte bo doge-wezun mẹ. To whenue otọ́ ṣie sè nuhe jọ, e yàn mi sọn whégbè bọ owhẹ̀ etọn ka sọ whẹ́n.

 Na owhe atọ́n he bọdego lẹ, alipá wẹ n’nọ dọ́. N’nọ mlọn họntonu mẹlẹ tọn, agbànbẹhun lẹ mẹ, oján he yin bibasi do nọtẹn gbangba tọn lẹ ji, gọna tẹpa lẹ mẹ. N’tlẹ nọ oslò de mẹ na ojlẹ de. Gbẹzan ṣie ma do lẹndai depope, podọ n’nọ mọdọ gbẹninọ kavi okú masọ di nude na mi ba. N’flindọ n’doapà alọ po awà ṣie lẹ po go to nuyiwadomẹji amasin adínọ tọn glọ. Apàdomẹ lọ gbẹ́ pò to go e kakajẹ egbé.

 To whenue n’tindo owhe 28, onọ̀ ṣie dín mi mọ bo biọ to asi e dọ ma lẹkọwa whégbè. N’yigbe bo dopà na ẹn dọ n’na basi vọjlado to gbẹzan ṣie mẹ, amọ́ whenu susu juwayi whẹpo n’do hẹn opà enẹ di.

 To whèmẹ gbèdopo, Kunnudetọ Jehovah tọn awe wá ohọ̀n mítọn ji. Dile n’to todoaina yé, otọ́ ṣie dawhá sọn họmẹ dọ ma suhọ̀n bo tọ́n sọn yé dè. Na n’ma nọ jlo dọ mẹde ni degbedo mi wutu, n’dovọ́na ẹn. Yé na mi owe pẹvi atọ̀n bọ n’kẹalọyi yé po homẹhunhun po. N’kàn fihe yé nọ basi opli te sè yé, podọ to azán kleun de godo, n’yì fihe Plitẹnhọ Ahọluduta tọn lọ te.

 Onú tintan he dọ̀n ayidonugo ṣie wẹ aliho dagbe he mẹ dopodopo yetọn doaṣọ́ te. To vogbingbọn mẹ, oda ṣie dite bọ ogbì ṣie gọ́ podọ avọ̀ he n’do ko ṣá. E họnwun dọ otẹn ṣie ma to finẹ, enẹwutu n’gbọṣi gbonu Plitẹnhọ lọ tọn. Amọ́ po nupaṣamẹ po, n’mọ dopo to jaguda-gbẹ́ ṣie dai tọn lẹ mẹ he nọ yin Juan hlan, to vẹsi mẹ. N’wá sè dọ e ko yì owhe dopo din he e lẹzun Kunnudetọ Jehovah tọn de. Finẹ he n’mọ ẹn te to gbenẹgbe na mi adọgbigbo nado biọ ohọ̀ lọ mẹ bo dotoaina opli lọ. Finẹ wẹ nulẹ jẹ didiọ ji te to gbẹzan ṣie mẹ.

 N’yigbe nado plọn Biblu bọ e wá họnwun na mi dọ eyin n’jlo na mọ nukundagbe Jiwheyẹwhe tọn, n’dona jo kanyinylan po gbẹzan fẹnnuwiwa tọn po do. Diọdo enẹlẹ bibasi ma bọawu paali. N’plọn dọ eyin n’na hẹn homẹ Jehovah Jiwheyẹwhe tọn hùn, n’dona “yin adàdiọna gbọn ayiha [ṣie] didiọ dali.” (Lomunu lẹ 12:2) Lẹblanu Jiwheyẹwhe tọn yinuwado ji e taun. Mahopọnna nuṣiwa ṣie lẹpo, n’tindo numọtolanmẹ lọ dọ e hùn dotẹnmẹ dote na mi nado bẹ gbẹzan yọyọ de jẹeji. Nuhe n’plọn gando Jehovah Jiwheyẹwhe go lẹ yinuwado ahun ṣie ji tlọlọ. E wá họnwun na mi dọ Mẹdatọ de tin he nọ hò ṣie pọ́n.​—1 Pita 5:6, 7.

 Ehe whàn mi nado jẹ diọdo basi ji. Di apajlẹ, whenue mí plọnnu do taba nùnù ji, n’dọna dee dọ, ‘Eyin Jehovah Jiwheyẹwhe jlo dọ ma nọ wiweji bo ma hẹn dee flu to nudepope mẹ, be siga ehelẹ dona gbọn fide!’ (2 Kọlintinu lẹ 7:1) Enẹwutu, n’bẹ yé dlan ogbóji!

 N’sọ dona doalọtena amasin adínọ yiyizan po sisà po. Enẹ biọ whenu po vivẹnudido susu po. Nado jẹ yanwle enẹ kọ̀n, n’yọnẹn dọ n’dona sánkanna gbẹdido hẹ hagbẹ ṣie dai tọn lẹ. Nuyiwadomẹji yetọn ma to alọgọna mi nado yinukọn to gbigbọ-liho. Ṣigba, to ojlẹ de godo, n’jẹ ginganjẹ Jiwheyẹwhe po alọgọ họntọn yọyọ ṣie he tin to agun mẹ lẹ po tọn go ji dogọ. N’ma ko tindo numimọ owanyi po mẹtọnhopọn yetọn po tọn nkọ pọ́n gbede. Dile osun lẹ to yìyì, n’wá penugo nado duto amasin adínọ yiyizan ji bo “ze gbẹtọ-yinyin yọyọ lọ do,” ehe gọalọna mi nado tindo nukundagbe Jiwheyẹwhe tọn. (Efesunu lẹ 4:24) To août 1985, n’yí baptẹm taidi dopo to Kunnudetọ Jehovah tọn lẹ mẹ.

 Biblu gọalọna mi nado diọ gbẹzan ṣie. E tún mi dote sọn gbẹzan ylankan he to agbasa ṣie hẹngble si bo yidogọna osi mẹdetiti tọn ṣie. Na nugbo tọn, omẹ 30 linlán to hagbẹ ṣie dai tọn lẹ mẹ wẹ kú to jọja whenu, na SIDA po azọ̀n he amasin adínọ nọ bẹplamẹ devo lẹ po wutu. Lehe n’yọ́n pinpẹn etọn do sọ dọ gbọn nunọwhinnusẹ́n Biblu tọn lẹ yíyí do yizan mẹ dali, n’penugo nado dapana kọdetọn ylankan mọnkọ lẹ.

 Ohí po asiọvi he n’nọ ze pé dai taidi jọja danuwatọ de po ko lẹzun onú hoho tọn. N’ma tlẹ lẹn pọ́n gbede dọ kakati nado hẹn onú enẹlẹ, Biblu wẹ n’na wá hẹn pé bo na yí i do gọalọna mẹdevo lẹ. To egbehe, yẹn po asi ṣie po to sinsẹ̀n taidi lizọnyizọnwatọ whenu-gigọ́ tọn Kunnudetọ Jehovah tọn lẹ tọn.

 Mẹjitọ ṣie lẹ ma lẹzun Kunnudetọ Jehovah tọn lẹ pọ́n gbede, amọ́ yé yọ́n pinpẹn ale he Biblu pinplọn hẹnwa na mi lẹ tọn. Na nugbo tọn, otọ́ ṣie tlẹ yiavùnlọna Kunnudetọ Jehovah tọn lẹ to hagbẹ etọn lẹpo nukọn. E họnwun na ẹn dọ yise yọyọ ṣie wẹ zọ́n bọ n’diọ do dagbe ji. Onọ̀ ṣie nọ saba dọ dọ e na ko yọ́n dai eyin n’yawu plọn Biblu wẹ. Lehe owhẹ̀ etọn whẹ́n do sọ!

 Numimọ he n’tindo to gbẹ̀mẹ lẹ plọn mi dọ nulunu wẹ e yin nado nọ dín pekọ to amasin adínọ yiyizan po aṣa ylankan devo lẹ po mẹ. N’nọ mọ pekọ nujọnu tọn todin to anadidena mẹdevo lẹ hlan nuplọnmẹ he to Ohó Jiwheyẹwhe tọn mẹ lẹ kọ̀n​—yèdọ nuplọnmẹ he whlẹn ogbẹ̀ ṣie gán nugbonugbo.