Ahọluduta Jiwheyẹwhe tọn yin gandudu nujọnu tọn de he Jehovah Jiwheyẹwhe doai. “Ahọludu Jiwheyẹwhe tọn” sọ nọ yin yiylọdọ “ahọludu olọn tọn” to Biblu mẹ, na olọn mẹ wẹ e na dugán sọn wutu. (Malku 1:14, 15; Matiu 4:17, Biblu Wiwe lọ​—Gun Alada.) Ahọluduta Jiwheyẹwhe tọn tindo tito anadenanu tọn he gandudu gbẹtọvi lẹ tọn nọ hodo, etomọṣo gandudu Jiwheyẹwhe tọn yiaga hugan gbẹtọvi lẹ tọn to aliho lẹpo mẹ.

•   Gandutọ lẹ. Jiwheyẹwhe ko de Jesu Klisti taidi Ahọlu Ahọluduta lọ tọn bo ko sọ na ẹn aṣẹpipa he nkọ gandutọ gbẹtọvi tọn depope ma sọgan tindo. (Matiu 28:18) Jesu nọ yí aṣẹpipa ehe zan to aliho dagbe mẹ to whepoponu, na e ko do ede hia taidi Nukọntọ dejidego podọ awuvẹmẹtọ de wutu. (Matiu 4:23; Malku 1:40, 41; 6:31-34; Luku 7:11-17) To anademẹ Jiwheyẹwhe tọn glọ, Jesu ko ṣinyan gbẹtọ lẹ sọn akọta lẹpo mẹ, he na “duahọlu do aigba ji” po e po to olọn mẹ.​—Osọhia 5:9, 10.

•   Tedidi gandudu lọ tọn. Na nuhe dù gandudu gbẹtọvi lẹ tọn, ode nọ yì bọ devo nọ wá, ṣigba Ahọluduta Jiwheyẹwhe tọn “ma na yin viva gbede.”​—Daniẹli 2:44.

•   Mẹjidugando lẹ. Mẹdepope he wà nuhe Jiwheyẹwhe jlo lẹ sọgan nọ Ahọluduta Jiwheyẹwhe tọn glọ, mahopọnna akọ̀ kavi fie e wá sọn.​—Owalọ lẹ 10:34, 35.

•   Osẹ́n lẹ. Osẹ́n (kavi gbedide) Ahọluduta Jiwheyẹwhe tọn lẹ tọn ma nọ zinnudo walọ ylankan he mí dona dapana lẹ kẹdẹ ji gba, ṣigba yé nọ sọ gọalọna mẹjidugando etọn lẹ nado yin gbẹtọ walọ dagbenọ lẹ. Di apajlẹ, Biblu dọmọ: “‘Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.’ Ehe wẹ gbedide lọ he klohugan bosọ yin tintan. Awetọ lọ die, he sọ taidi tintan lọ, ‘Hiẹ dona yiwanna kọmẹnu towe di dewe.’” (Matiu 22:37-39) Owanyi na Jiwheyẹwhe podọ na kọmẹnu lẹ nọ whàn mẹjidugando Ahọluduta lọ tọn lẹ nado yinuwa na dagbe mẹdevo lẹ tọn.

•   Mẹpinplọn. Nugbo wẹ dọ Ahọluduta Jiwheyẹwhe tọn nọ ze nubiọtomẹsi he yiaga lẹ dai na mẹjidugando etọn lẹ, ṣigba e sọ nọ plọn gbẹtọ lẹ lehe yé na jẹ nubiọtomẹsi enẹlẹ kọ̀n do.​—Isaia 48:17, 18.

•   Azọ́ndenamẹ. Ahọluduta Jiwheyẹwhe tọn ma nọ hò mẹhe ji e to gandu do lẹ dù. Kakatimọ, ojlo Jiwheyẹwhe tọn wẹ e na hẹndi gọna opagbe etọn he dọ dọ mẹhe yiwanna ẹn lẹ na nọgbẹ̀ kakadoi to paladisi mẹ to aigba ji.​—Isaia 35:1, 5, 6; Matiu 6:10; Osọhia 21:1-4.