ZẸẸMẸ WEFỌ BIBLU TỌN LẸ TỌN
Lomunu lẹ 12:12—“Mì Nọ Jaya to Todido Mẹ; Mì Nọ Miọnhomẹ to Nukunbibia Mẹ; Bosọ Yí Tenọgli Do Gbọṣi Odẹ̀ Mẹ”
“Mì nọ jaya to todido mẹ. Mì nọ doakọnnanu to nukunbibia mẹ. Mì nọ sinyẹnlin to odẹ̀ mẹ.”—Lomunu lẹ 12:12, Lẹdogbedevomẹ Aihọn Yọyọ Tọn.
“Mì nọ jaya to todido mẹ; mì nọ miọnhomẹ to nukunbibia mẹ; bosọ yí tenọgli do gbọṣi odẹ̀ mẹ.”—Lomunu lẹ 12:12, Biblu Wiwe lọ—Gun Alada.
Zẹẹmẹ Lomunu lẹ 12:12 Tọn
To wefọ ehe mẹ, apọsteli Paulu to didọna Klistiani he to Lomu lẹ nado nọ wà onú atọ̀n delẹ he na gọalọna yé nado yin nugbonọ eyin yè tlẹ to nukundiọsọ yé kavi adán to gbigbò yé.
“Mì nọ jaya to todido mẹ.” Klistiani lẹ yọnẹn dọ emi na wá nọgbẹ̀ kakadoi. Delẹ to yé mẹ na nọgbẹ̀ to olọn mẹ, bọ mẹsusu devo lẹ na nọ paladisi mẹ to aigba ji. (Salmu lẹ 37:29; Johanu 3:16; Osọhia 14:1-4; 21:3, 4) Klistiani lẹ sọ yọnẹn dọ Ahọluduta Jiwheyẹwhe tọn a na de nuhahun he zọ́n bọ gbẹtọvi lẹ do to yaji lẹpo sẹ̀. (Daniẹli 2:44; Matiu 6:10) Jiwheyẹwhe sẹ̀ntọ lẹ gán nọ jaya eyin adán sinsinyẹn lẹ tlẹ to gbigbò yé, na yé kudeji dọ yé na mọ nue yé to nukundo lẹ, podọ homẹ Jiwheyẹwhe tọn na hùn do yé go eyin yé doakọnnanu.—Matiu 5:11, 12; Lomunu lẹ 5:3-5.
“Mì nọ doakọnnanu to nukunbibia mẹ.” To Biblu mẹ, hogbe Glẹkigbe tọn he yè lilẹdo “doakọnnanu” nọ saba zẹẹmẹdo nado “gbọṣi [nuhahun de kọ̀n] kakati nado họ̀n; nado sinyẹnlin; nado nọtegligli.” Na hodotọ Klisti tọn lẹ “ma yin apadewhe aihọn tọn” b wutu, yé yọnẹn dọ yè na diọnukunsọ emi, enẹwutu e na biọ dọ yé ni doakọnnanu. (Johanu 15:18-20; 2 Timoti 3:12) Eyin yè tlẹ dohomẹkẹn Klistiani de bọ e yin nugbonọ bo sẹ̀n Jiwheyẹwhe, e nọ yise dogọ dọ Jiwheyẹwhe na suahọ emi janwẹ. (Matiu 24:13) Yise ehe na zọ́n bọ e na nọ fahomẹ bo yí ayajẹ do doakọnna nuhahun lẹ.—Kolosinu lẹ 1:11.
“Mì nọ sinyẹnlin to odẹ̀ mẹ.” Whlasusu wẹ yè na ayinamẹ Klistiani lẹ nado nọ hodẹ̀, na enẹ na zọ́n bọ yé na yin nugbonọ na Jiwheyẹwhe. (Luku 11:9; 18:1) Yé nọ lẹhlan Jiwheyẹwhe gbọzangbọzan na ewọ nido de yé do aliji bosọ nọ ganjẹ ewọ go to nuhe yé nọ wà lẹpo mẹ. (Kolosinu lẹ 4:2; 1 Tẹsalonikanu lẹ 5:17) Yé kudeji dọ Jiwheyẹwhe na na yé nuhe yé nọ biọ to odẹ̀ mẹ lẹ, na yé nọ setonuna ẹn bosọ nọ dogán nado hẹn homẹ etọn hùn wutu. (1 Johanu 3:22; 5:14) Yé sọ yọnẹn dọ eyin emi ma dovọ́na aṣa lọ nado nọ hodẹ̀, Jiwheyẹwhe na na yé huhlọn bọ yé na yin nugbonọ mahopọnna whlepọn depope he yé na pehẹ.—Filipinu lẹ 4:13.
Nujijọ He Lẹdo Lomunu lẹ 12:12 Lẹ
Paulu kàn owe ehe hlan Klistiani he to Lumu lẹ to nudi owhe 56 W.M. To weta 12tọ owe lọ tọn mẹ, e na ayinamẹ do jijọ dagbe he Klistiani lẹ dona do lẹ ji, lehe yé dona nọ wanu hẹ yisenọ hatọ yetọn lẹ po mẹdevo lẹ po do, gọna lehe yé gán nọ nọ̀ jijọho mẹ hẹ mẹhe dohomẹkẹn yé lẹ do. (Lomunu lẹ 12:9-21) Ayinamẹ enẹ wá do gànmẹ na Klistiani he to Lomu lẹ, na e ma dẹn de bọ yè diọnukunsọ yé sinsinyẹn.
Owhe delẹ godo to owhe 64 W.M., miyọ́n de dùnú to tòdaho Lomu tọn mẹ bo hẹnnugble taun. Mẹsusu lẹ wẹ dọ dọ Togán Néron wẹ flọ́ miyọ́n lọ. Tacite he yin whenuho-kantọ Lomu tọn de dọ dọ Néron de ede sọn owhẹ̀ mẹ bo fli owhẹ̀ lọ do Klistiani lẹ ji. Ehe hẹn homẹkẹn sinsinyẹn wá na Klistiani lẹ. Ayinamẹ he Paulu na lọ gọalọna yé nado doakọnna ojlẹ sinsinyẹn enẹ bọ yise yetọn ma depò, podọ yé ma duwinyan. (1 Tẹsalonikanu lẹ 5:15; 1 Pita 3:9) Apajlẹ dagbe de wẹ yé yin he go mẹhe to Jiwheyẹwhe sẹ̀n to egbé lẹ gán pọ́n do.
Pọ́n video kleun ehe nado mọ nue to owe Lomunu lẹ tọn mẹ delẹ.
a Ahọluduta Jiwheyẹwhe tọn yin gandudu de he Jiwheyẹwhe doai do olọn mẹ. Gandudu ehe wẹ e na zan nado wà nuhe e lẹndọ emi na wà do aigba ji lẹpo. Eyin a jlo na yọ́n nususu dogọ, hia hosọ lọ “Etẹwẹ Ahọluduta Jiwheyẹwhe Tọn Yin?”
b To Biblu mẹ, hogbe lọ “aihọn” gán dlẹnalọdo pipli mẹhe ma jlo na wà ojlo Jiwheyẹwhe tọn lẹ tọn.
A Gán Sọ Pọ́n Hosọ Ehelẹ
NUPLỌNMẸ TANGAN BIBLU TỌN LẸ
Be Jiwheyẹwhe Nọ Sè Odẹ̀ Lẹpo Wẹ Ya?
Eyin ṣejannabi wẹ nọ sisẹ́ mẹde nado hodẹ̀ lo? Bọ eyin mẹde ylanhùn do asi ẹ go bo wá hodẹ̀ dọ Jiwheyẹwhe ni dona emi lo?
ZẸẸMẸ WEFỌ BIBLU TỌN LẸ TỌN
Zẹẹmẹ Lomunu lẹ 15:13 tọn—“Jiwheyẹwhe Otódo Tọn Ni Yí Ayajẹ po Jijọho Lẹpo po Do Gọ́ Mì”
Nawẹ ayajẹ po jijọho po do kanṣiṣa hẹ todido po gbigbọ wiwe po gbọn?
GBLỌNDO NA KANBIỌ SINAI DO BIBLU JI LẸ
Be Jiwheyẹwhe Na Gọalọna Mi Eyin N’hodẹ̀ Ya?
Be onú mítọn nọ duahunmẹna Jiwheyẹwhe nugbonugbo ya?
NUHE BIBLU PLỌN MÍ
Azọ́nwanu Biblu Pinplọn Tọn Lẹ
De azọ́nwanu he a nado plọn Biblu po awuvivi po to aliho debọdo-dego tọn mẹ lẹ.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.
