Salmo 135:1-21
135 Dayawa ninyo si Jah!*
Dayawa ninyo ang ngalan ni Jehova;Dayawa ninyo sia, kamo nga mga alagad ni Jehova,+
2 Kamo nga nagatindog sa balay ni Jehova,Sa mga luwang sang balay sang aton Dios.+
3 Dayawa ninyo si Jah, kay si Jehova maayo.+
Mag-amba sing mga pagdayaw* sa iya ngalan, kay maayo ini nga himuon.
4 Kay ginpili ni Jah si Jacob,Ang Israel subong iya hamili nga katawhan.*+
5 Kay nakahibalo gid ako nga si Jehova gamhanan;Ang aton Ginuo labaw sa tanan nga dios.+
6 Ginahimo ni Jehova ang tanan nga luyag niya+Sa langit kag sa duta, sa dagat kag sa kadadalman sini.
7 Ginapapaibabaw niya ang mga panganod* halin sa pinakamalayo nga bahin sang duta;Sia ang nagahimo sang kilat nga nagaupod sa ulan;Ginapagua niya ang hangin halin sa iya mga talaguan.+
8 Ginpatay niya ang mga panganay sang Egipto,Sang tawo kag sang sapat.+
9 Nagpadala sia sa Egipto sing mga tanda kag mga milagro,+Batok sa Paraon kag sa tanan niya nga alagad.+
10 Ginlaglag niya ang madamo nga pungsod+Kag ginpatay niya ang gamhanan nga mga hari+
11 —Si Sihon nga hari sang mga Amornon,+Si Og nga hari sang Basan,+Kag ang tanan nga ginharian sang Canaan.
12 Ginhatag niya ang ila duta subong palanublion,Palanublion sang Israel nga iya katawhan.+
13 O Jehova, ang imo ngalan magapabilin sa wala sing katubtuban.
O Jehova, ang imo kabantugan* magapabilin sa tanan nga kaliwatan.+
14 Kay pangapinan* ni Jehova ang iya katawhan,+Kag magakaluoy sia* sa iya mga alagad.+
15 Ang mga diosdios sang mga pungsod human sa pilak kag bulawan,Nga ginhimo lang sang tawo.+
16 May baba sila, apang indi makahambal;+May mga mata sila, apang indi makakita;
17 May mga dulunggan sila, apang indi makabati.
Wala sing ginhawa sa ila ilong.+
18 Ang mga tawo nga nagahimo sa ila mangin kaangay nila,+Amo man ang tanan nga nagasalig sa ila.+
19 Kamo nga panimalay sang Israel, dayawa ninyo si Jehova.
Kamo nga panimalay ni Aaron, dayawa ninyo si Jehova.
20 Kamo nga panimalay ni Levi, dayawa ninyo si Jehova.+
Kamo nga nagakahadlok kay Jehova, dayawa ninyo si Jehova.
21 Kabay nga dayawon si Jehova halin sa Sion,+Ang Isa nga nagapuyo sa Jerusalem.+
Dayawa ninyo si Jah!+
Footnote
^ Ukon “Hallelujah!” Ang “Jah” amo ang ginpalip-ot nga ngalan ni Jehova.
^ Ukon “Maglanton.”
^ Ukon “hamili nga ginapanag-iyahan.”
^ Ukon “alisngaw.”
^ Ukon “ngalan.” Sa literal, “handumanan.”
^ Ukon “sakdagon.”
^ Ukon “magakasubo sia para.”
