Deuteronomio 12:1-32
12 “Amo ini ang mga pagsulundan kag ang mga kasuguan nga dapat gid ninyo tumanon sa tanan nga adlaw nga nagakabuhi kamo sa duta nga ginahatag ni Jehova nga Dios sang inyo mga katigulangan nga panag-iyahan ninyo.
2 Laglagon gid ninyo ang tanan nga lugar diin ang mga pungsod nga sakupon ninyo nagaalagad sa ila mga dios,+ sa mataas nga mga bukid ukon sa mga bakulod ukon sa idalom sang madabong nga kahoy.
3 Gub-on ninyo ang ila mga halaran, pang-utdon ang ila sagrado nga mga haligi,+ sunugon ang ila sagrado nga mga poste,* dugmukon ang tinigib nga mga imahen sang ila mga dios,+ kag panason ninyo ang ila mga ngalan sa sina nga lugar.+
4 “Indi ninyo pagsimbahon si Jehova nga inyo Dios sa sina nga paagi.+
5 Sa baylo, pangitaa ninyo si Jehova nga inyo Dios sa bisan diin nga lugar sa tunga sang tanan ninyo nga tribo nga pilion niya nga ibutang ang iya ngalan kag ang iya puluy-an, kag magkadto kamo didto.+
6 Dalhon ninyo didto ang inyo mga dulot nga sinunog,+ ang inyo mga halad, ang inyo mga ikanapulo,+ ang inyo amot,+ ang inyo mga dulot tungod sa panaad, ang inyo kinabubut-on nga mga dulot,+ kag ang panganay sang inyo mga karnero kag sang iban pa ninyo nga kasapatan.+
7 Didto kamo kag ang inyo mga panimalay magkaon sa atubangan ni Jehova nga inyo Dios+ kag magkalipay kamo sa tanan ninyo nga buluhaton,+ bangod ginpakamaayo kamo ni Jehova nga inyo Dios.
8 “Indi ninyo paghimuon ang tanan nga ginahimo naton diri subong nga adlaw, nga ang kada isa nagahimo kon ano sa banta niya ang husto,*
9 bangod wala pa kamo mag-abot sa lugar nga palahuwayan+ kag sa palanublion nga ginahatag sa inyo ni Jehova nga inyo Dios.
10 Kon magtabok na kamo sa Jordan+ kag mag-istar sa duta nga ginahatag sa inyo ni Jehova nga inyo Dios agod panag-iyahan ninyo, hatagan niya kamo sing kalinong batok sa tanan ninyo nga kaaway sa palibot, kag magakabuhi kamo nga wala sing katalagman.+
11 Dalhon ninyo ang tanan nga ginasugo ko sa inyo sa lugar nga pilion ni Jehova nga inyo Dios nga ibutang ang iya ngalan.+ Dalhon ninyo didto ang inyo mga dulot nga sinunog, ang inyo mga halad, ang inyo mga ikanapulo,+ ang inyo amot, kag ang tanan nga dulot nga ginpanaad ninyo kay Jehova.
12 Magakasadya kamo sa atubangan ni Jehova nga inyo Dios,+ kamo kag ang inyo mga anak nga lalaki, ang inyo mga anak nga babayi, ang inyo mga ulipon nga lalaki kag babayi, kag ang mga Levinhon nga yara sa sulod sang inyo mga siudad,* kay wala sila ginhatagan sing parte ukon palanublion sa tunga ninyo.+
13 Mag-andam kamo nga indi ninyo pag-ihalad ang inyo mga dulot nga sinunog sa iban nga lugar nga inyo makita.+
14 Dapat ninyo ihalad ang inyo mga dulot nga sinunog sa lugar nga pilion ni Jehova sa isa sang mga teritoryo sang inyo tribo, kag didto ninyo himuon ang tanan nga ginasugo ko sa inyo.+
15 “Apang kon luyag ninyo* magkaon sing karne, mahimo kamo mag-ihaw kag magkaon sing karne+ sa tanan ninyo nga siudad* suno sa pagpakamaayo nga ginahatag sa inyo ni Jehova nga inyo Dios. Ang tawo nga indi matinlo kag ang tawo nga matinlo makakaon sini, pareho sang pagkaon nila sang gasela kag sang usa.
16 Apang indi ninyo pagkaunon ang dugo;+ iula ninyo ini sa duta pareho sang tubig.+
17 Wala kamo ginatugutan nga kaunon sa sulod sang inyo mga siudad* ang ikanapulo nga bahin sang inyo uyas, sang inyo bag-o nga alak, kag sang inyo lana. Indi man ninyo pagkaunon sa sulod sang inyo siudad ang panganay sang inyo mga karnero kag sang inyo iban pa nga kasapatan,+ ang inyo dulot tungod sa panaad, ang inyo kinabubut-on nga mga dulot, ukon ang inyo amot.
18 Magkaon kamo sini sa atubangan ni Jehova nga inyo Dios sa lugar nga pilion ni Jehova nga inyo Dios,+ kamo kag ang inyo anak nga lalaki, ang inyo anak nga babayi, ang inyo alagad nga lalaki kag babayi, kag ang Levinhon nga yara sa sulod sang inyo mga siudad;* kag magkasadya kamo sa atubangan ni Jehova nga inyo Dios sa tanan ninyo nga buluhaton.
19 Mag-andam kamo nga indi ninyo pagpabay-an ang Levinhon+ samtang nagakabuhi kamo sa inyo duta.
20 “Kon palaparon na ni Jehova nga inyo Dios ang inyo teritoryo+ suno sa ginsaad niya sa inyo,+ kag masiling kamo, ‘Gusto namon magkaon sing karne,’ bangod luyag ninyo* magkaon sing karne, mahimo kamo makakaon sing karne kon luyag ninyo himuon ini.*+
21 Kon malayo sa inyo ang lugar nga pilion ni Jehova nga inyo Dios nga ibutang ang iya ngalan,+ ihawon ninyo ang pila sang inyo mga karnero ukon ang pila sang iban ninyo nga kasapatan nga ginhatag ni Jehova sa inyo, suno sa ginsugo ko sa inyo, kag dapat ninyo kaunon ang karne sa sulod sang inyo mga siudad* kon luyag ninyo* magkaon sini.
22 Kaunon ninyo ini pareho sang pagkaon ninyo sang gasela kag sang usa;+ ang tawo nga indi matinlo kag ang tawo nga matinlo makakaon sini.
23 Apang manindugan gid kamo nga indi ninyo pagkaunon ang dugo,+ bangod ang dugo amo ang kabuhi*+ kag indi ninyo pagkaunon ang kabuhi* upod sa unod.
24 Indi ninyo pagkaunon ini. Iula ninyo ini sa duta pareho sang tubig.+
25 Indi ninyo pagkaunon ini, agod mangin maayo ang kahimtangan ninyo kag sang inyo mga anak, bangod ginahimo ninyo ang matarong sa panulok ni Jehova.
26 Ang inyo balaan nga mga butang kag ang inyo mga dulot tungod sa panaad amo lang ang dalhon ninyo kon magkadto kamo sa lugar nga pilion ni Jehova.
27 Ihalad ninyo didto ang inyo mga dulot nga sinunog, ang unod kag ang dugo,+ sa halaran ni Jehova nga inyo Dios, kag ang dugo sang inyo mga halad dapat iula sa halaran+ ni Jehova nga inyo Dios, apang ang unod mahimo ninyo kaunon.
28 “Mag-andam kamo nga tumanon ninyo ining tanan nga ginasugo ko sa inyo, agod mangin maayo pirme ang kahimtangan ninyo kag sang inyo mga anak, bangod ginahimo ninyo ang maayo kag matarong sa panulok ni Jehova nga inyo Dios.
29 “Kon laglagon na ni Jehova nga inyo Dios ang mga pungsod nga sakupon ninyo,+ kag nagaistar na kamo sa ila duta,
30 mag-andam kamo nga indi kamo masiod pagkatapos sila malaglag. Indi kamo magpamangkot tuhoy sa ila mga dios, ‘Paano sadto ginaalagad sini nga mga pungsod ang ila mga dios? Amo man sini ang himuon naton.’+
31 Indi ninyo paghimuon ini kay Jehova nga inyo Dios, kay ginhimo nila sa ila mga dios ang tanan nga makangilil-ad nga butang nga ginakaugtan ni Jehova, kay bisan ang ila mga anak nga lalaki kag ang ila mga anak nga babayi ginsunog nila para sa ila mga dios.+
32 Ang tanan nga ginasugo ko sa inyo amo lang ang sundon ninyo.+ Indi ninyo ini pagdugangan ukon pagbuhinan.+
Footnote
^ Ukon “kon ano ang husto sa iya panulok.”
^ Sa literal, “gawang.”
^ Sa literal, “sa sulod sang tanan ninyo nga gawang.”
^ Ukon “kon luyag gid sang inyo kalag.”
^ Sa literal, “gawang.”
^ Sa literal, “gawang.”
^ Ukon “sang inyo kalag.”
^ Ukon “kon luyag gid ini sang inyo kalag.”
^ Sa literal, “gawang.”
^ Ukon “kon luyag gid sang inyo kalag.”
^ Ukon “kalag.”
^ Ukon “kalag.”
