Ua noho ʻo Iesū ma ka lani ma ke ʻano he ʻuhane ma mua o kona hānau ʻia ʻana ma ka honua. (Ioane 8:23) ʻO Iesū ka mea mua loa a ke Akua i hana ai, a ua kōkua ʻo ia i ke Akua i ka hana ʻana i nā mea ʻē aʻe a pau. ʻO ia wale nō ka mea a ke Akua i hana ai me ke kōkua ʻole, no laila, ua kapa ʻia ʻo ia ke “kēiki hānau kahi” a ke Akua. (Ioane 7:16) He waha ʻōlelo ʻo Iesū no ke Akua, a, ua aʻo wale ʻo ia i nā mea a ke Akua i haʻi ai iā ia, no laila, ʻo ia ka ʻelele o ke Akua.​—E heluhelu iā Solomona 8:​22, 23, 30; Kolosa 1:​15, 16.

Ua hoʻouna ke Akua iā Iesū i ka honua. Ua hoʻokomo ʻo ia i kona ola, mai ka lani mai, i loko o ka ʻōpū o kekahi wahine Iudaio; ʻo Maria kona inoa. No laila ʻaʻohe o Iesū makua kāne kanaka. (Luka 1:​30-35) Ua hele mai ʻo Iesū i ka honua (1) e aʻo i ka ʻoiaʻiʻo no ke Akua (2) e hōʻike iā kākou i ke ʻano pololei e hana ai i ka makemake o ke Akua i loko o ka pilikia, a (3) e hāʻawi i kona ola hemolele ma ke ʻano he “kumu hoʻōla.”​—E heluhelu iā Mataio 20:28.

ʻO ke kalahala ke kumukūʻai no ka hoʻokuʻu ʻana i kekahi, i ʻole ʻo ia e make. (Puka ʻana 21:​29, 30) ʻAʻole ka make a me ke oʻo ka makemake o ke Akua no nā kānaka. Pehea kākou e ʻike ai i kēia? Ua haʻi ke Akua iā ʻAdamu ke kanaka mua loa, inā e hana hewa ana ʻo ia, e make ana ʻo ia. No laila, inā ʻaʻole ʻo ia hana hewa, ʻaʻole ʻo ia e make. (Kinohi 2:​16, 17; 5:5) Wahi a ka Paipala, ua puka ka make i ke ao ma o ʻAdamu. No  laila, ua hoʻoili ʻo ʻAdamu i ka hewa a me ka make i kona mau mamo a pau. Pono kākou i ke kumu hoʻōla e hoʻokuʻu iā kākou mai ka hopena o ka hana hewa a ʻAdamu, ka make.​—E heluhelu iā Roma 5:12; 6:23.

ʻO wai ke uku i ke kumu hoʻōla i mea e hoʻokuʻu ai iā kakou mai ka make? Ke make kākou, uku kākou no kā kākou hewa wale iho nō. ʻAʻole hiki i ke kanaka hemolele ʻole ke uku no nā hewa a kekahi.​—E heluhelu iā Halelū 49:​7-9.

He kanaka hemolele ʻo Iesū. No laila, ʻaʻole ʻo ia i make ma muli o kāna hana hewa—ʻaʻole ʻo ia i hana hewa. Akā naʻe, ua make ʻo ia no nā hana hewa a nā kānaka a pau. Ua hoʻouna ke Akua iā Iesū e make no kākou ma muli o kona aloha nui no nā kānaka. Ua hōʻike ʻo Iesū i kona aloha nui iā kākou i kāna hoʻolohe ʻana i kona makua a i kāna hāʻawi ʻana i kona ola no kā kākou lawehala.​—E heluhelu iā Ioane 3:16; Roma 5:​18, 19.

E nānā i ka wikiō No ke Aha i Make ai ʻo Iesū?

I kona wā ma ka honua, ua hoʻōla ʻo Iesū i ka poʻe maʻi, a ua hoʻāla hou ʻo ia i ka poʻe make, a ua hoʻopakele nō ʻo ia i ka poʻe pōʻino. No Laila, ua hōʻike ʻo ia i kāna hana i ka wā e hiki mai ana no ka poʻe. (Mataio 15:​30, 31; Ioane 5:28) Ma hope o ka make ʻana o Iesū, ua hoʻāla ke Akua iā ia ma ke ʻano he mea ʻuhane ma ka lani. (1 Petero 3:18) Ua kali ʻo ia i ka lima ʻākau o ke Akua a hiki i kona poni ʻia ʻana i aliʻi ma luna o ka honua a pau. (Hebera 10:​12, 13) I kēia manawa, ke noho aliʻi nei ʻo Iesū i ka lani a ke haʻi nei kāna poʻe haumāna i ka nū hou maikaʻi a puni ka honua.​—E heluhelu iā Daniʻela 7:​13, 14; Mataio 24:14.

E hoʻopau ana ʻo Iesū i nā ʻeha a pau o kākou, a e hoʻopau hoʻi i ka poʻe hōʻeha i nā kānaka ʻē aʻe. ʻO ka poʻe a pau e hoʻolohe ana iā Iesū, e hauʻoli ana lākou i ke ola mau loa ma ka paradaiso o ka honua nei.​—E heluhelu iā Halelū 37:​9-11.