Halin sang Septiembre 1 asta 3, 2023, nagtipon ang mga kauturan nga nagahambal sang Romany (Romania) para sa 2023 nga “Mangin Mapinasensiahon”! nga Rehiyonal nga Kombension. Bisan pa nga may mga kombension naman nga ginhiwat sa iban nga lenguahe sang Romany, amo ini ang una nga face-to-face nga kombension nga ginhiwat sa Romany (Romania). May 1,353 nga nag-attend sa programa halin sa Austria, Belgium, France, Germany, Great Britain, Italy, Moldova, kag Romania sa Assembly Hall sa Turda, Romania. Beinte-seis ang nabawtismuhan.

Si Brother Gage Fleegle, nga miembro sang Nagadumala nga Hubon, ang naghatag sang katapusan nga pamulongpulong kada adlaw sang kombension. Ginpadaku ni Brother Fleegle ang pinasahi nga paghiusa sang katawhan sang Dios subong kag ginpalig-on niya ang mga nag-attend nga padayon nga alagaron si Jehova sing mapinasensiahon kag nahiusa. Dugang pa sa mga nag-attend sa Romany (Romania) nga kombension, halos 900 ang nag-attend sa duha pa ka kombension nga ginhiwat sa Romanian nga lenguahe kag Romanian Sign Language nga naka-tie in paagi sa videoconference sa katapusan nga pamulongpulong kada adlaw.

Ang isa ka brother nga nagahambal sang Romany (Romania) nagsiling: “Indi gid ini namon malimtan! Daku gid ini nga pagpakamaayo halin kay Jehova nga nakahiwat kami sang rehiyonal nga kombension sa amon lenguahe!” Si Iraklis Exarcheas, nga isa ka manugtatap sang sirkito nga nagahambal sang Romany (Romania), nagsiling: “Sigurado gid ako nga ini nga kombension nakatandog sa tagipusuon kag hunahuna sang madamo nga nagahambal sang Romany (Romania) nga nag-attend. Ang programa nakabulig para maintiendihan namon nga ang Dios nagaulikid gid sa tanan nga tawo. Kanami gid nga regalo halin kay Jehova!”

Nalipay kita para sa aton mga kauturan nga nagahambal sang Romany (Romania) nga nagtipon para dayawon si Jehova kag magpatudlo sa iya sa sini nga kombension.—Salmo 26:12