Kaini, he yin ovi mẹho asu po asi po tintan lọ tọn, dà dopo to nọviyọnnu etọn lẹ mẹ kavi hẹnnumẹ sẹpọmẹ devo. Mí sọgan wá tadona ehe kọ̀n eyin mí gbadopọnna nuhe Biblu dọ gando Kaini po whẹndo etọn po go.

Nugbo delẹ gando Kaini po whẹndo etọn po go

•   Gbẹtọvi lẹpo wẹ yin kúnkan Adam po Evi po tọn. Jiwheyẹwhe “hẹn akọta gbẹtọ tọn lẹpo wá sọn mẹdopo [Adam] mẹ, nado nọ nọ̀ nukunmẹ aigba tọn pete ji.” (Owalọ lẹ 17:26) Asi Adam tọn, Evi lẹzun “onọ̀ mẹhe tin togbẹ̀ lẹpo tọn.” (Jenẹsisi 3:20) Enẹwutu, Kaini na ko dà mẹhe wá sọn kúnkan Adam po Evi po tọn mẹ di ewọ.

•   Kaini po nọvisunnu etọn Abẹli po wẹ yin tintan to ovi susu he Evi ji lẹ mẹ. (Jenẹsisi 4:1, 2) To whenue Kaini hù nọvisunnu etọn bo yin yinyan dogbé, e wule dọmọ: “Mẹdepope he pé mi na hù mi.” (Jenẹsisi 4:14) Mẹnu lẹ wẹ Kaini to budina? Biblu dọ dọ Adam sọ “ji visunnu lẹ po viyọnnu lẹ po.” (Jenẹsisi 5:4) E họnwun dọ kúnkan Adam po Evi po tọn ehelẹ wẹ Kaini na ko to budina.

•   Aṣa lọ nado dà hẹnnumẹ mẹtọn gbayipe to bẹjẹeji whenuho gbẹtọvi tọn. Di apajlẹ, dawe nugbonọ lọ Ablaham dà nọviyọnnu daa etọn. (Jenẹsisi 20:12) Anademẹ tintan he jẹagọdo alọwle mọnkọtọn lẹ sọawuhia to Osẹ́n Mose tọn mẹ, ehe yin nina owhe kanweko susu lẹ to okú Kaini tọn godo. (Levitiku 18:9, 12, 13) E taidi dọ to whenẹnu, ovi he hẹnnumẹ sẹpọmẹ he dà yede ji lẹ ma nọ saba tindo oblọ dile e nọ yindo to egbehe.

•   Biblu do kandai he gando Adam, Evi po whẹndo yetọn po go lẹ hia taidi whenuho jọnun de. Nudọnamẹ he todohukanji whẹndo Adam tọn bẹhẹn ma yin mimọ to owe Jenẹsisi tọn he Mose kàn kẹdẹ mẹ gba, ṣigba whenuho-kantọ Ẹzla po Luku po basi kandai etọn ga. (Jenẹsisi 5:3-5; 1 Otànnugbo lẹ 1:1-4; Luku 3:38) Biblu-kantọ lẹ nọ donù otàn Kaini tọn go taidi nuhe jọ nugbonugbo de.​—Heblu lẹ 11:4; 1 Johanu 3:12; Juda 11.