Baptẹm zẹẹmẹdo dọ mẹde ni yin yinylọ́n do osin mẹ mlẹnmlẹn bosọ yin didetọn sọn e mẹ. a Enẹwutu wẹ Jesu do yin bibaptizi to tọ̀sisa de mẹ. (Matiu 3:​13, 16) Mọdopolọ, dawe Etiopianu de biọ nado yin bibaptizi to whenue e mọ “osindò de.”​—Owalọ lẹ 8:36-40.

Nuhe baptẹm zẹẹmẹdo

 Biblu yí baptẹm jlẹdo ṣiọdidi de go. (Lomunu lẹ 6:4; Kolosinu lẹ 2:12) Baptẹm osin tọn nọ dohia dọ mẹde ko kú na nuhe dù gbẹzan etọn dai tọn bo bẹ gbẹzan yọyọ de jẹeji taidi Klistiani de he ko klan ede do wiwe hlan Jiwheyẹwhe. Baptẹm po afọdide he nọ planmẹ jẹ e kọ̀n lẹ po yin awuwledainanu Jiwheyẹwhe tọn, na mẹde nido tindo ayihadawhẹnamẹnu wiwe de sinai do yise etọn to avọ́sinsan Jesu Klisti tọn mẹ ji. (1 Pita 3:​21) Enẹwutu, Jesu plọn devi etọn lẹ dọ yé dona yin bibaptizi.​—Matiu 28:19, 20.

Be baptẹm osin tọn nọ klọ́ ylando sẹ̀ wẹ ya?

 Lala. Biblu plọn mí dọ ohùn he Jesu sọndai kẹdẹ wẹ sọgan klọ́ ylando mítọn lẹ sẹ̀. (Lomunu lẹ 5:8, 9; 1 Johanu 1:7) Amọ́, nado mọaleyi sọn avọ́sinsan Jesu tọn mẹ, mí dona do yise hia to ewọ mẹ, diọ aliho gbẹninọ tọn mítọn bo nọgbẹ̀ sọgbe hẹ nuplọnmẹ Jesu tọn lẹ bosọ yí baptẹm.​—Owalọ lẹ 2:38; 3:19.

Etẹwẹ ovi-bibẹtọ́n zẹẹmẹdo?

 Hogbe lọ “ovi bibẹtọ́n” ma sọawuhia to Biblu mẹ. E nọ dlẹnalọdo hùnwhẹ he sinsẹ̀n delẹ nọ basi nado “baptizi” ovivu de (gbọn osin húnhún do ota na ẹn dali) bo do yinkọ na ẹn.

Be Biblu plọnmẹ dọ ovivu lẹ dona nọ yin bibaptizi wẹ ya?

 Paali. Baptẹm Klistiani tọn tin na mẹhe ko whẹ́n bo mọnukunnujẹ “wẹndagbe Ahọluduta Jiwheyẹwhe tọn” mẹ bosọ tindo yise to e mẹ lẹ. (Owalọ lẹ 8:12) E nọ biọ dọ mẹlọ ni sè Ohó Jiwheyẹwhe tọn bo kẹalọyi i bosọ lẹnvọjọ​—yèdọ nuhe ovivu de ma gán wà.​—Owalọ lẹ 2:22, 38, 41.

 Humọ, Biblu dohia dọ Jiwheyẹwhe nọ pọ́n ovi pẹvi Klistiani lẹ tọn hlan di wiwe, kavi di mẹhe madoblọ to nukun etọn mẹ, na nugbonọ-yinyin mẹjitọ yetọn lẹ tọn wutu. (1 Kọlintinu lẹ 7:14) Eyin baptẹm ovivu lẹ tọn sọgbe wẹ, e ma na ko biọ dọ nukundagbe he yè yí do pọ́n mẹjitọ yetọn lẹ ni dlẹnkan jẹ yé dè. b

Pọndohlan agọ̀ delẹ gando baptẹm Klistiani tọn go

 Pọndohlan agọ̀: Yè gán húnhún osin kavi kọ̀n osin do ota na mẹde to baptẹm whenu kakati nado ylọn ẹn do osin mẹ mlẹnmlẹn.

 Nugbo lọ: Mẹhe yí baptẹm to Biblu mẹ lẹpo wẹ yin yinylọ́n do osin mẹ. Di apajlẹ, to whenue devi Filipi baptizi dawe Etiopianu lọ, yé “biọ osin ... mẹ” na e nido yí baptẹm. Enẹgodo, “yé tọ́n sọn osin lọ mẹ.”​—Owalọ lẹ 8:36-39. c

 Pọndohlan agọ̀: To fie Biblu dọho gando whédo blebu he yin bibaptizi te go lẹ, e dohia dọ ovi pẹvi he to whédo lọ mẹ lẹ lọsu yin bibaptizi. Di apajlẹ, e dọ gando gàntọ-ṣọ́tọ de go to Filipi dọ: “Ewọ po whédo etọn blebu po ... yin bibaptizi.”​—Owalọ lẹ 16:31-34.

 Nugbo lọ: Kandai he donù gàntọ-ṣọ́tọ he lẹzun Klistiani lọ go dohia dọ mẹhe yí baptẹm lọ lẹ mọnukunnujẹ “ohó Jehovah tọn” mẹ bosọ “jaya tlala.” (Owalọ lẹ 16:32, 34) Nugbo enẹlẹ hẹn mí wá tadona lọ kọ̀n dọ depope to ovivu he to owhé gàntọ-ṣọ́tọ lọ tọn gbè lẹ mẹ ma na ko yin bibaptizi, na yé ma gán mọnukunnujẹ ohó Jehovah tọn mẹ wutu.

 Pọndohlan agọ̀: Baptẹm ovivu lẹ tọn plọnmẹ wẹ Jesu te to whenue e dọ dọ Ahọluduta lọ tin na yọpọvu lẹ.​—Matiu 19:13-15; Malku 10:13-16.

 Nugbo lọ: Jesu ma to hodọdo baptẹm ji to whenue e yí hogbe enẹlẹ zan. Kakatimọ, didọ wẹ e te dọ mẹhe na pegan nado biọ Ahọluduta Jiwheyẹwhe tọn mẹ lẹ dona taidi yọpọvu lẹ​—enẹ wẹ nado yin homẹmimiọnnọ bo nọ kẹalọyi oplọn.​—Matiu 18:4; Luku 18:16, 17.