Baa yi yaa moandi leni yi pala kuli yi diegu n baa li pamanli, yii bani yi yema n baa tua maanma saala. O falaciamo cuama baa fidi cedi li pamanli kubima n paagi yipo. (Jaki 4:14) U Tienu buama cedi ke O puuni ti, yaa tundi n baa fidi ki todi ti o falaciamo yogunu. Yi yaa li ŋoa Biibili tundi, baa o falaciamo n de maanma kuli, yinba leni yi diegu niba baa fidi ki moa leni la.

BIIBILI N YEDI YAALA: “Yin tuni wani U Tienu yi yanyagidi kuli, kelima wani o ba n kubi yi.” (Pieli Tikpiali 5:7) Yogunu kuli, yin tiadi ke U Tienu ka wangi yi fala ba. (Jaki 1:13) Yi yaa nagini O, yi baa ba yaa todima n ki pia lie. (Esayi 41:10) “Cuani mani o nintuali yi pala nni maama.”—Pisomi 62:9

Yi yaa cogi ki go bangi Biibili yeni daali kuli, li baa baagi yi. Yi baa bandi ke Jeova “n baagidi ti ti fala kuli nni.” (Korenti Yaaba Tilieli 1:3,4; Loma Yaaba 15:4) O niani ke O baa paa ti “yaa yanduanma, yaama n pendi o nisaalo bandima kuli.”—Filipi Yaaba 4:6,7,13.

ŊAN BAA FIDI KI TIENI YAALA:

• Ŋan jaani ki mia Jeova n todi yi, ŋan baa mi yanduanma leni a yantiaŋanma.

• Ŋan tia ki le, ŋan baa fidi ki tieni yaala, ki ñani yaala n baa paa ŋa ti ñoadi ki cie.

BIIBILI N YEDI YAALA: “O yanfuodaano pugidi o banma, yaaba n pia mi yama mo lingi mi banma.” (Mi Kpanjama 18:15) Yin moandi ki bandi yi diegu nni, yaala n ye yua kuli pali nni, leni yaala n tie tiladi yua kuli po. Yin kali ki boe leni ba ki go cengi ba ŋanma.— Mi Kpanjama 20:5.

Ama yi diegu nilo yaa kpe te? Laa pia i jeje, yin waani yi paabiidili n de maanma. Yin tiadi ke Jesu moko “den buudi.” (Jan 11:35; O Yanfuodaano 3:4) Li pia ti ñoadi yin fuo ŋanma ki go guani ŋanma. (O Yanfuodaano 4:6) Li baa todi yi, yin ŋanbi ki moa leni yi pakili.

ŊAN BAA FIDI KI TIENI YAALA:

• Ŋan moandi fini leni a diegu niba n maani ki yaa boe leni yaba, ke o falaciamo daa cua. Lanwani o falaciamo yaa ti cua, li kaa paa yipo, yin boe leni yaba ba.

• Yin boe leni yaaba n kpa baa yi falaciamo buolu.

BIIBILI N YEDI YAALA: “Danlimoano mo pendi nni naataanuba.” (Mi Kpanjama 18:24) Yi danlinba baa fidi ki yaa bua ki todi yi, ama baa bani ban baa tieni maanma. Yin da ŋmini ba, waani ba, ban baa todi yi maanma. (Mi Kpanjama 12:25) Yi go baa fidi ki mia yaaba n bani Biibili ŋama todima. Bi baa waani yi Biibili nni, yaa tundi n baa todi yi.—Jaki 5:14.

Yi yaa bua ki ba mi todima, li ŋani yin yaa taagi leni yaa niba n daani Jeova leni bi pala kuli, ki go daani ke wan niani yaala kuli baa kua cain. Yi yaa todi yaaba n bua mi todima, li baa paa yi li papaali. Yin waani ba yin daani Jeova maanma ki go daani wan niani tipo yaala yeni. Yin yaa kubi nitoaba, yin da foagidi yi yula leni yaa niba n bua yi ŋamu ki go faadi yi kaanu.— Mi Kpanjama 18:1; Korenti Yaaba Tikpiali 15:58.

ŊAN BAA FIDI KI TIENI YAALA:

• Ŋan maadi leni a danlimoano ki tuo wan todi a.

• Ŋan waani o leni li papienli ŋan bua yaa todima.