Nagdayaw ang mga opisyal nga nagadumala sa mga lugar nga ginahiwatan sang kombension sa South Korea bangod sa desisyon sang aton organisasyon nga hiwaton ang aton 2020 nga kombension paagi sa videoconference imbes nga sa dalagku nga mga stadyum. Ginkomendahan kita sang mga opisyal sa aton panikasog nga maproteksionan ang ikaayong lawas sang publiko samtang padayon naton nga ginahimo ang aton naiskedyul nga programa sang pagtudlo nga base sa Biblia. Ginbalik na ang tanan nga deposito nga ginbayad sa sini nga mga tilipunan.

Ang isa ka opisyal sang isa ka pasilidad sa Seoul nagsiling: “Kabalo gid kami nga mangin maalamon ang desisyon sang mga Saksi ni Jehova. Nanamian gid kami sa mga Saksi. Bilang miembro sang komunidad, ginapensar ko kon may ara pa bala iban nga relihion nga amo sini kadaku ang ginabulig sa komunidad.” Nagpaathag sia: “Ginauna sang mga Saksi ni Jehova ang kaayuhan sang iban. Nasubuan kami nga indi sila makahiwat sang ila kombension sa amon pasilidad subong nga tuig. Tani gamiton nila liwat ang amon pasilidad para sa ila sunod nga kombension.”

Sa Suwon, ang opisyal sang isa ka pasilidad nagsiling: “Nagapasalamat gid ako sa mga Saksi ni Jehova kay sa sulod sang 35 ka tuig, ginhalungan gid nila ang amon pasilidad nga daw ila man ini. Pero mas nagapasalamat na gid ako sa ila subong kay ginasunod nila ang mga desisyon sang gobierno para indi maglapta ang COVID-19. Nagdayaw gid ako kay ginapamensar gid nila ang kaayuhan sang iban. Ginapaabot ko nga makagamit liwat ang mga Saksi ni Jehova sang amon pasilidad sa sunod nga tuig.”

Ang isa ka opisyal sang erport nga malapit sa ginahiwatan sang kombension nagsiling: “Sang 2018 kag 2019, nakita namon kon daw ano ka organisado [sang mga Saksi ni Jehova] kag kon daw ano sila kadasig magtuman sang amon mga pangabay. Mahimo gid nga ginpamensar nila ang kaayuhan sang iban amo nga nagdesisyon sila nga indi na lang pagdayunon ang ila kombension diri sa amon stadyum sini nga tuig. Dalayawon gid ang ila ginhimo.” Nagdugang pa sia: “Kanami gid tani kon pareho lang sa mga Saksi ang tanan nga tawo.”

Bilang katawhan ni Jehova, nagapasalamat gid kita kay gintudluan kita nga magpakita sang gugma sa tanan, kag ina nga gugma makita gid sa sining mabudlay nga tion.—Mateo 22:39.