Etẹwẹ E Zẹẹmẹdo Nado ‘Gbògbéna Otọ́ Towe po Onọ̀ Towe Po’?
Gblọndo Biblu tọn
Gbedide lọ nado gbògbéna ‘otọ́ mẹtọn po onọ̀ mẹtọn po’ sọawuhia to Biblu mẹ whlasusu. (Eksọdusi 20:12; Deutelonomi 5:16; Matiu 15:4; Efesunu lẹ 6:2, 3) Gbedide enẹ bẹ nuyiwa titengbe ẹnẹ hẹn.
Nọ yọ́n pinpẹn yetọn. Gbégbigbòna otọ́ towe po onọ̀ towe po nọ biọ dọ a ni yọ́n pinpẹn nuhe yé ko wà na we lẹpo tọn. A sọgan do pinpẹn-nutọn-yinyọnẹn towe hia gbọn nukun nujọnu tọn yíyí do pọ́n anademẹ yetọn lẹ dali. (Howhinwhẹn lẹ 7:1, 2; 23:26) Biblu dotuhomẹna mí nado nọ pọ́n mẹjitọ mítọn lẹ hlan taidi “gigo” mítọn, enẹ wẹ nado nọ doawagun gando yé go—Howhinwhẹn lẹ 17:6.
Nọ kẹalọyi aṣẹpipa yetọn. Titengbe eyin a gbẹ́ pò to pẹvi, a na gbògbéna otọ́ towe po onọ̀ towe po eyin a kẹalọyi aṣẹpipa he Jiwheyẹwhe zedo alọmẹ na yé. Kolosinu lẹ 3:20 dọna jọja lẹ dọmọ: “Mì nọ setonuna mẹjitọ mìtọn lẹ to nulẹpo mẹ, na ehe wẹ nọ hẹn homẹ Oklunọ tọn hùn.” Jọja Jesu lọsu tlẹ desọn ojlo mẹ nado setonuna mẹjitọ etọn lẹ.—Luku 2:51.
Nọ do sisi hia yé. (Levitiku 19:3; Heblu lẹ 12:9) Ehe nọ saba gando nuhe a nọ dọ po lehe a nọ dọ ẹ do po go. Nugbo wẹ dọ to whedelẹnu, nuyiwa mẹjitọ delẹ tọn nọ hẹn ẹn vẹawu nado setonuna yé. Etomọṣo, ovi lẹ sọgan gbògbéna mẹjitọ yetọn lẹ gbọn nuyiwa po hodidọ he ma do sisi hia lẹ po didapana dali. (Howhinwhẹn lẹ 30:17) Biblu plọnmẹ dọ nuṣiwa sinsinyẹn de wẹ e yin nado zun otọ́ kavi onọ̀ mẹtọn.—Matiu 15:4.
Nọ wleawudaina yé. Eyin mẹjitọ towe lẹ ko poyọnho, yé gán do hudo alọgọ tọn taun. A gán gbògbéna yé gbọn nuhe go a pé lẹpo wiwà dali nado hẹn ẹn diun dọ yé mọ nuhe sin hudo yé tindo. (1 Timoti 5:4, 8) Di apajlẹ, ojlẹ vude jẹnukọnna okú Jesu tọn, e basi tito na onọ̀ etọn nido yin nukunpedego.—Johanu 19:25-27.
Pọndohlan agọ̀ delẹ gando gbégbigbòna otọ́ po onọ̀ mẹtọn po go
Pọndohlan agọ̀: Nado gbògbéna otọ́ towe po onọ̀ towe po, a dona dike yé ni deanana alọwle towe.
Nugbo: Biblu plọnmẹ dọ kanṣiṣa alọwle tọn yin nujọnu taun hú haṣinṣan whẹndo tọn devo depope. Jenẹsisi 2:24 dọmọ: “Sunnu na jo otọ́ etọn po onọ̀ etọn po do bo na sẹbọdo asi etọn go.” (Matiu 19:4, 5) Nugbo wẹ dọ alọwlemẹ lẹ sọgan nọ mọaleyi sọn ayinamẹ mẹjitọ kavi hagbẹ whẹndo tọn devo lẹ tọn mẹ. (Howhinwhẹn lẹ 23:22) Ṣigba, asu po asi po de tindo jlọjẹ nado ze dogbó dai gando obá he mẹ hẹnnumẹ lẹ sọgan nọ donù whẹho alọwle yetọn tọn lẹ mẹ jẹ go.—Matiu 19:6.
Pọndohlan agọ̀: Otọ́ towe po onọ̀ towe po tindo aṣẹpipa do jiwe jẹ obá godo tọn mẹ.
Nugbo: Dile etlẹ yindọ Jiwheyẹwhe na aṣẹpipa mẹjitọ lẹ to whẹndo mẹ, aṣẹpipa gbẹtọvi tọn lẹpo wẹ tindo dogbó—e ma gán yitẹn to aṣẹpipa Jiwheyẹwhe tọn si gbede. Di apajlẹ, to whenue whẹdatẹn daho de degbe dọ devi Jesu tọn lẹ ni vẹtolina Jiwheyẹwhe, yé gblọn dọ: “Míwlẹ dona setonuna Jiwheyẹwhe taidi ogán kakati nido yin gbẹtọ lẹ.” (Owalọ lẹ 5:27-29) Mọdopolọ, ovi lẹ nọ setonuna mẹjitọ yetọn lẹ “to kọndopọ mẹ hẹ Oklunọ,” enẹ wẹ, to nuhe ma jẹagọdo osẹ́n Jiwheyẹwhe tọn lẹpo mẹ.—Efesunu lẹ 6:1.
Pọndohlan agọ̀: Gbégbigbòna otọ́ towe po onọ̀ towe po na biọ dọ a ni kẹalọyi nuyise sinsẹ̀n yetọn tọn lẹ.
Nugbo: Biblu dotuhomẹna mí nado dindona nuhe yè to pinplọn mí lẹ nado yọnẹn eyin nugbo wẹ. (Owalọ lẹ 17:11; 1 Johanu 4:1) Mẹhe basi dodinnanu mọnkọ de sọgan wá de nado hodo sinsẹ̀n he gbọnvona mẹjitọ etọn lẹ tọn. Biblu donù devizọnwatọ nugbonọ Jiwheyẹwhe tọn susu he ma hodo sinsẹ̀n mẹjitọ yetọn lẹ tọn go, delẹ to yé mẹ wẹ Ablaham, Luti po apọsteli Paulu po.—Jọṣua 24:2, 14, 15; Luti 1:15, 16; Galatianu lẹ 1:14-16, 22-24.
Pọndohlan agọ̀: Nado gbògbéna otọ́ towe po onọ̀ towe po, a dona nọ tindo mahẹ to aṣa sinsẹ̀n-bibasi hlan tọgbó lẹ tọn mẹ.
Nugbo: Biblu dọmọ: “Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.” (Luku 4:8) Mẹhe nọ basi sinsẹ̀n hlan tọgbó yetọn lẹ to homẹhẹngblena Jiwheyẹwhe. Humọ, Biblu plọnmẹ dọ “oṣiọ lẹ ma yọ́n nudepope.” Yé ma nọ doayi gbégbò depope he yin nina yé go; mọjanwẹ yé masọ sọgan gọalọ kavi gbleawuna mẹhe togbẹ̀ lẹ do niyẹn.—Yẹwhehodọtọ 9:5, 10; Isaia 8:19.
A Gán Sọ Pọ́n Hosọ Ehelẹ
ZẸẸMẸ WEFỌ BIBLU TỌN LẸ TỌN
Zẹẹmẹ Eksọdusi 20:12 Tọn—“Gbògbéna Otọ́ Towe po Onọ̀ Towe Po”
Na e yí opagbe de dogọ gbedide enẹ wutu, Jiwheyẹwhe na yé whẹwhinwhẹ́n devo dogọ nado setonuna gbedide lọ.
KANBIỌ HE JỌJA LẸ NỌ KANSE
Nawẹ N’Sọgan Nọ Jijọho mẹ hẹ Mẹjitọ Ṣie lẹ Gbọn?
Ayinamẹ atọ́n delẹ die he sọgan gọalọna we nado dapana gbemanọpọ delẹ podọ ayinamẹ ehelẹ nasọ gọalọna we ma nado hẹn nulẹ vantan to whenue gbemanọpọ lẹ tlẹ fọ́n.
GBLỌNDO NA KANBIỌ SINAI DO BIBLU JI LẸ
Etẹwẹ Biblu Dọ Gando Nukunpipedo Mẹjitọ Mẹhomẹ lẹ Go?
Biblu bẹ apajlẹ sunnu po yọnnu po yisenọ delẹ tọn hẹn he wàmọ. E sọ na ayinamẹ dagbe delẹ he sọgan gọalọna nukunpedomẹgotọ lẹ.
