SANG pamatan-on pa ako, nadismaya ako sa pagdinumtanay sa tunga sang mga relihion. Nagapalibog man ako kon ngaa ginatugutan sang Dios ang kaimulon kag inhustisya ukon ngaa madamo sang relihioso nga tawo ang wala nagatuman sa ginasiling sang Biblia. Gani, nangin atiesta ako kag nagapati nga ang pulitikal nga rebolusyon lang ang makasolbar sang problema sang kalibutan.

Sang 1962, nagsugod ako sa pagbasa sang Magmata! nga magasin. Sang 1963, nagpasugot ako sa pagtuon sa Biblia upod sa mga Saksi ni Jehova. Daku gid ang epekto sa akon sang akon natun-an. Nahangpan ko nga indi ang Dios ang balasulon sa pagpamintas nga ginhimo sang lainlain nga relihion kag natun-an ko man nga may ara sia mahigugmaon nga katuyuan sa katawhan. Pagligad sang duha ka bulan nga pagtuon, ginpaambit ko sa iban nga ang Ginharian  sang Dios magabulos sa sining malaut nga sistema sang mga butang. Nabawtismuhan ako sang 1964 kag gintangdo nga espesyal payunir sang 1966. Nagapati ako nga ginluwas sang kamatuoran ang akon kabuhi bangod madamo sang akon kaupod anay nga pamatan-on nga mga militante ang napatay sa masingki nga paagi, ginbilanggo, ukon nalagyo sa pungsod. Nagapasalamat gid ako kay Jehova nga ginbag-o niya ako, isa anay ka atiesta nga wala sing paglaum nga nangin alagad sang Dios nga nagasaad sing matarong nga bag-o nga kalibutan.