HULYO 30, 2024
JAPAN
Nagpartisipar ang mga Saksi Halin sa Pito ka Pungsod sa Special Preaching Campaign sa Osaka kag Tokyo sa Japan
Halin sang Mayo 13 asta Hunyo 2, 2024, linibo ka mga Saksi ni Jehova sa Japan ang nagpartisipar sa isa ka special preaching campaign sa siudad sang Osaka kag Tokyo sa Japan. Dugang pa, mga 350 ka Saksi halin sa Australia, Canada, France, Germany, New Zealand, South Korea, kag United States ang gin-agda para suportahan ini nga kampanya.
Sa kabilugan, may sobra 15 ka milyon ka tawo ang nagaistar sa Tokyo kag Osaka. Updanay nga nagbantala ang mga kauturan didto kag ang mga kauturan nga halin sa lain nga mga pungsod sa sarisari nga porma sang pagministeryo. Madamo gid sila sang naistorya kag nasugdan nila ang pila ka Bible study.
Isa ka sister halin sa Australia upod sa isa ka sister sa Japan sa tion sang kampanya
Samtang naga-cart, nangamuyo ang isa ka sister nga tani makaistorya sia sa isa ka tawo nga interesado magpa-Bible study. Wala madugay, nagpalapit ang isa ka lalaki nga nagsiling nga gusto niya makatuon sing dugang parte sa Biblia. Bangod Chinese ang lenguahe sang lalaki, ginpangabay sang sister ang isa ka brother nga nagahambal sang Chinese nga bisitahan ato nga lalaki. Nag-attend ang lalaki sa miting sa kongregasyon pagligad lang sang duha ka adlaw sa tapos sila nakaistoryahanay.
Samtang nagapamalaybalay, ang isa ka sister nakapakig-istorya sa babayi nga nagpasugot nga magtan-aw sang video nga Ngaa Dapat Tun-an ang Biblia? Pagkatapos matan-aw ang video, ang babayi nagsiling, “Pareho gid sa mga pamangkot sa video ang ginapaligban ko!” Nagpasugot sia nga magpa-Bible study kag nag-attend sia dayon sa miting sang kongregasyon upod sa sister.
Mga kauturan halin sa Honmachi Congregation sa Osaka upod sa mga bisita sa isa ka reception diin gina-welcome nila ang mga boluntaryo sa pag-umpisa sang special preaching campaign (SPC)
Bangod sini nga kampanya, mas nakilala pa gid sang mga kauturan halin sa sarisari nga lugar sa kalibutan ang isa kag isa kag nakapalig-unanay sila. Si Aika, isa ka 20 anyos nga sister halin sa Tatsuno, Japan, nagsiling: “Indi ko gid malipatan ini nga eksperiensia. Nagapasalamat gid ako kay Jehova nga gintugutan niya ako nga makapartisipar sa sini nga kampanya.” Ang isa ka gulang didto nga si Akihiro nagsiling: “Napalig-on gid kami kay nakaupod namon sa pagbantala ang amon mga kauturan halin sa iban nga mga pungsod. Mas nangin makalilipay gid ang amon pagministeryo.”
Nagapasalamat gid kita sa madamo nga kauturan didto kag sa mga boluntaryo halin sa iban nga mga pungsod nga ‘naghalad sing kinabubut-on sang ila kaugalingon’ para sa sini nga special preaching campaign kag “naghugyaw sa pagdayaw kay Jehova.”—Salmo 110:3; Esdras 3:11.