Lala. Biblu ma dọ dọ akuẹ ylan, mọdopolọ e ma do akuẹ hia di nuhe go nuylankan lẹpo nọ sọn. Hodidọ he mẹsusu jẹakọ hẹ lọ, he dọ “akuẹ wẹ yin adọ̀ walọ oylan lẹpo tọn” yin hodidọ agbòte de sọn Biblu mẹ, ehe mẹlẹ nọ yizan to aliho agọ̀ mẹ. Na taun tọn, nue Biblu dọ wẹ, “owanyi akuẹ tọn wẹ adọ̀ walọ oylan lẹpo tọn de.” a—1 Timoti 6:10, Biblu Wiwe lọ—Gun Alada, wekun titli lẹ yin mítọn.

•  Etẹwẹ Biblu dọ gando akuẹ go?

•  Naegbọn Biblu do na avase gando wanyina akuẹ go?

•  Nawẹ ayinamẹ he Biblu na gando akuẹ go sọgan hẹn ale wá na mí gbọn?

•  Wefọ Biblu tọn delẹ he dọho gando akuẹ go

 Biblu lọsu yigbe dọ eyin yè yí akuẹ zan po nuyọnẹn po, e sọgan yọ́n-na-yizan, bo tlẹ gán sọ yin “hihọ́ de.” (Yẹwhehodọtọ 7:12) Humọ, Biblu pà mẹhe nọ tlúalọ hlan mẹdevo lẹ, ehe gán bẹ akuẹ ninamẹ hẹn.—Howhinwhẹn lẹ 11:25.

 To ojlẹ dopolọ mẹ, Biblu dosẹ́n dọ akuẹ ma dona jẹnukọnna mí to gbẹ̀mẹ. E dọmọ: “Mì gbọ aliho gbẹninọ tọn mìtọn ni tin matin wanyina akuẹ, na mì ni tindo pekọ po nuhe mì tindo lẹ po.” (Heblu lẹ 13:5) Nuplọnmẹ lọ wẹ yindọ, mí ni yọ́n otẹn he mẹ akuẹ dona nọ to gbẹzan mítọn mẹ, bo ma nọ họ̀nwezun to adọkun godo blo. Kakatimọ, mí dona nọ tindo pekọ po nue sin hudo mí do nugbonugbo lẹ po, taidi núdùdù, avọ̀ po adọtẹn po.—1 Timoti 6:8.

 Nukunkẹnnọ lẹ ma na mọ ogbẹ̀ madopodo. (Efesunu lẹ 5:5) Whẹwhinwhẹ́n dopo wẹ yindọ, nukunkẹn yin wunmẹ boṣiọ-sinsẹ̀n tọn kavi sinsẹ̀n-bibasi lalo tọn de. (Kolosinu lẹ 3:5) Awetọ wẹ yindọ, dile nukunkẹnnọ de to ayiha lẹpo kàn na alọ etọn nido jẹ nue dín e te go, e nọ saba gboawupo nado do jijọ dagbe lẹ hia. Mẹhe “to whlẹndo ji nado jẹ adọkun ma na to homẹvọnọ yin zọnmii,” wẹ Howhinwhẹn lẹ 28:20 dọ. Omẹ mọnkọ lẹ tlẹ sọgan wá jẹ jijlo ji nado doalọ to sẹ́nhẹngba lẹ mẹ, taidi nukunvandomẹ nado hò nude yí sọn mẹsi, alọslonamẹ, mẹhodu, mẹfinfin, kavi mẹhuhu.

 Eyin wanyina akuẹ ma tlẹ sisẹ́ mẹde biọ walọyizan ylankan lẹ mẹ, e sọgan hẹn kọdetọn vẹadi devo lẹ wà na ẹn. Biblu dọ dọ “mẹhe magbe nado yin adọkunnọ lẹ jai jẹ whlepọn po omọ̀ po gọna ojlo gúgú tọn po ojlo ylankan susu po mẹ.”—1 Timoti 6:9.

 Eyin mí ma nọ pọ́n do akuẹ go bo gbẹkọ jijọ dagbe lẹ po nubiọtomẹsi Jiwheyẹwhe tọn lẹ po go, mí na gbẹ́ tindo owì to ota bo vò to míde mẹ, bo nasọ mọ nukundagbe po godonọnamẹ Jiwheyẹwhe tọn po. Jiwheyẹwhe dopà na mẹhe nọ dovivẹnu ahundopo tọn nado hẹn homẹ etọn hùn lẹ dọmọ: “Yẹn ma na jo mì do gbede podọ yẹn ma na gbẹ́ mì dai gbede.” (Heblu lẹ 13:5, 6) Ewọ sọ hẹn mí deji dọ “nugbonọ na mọ dona susu yí.”—Howhinwhẹn lẹ 28:20.