Manug-apat na ka bulan ang ginabusong ni Maria. Ginhinguyang niya ang iya una nga mga binulan didto sa mga pukatod sang Judea sa bagatnan, sang ginduaw niya ang iya paryente nga si Elisabet. Pero nakapauli na sia sa Nazaret. Dali na lang magbal-anon nga nagabusong sia. Handurawa kon daw ano ini kabudlay para sa iya!

Ang malain pa kay kalaslon na si Maria kay Jose nga panday sa ila lugar. Kag nahibaluan niya nga suno sa Kasuguan sang Dios sa Israel, ang kalaslon nga babayi nga kinabubut-on nga naghulid sa iban nga lalaki dapat batuhon asta mapatay. (Deuteronomio 22:23, 24) Gani bisan indi imoral si Maria, mahimo nagapalibog sia kon paano niya ipaathag ang iya pagbusong kay Jose kag kon ano ang matabo.

Tatlo ka bulan nga wala na sia makapauli, gani mahimo nga nahidlaw na si Jose sa iya. Sang nagkit-anay sila, mahimo ginsugid ni Maria nga nagabusong sia. Mahimo ginpaathag niya sing maayo nga bangod ini sa balaan nga espiritu sang Dios. Pero subong sang imo maimadyin, mabudlay gid ini hangpon kag patihan ni Jose.

Nahibaluan ni Jose nga disente nga babayi si Maria kag maayo ang iya reputasyon. Kag palangga gid niya sia. Pero bisan amo sini ang ginsiling ni Maria, para kay Jose nagbusong sia bangod sa iban nga lalaki. Indi luyag ni Jose nga batuhon si Maria asta mapatay ukon mahuy-an; gani nagdesisyon na lang sia nga diborsiohan si Maria sing tago. Ginatamod sadto ang mga kalaslon nga kasado na,  kag kinahanglan ang diborsio para makabulagay.

Sang ulihi, samtang nagapalibog si Jose, natulugan sia. Nagpakita sa iya ang anghel ni Jehova paagi sa damgo kag nagsiling: “Indi ka magkahadlok nga dalhon sa imo balay si Maria nga imo asawa, kay nagapanamkon sia paagi sa balaan nga espiritu. Magabun-ag sia sing isa ka anak nga lalaki, kag hingalanan mo sia nga Jesus, kay luwason niya ang iya katawhan sa ila mga sala.”—Mateo 1:20, 21.

Sang nakabugtaw si Jose, nalipay gid sia kay maathag na ang tanan! Ginhimo niya dayon ang ginsiling sang anghel sa iya. Gindala niya si Maria sa iya balay. Pagpahibalo ini sa publiko, pareho sang seremonya sa kasal, nga mag-asawa na sanday Jose kag Maria. Pero wala maghulid si Jose kay Maria samtang ginabusong si Jesus.

Pila ka bulan sang ulihi, si Jose kag si Maria, nga manugbata na, naghanda sa ila paglakbay halin sa ila lugar nga Nazaret. Diin pa sila makadto kay manugbata na si Maria?