pehala raja 15:1-34
15 abeeyam jab yahooda ka raja bana tab nabat ke bete yaarobam ke raaj ka 18vaan saal chal raha tha.+
2 abeeyam ne yarooshalem mein rehkar teen saal raaj kiya. uski maa ka naam maaka tha,+ jo abeeshalom ki naatin thi.
3 abeeyam ne saari zindagi vahi paap kiye jo usse pehale uske pita ne kiye the. abeeyam ka dil apne parmeshvar yahova par poori tarah nahin laga raha, jaise uske purkhe daavid ka dil laga raha tha.
4 fir bhi daavid ke parmeshvar yahova ne daavid ki khaatir+ yarooshalem mein uska deeya jalne diya.+ parmeshvar ne uske bete ko raja thehraya aur yarooshalem ko bane rehne diya.
5 yahova ne aisa isliye kiya kyonki daavid ne parmeshvar ki nazar mein sahi kaam kiye the. usne zindagi-bhar parmeshvar ki sabhi aagyayen maanin, kabhi uske niyamon se nahin hata, bas ek baar hitti uriyah ke maamle mein woh chook gaya tha.+
6 jab tak rahoobiyam zinda tha tab tak uske aur yaarobam ke beech yuddh chalta raha.+
7 abeeyam ki zindagi ki baaki kahani, uske sabhi kaamon ka byaura yahooda ke raajaon ke itihas ki kitab mein likha hai.+ abeeyam aur yaarobam ke beech bhi yuddh chalta raha.+
8 fir abeeyam ki maut ho gayi* aur use daavidpur mein dafnaya gaya. abeeyam ki jagah uska beta aasa+ raja bana.+
9 jab aasa ne yahooda par raaj karna shuroo kiya tab israel mein raja yaarobam ke raaj ka 20vaan saal chal raha tha.
10 aasa ne yarooshalem mein 41 saal raaj kiya. uski daadi ka naam maaka tha,+ jo abeeshalom ki naatin thi.
11 aasa ne apne purkhe daavid ki tarah vahi kiya jo yahova ki nazar mein sahi tha.+
12 usne desh se un aadmiyon ko nikaal diya jo mandiron mein doosre aadmiyon ke saath sambhog karte the.+ usne woh saari ghinauni moortein* bhi hata di jo uske purkhon ne banvayi thi.+
13 yahaan tak ki usne apni daadi maaka+ ko raajmata ke pad se hata diya kyonki maaka ne pooja-laath* ki upasna ke liye ek ashleel moorat khadi karvayi thi. aasa ne uski ashleel moorat kaat daali+ aur use kidron ghaati mein jala diya.+
14 magar unchi jagah nahin mitayi gayin.+ fir bhi aasa ka dil saari zindagi yahova par poori tarah laga raha.
15 woh yahova ke bhavan mein woh saara sona, chaandi aur doosri cheezen le aaya jo usne aur uske pita ne pavitra thehrayi thi.+
16 aasa aur israel ke raja baasha+ ke beech lagatar yuddh chalta raha.
17 israel ke raja baasha ne yahooda par hamla bol diya. woh raamah+ ko banane* laga taaki na to uske yahaan se koi yahooda ke raja aasa ke ilake mein jaa sake aur na vahaan se koi yahaan aa sake.*+
18 tab aasa ne yahova ke bhavan ke khazane aur raajmahal ke khazane ka bacha hua saara sona-chaandi liya aur apne sevkon ke haath seeriya ke raja+ ben-hadad ke paas bheja. ben-hadad, tabrimmon ka beta aur hejyon ka pota tha aur woh damishk mein rehta tha. aasa ne ben-hadad ke paas yah sandesh bheja:
19 “jaise tere pita aur mere pita ke beech sandhi* thi vaise hi hum donon ke beech bhi sandhi hai. dekh, main tere liye tohfe mein sona-chaandi bhej raha hoon. tu aakaar israel ke raja baasha ke saath apni sandhi tod de. tab woh mera ilaka chhodkar chala jaayega.”
20 ben-hadad ne raja aasa ki baat maan li aur apne senapatiyon ko israel ke shehron par hamla karne bheja. unhonne jaakaar iyyon,+ daan,+ aabel-bet-maaka aur poore kinneret ko aur naptali ke poore ilake ko naash kar diya.
21 jab iski khabar baasha ko mili to usne raamah ko banane* ka kaam fauran rok diya aur tirsa+ mein rehne laga.
22 fir raja aasa ne yahooda ke sabhi logon ko bulvaya, kisi ko bhi chhoot nahin di. aur woh raamah se woh saare patthar aur shahteerein uthakar le gaye jinse baasha, raamah shehar bana raha tha. un cheezon se raja aasa ne mispa shehar+ aur binyameen ke ilake ke geba shehar+ banaye.*
23 aasa ki zindagi ki baaki kahani, uske sabhi bade-bade kaam, usne jo-jo shehar banvaye,* un sabka byaura yahooda ke raajaon ke itihas ki kitab mein likha hai. magar budhape mein aasa ke pairon mein kuch beemari ho gayi jisse use bahot takaleef sahni padi.+
24 fir aasa ki maut ho gayi* aur use uske purkhe daavid ke shehar daavidpur mein purkhon ki kabraa mein dafnaya gaya. uski jagah uska beta yahoshapat+ raja bana.
25 yahooda ke raja aasa ke raaj ke doosre saal, yaarobam ka beta naadab+ israel ka raja bana. usne israel par do saal raaj kiya.
26 naadab yahova ki nazar mein bure kaam karta raha. woh apne pita ke hi nakshe-kadam par chala+ aur usne vahi paap kiya jo uske pita ne kiya tha aur israel se bhi karvaya tha.+
27 baasha ne, jo issakar gotra ke ahiyah ka beta tha, naadab ke khilaf saazish ki. jab naadab aur poora israel palishti shehar gibbaton+ ki gherabandi kiye huye tha, to us dauran baasha ne naadab ko gibbaton mein maar daala.
28 is tarah baasha, naadab ko maarkar khud raja ban baitha. yah ghatna yahooda ke raja aasa ke raaj ke teesre saal mein hui thi.
29 baasha jaise hi raja bana usne yaarobam ke poore gharane ka safaya kar diya, ek ko bhi zinda nahin chhoda. is tarah yahova ka woh vachan poora hua jo usne sheelo ke rehnevale apne sevak ahiyah se kehalvaya tha.+
30 aisa isliye hua kyonki yaarobam ne paap kiye aur israel se paap karvaye the aur israel ke parmeshvar yahova ka krodh bhadkaya tha.
31 jahaan tak naadab ki baat hai uski zindagi ki baaki kahani, uske sabhi kaamon ka byaura israel ke raajaon ke itihas ki kitab mein likha hai.
32 aasa aur israel ke raja baasha ke beech lagatar yuddh chalta raha.+
33 ahiyah ka beta baasha jab poore israel ka raja bana tab yahooda mein raja aasa ke raaj ka teesra saal chal raha tha. baasha ne israel ke tirsa mein rehkar 24 saal raaj kiya.+
34 magar woh yahova ki nazar mein bure kaam karta raha.+ woh yaarobam ke nakshe-kadam par chala aur usne vahi paap kiya jo yaarobam ne kiya tha aur israel se bhi karvaya tha.+
kai footnote
^ shaa., “apne purkhon ke saath so gaya.”
^ inka ibrani shabd shaayad “mal” ke liye istemal honevale shabd se sambandh rakhta hai aur yah batane ke liye istemal hota hai ki kisi cheez se kitni ghin ki jaa rahi hai.
^ shaa., “koi yahooda ke raja aasa ke paas aane-jaane na paaye.”
^ ya “mazboot karne; dobara banane.”
^ ya “karar.”
^ ya “mazboot karne; dobara banane.”
^ ya “mazboot kiye; dobara banaye.”
^ ya “mazboot kiye; dobara banaye.”
^ shaa., “apne purkhon ke saath so gaya.”
