Wala gintago ni Jesus kay Pilato nga isa gid man sia ka hari. Pero ang iya Ginharian indi makahalit sa Roma. “Ang akon Ginharian indi bahin sini nga kalibutan,” siling ni Jesus. “Kon ang akon Ginharian bahin sini nga kalibutan, ang akon mga alagad nakig-away kuntani agod indi ako madakop sang mga Judiyo. Apang, ang matuod, ang akon Ginharian indi halin sa sini.” (Juan 18:36) Huo, may Ginharian si Jesus, pero indi sa sini nga kalibutan.

Wala gin-untatan ni Pilato ini nga isyu. Namangkot sia: “Kon amo, hari ka?” Gusto ipahibalo ni Jesus kay Pilato nga husto ang iya ginsiling, sang nagsabat sia: “Ikaw mismo ang nagsiling nga hari ako. Natawo ako kag nagkari sa kalibutan agod magpanaksi sa kamatuoran. Ang tanan nga dampig sa kamatuoran nagapamati sa akon.”—Juan 18:37.

Ginsilingan sadto ni Jesus si Tomas: “Ako amo ang dalan kag ang kamatuoran kag ang kabuhi.” Karon bisan si Pilato nakabati nga ginpadala si Jesus sa duta para magpanaksi sa “kamatuoran,” ang kamatuoran parte sa iya Ginharian. Determinado si Jesus nga mangin matutom sa sina nga kamatuoran bisan nagakahulugan pa ini sang iya kabuhi. Si Pilato namangkot: “Ano ang kamatuoran?” pero wala na sia maghulat sing paathag. Sa banta niya bastante na ang iya nabatian para hukman ini nga tawo.—Juan 14:6; 18:38.

Nagbalik si Pilato sa mga tawo nga nagahulat sa gua sang palasyo. Mahimo gid nga tupad niya si Jesus sang ginsilingan niya ang puno nga mga saserdote kag ang mga kaupod nila: “Wala ako sing nakita nga sala sa sini nga tawo.” Naakig ang mga tawo sa sini nga desisyon, gani nag-insister gid sila: “Paagi sa iya ginatudlo nagkinagamo ang bug-os nga Judea, halin sa Galilea tubtob diri.”—Lucas 23:4, 5.

Nakibot si Pilato kay panatiko gid ang mga Judiyo. Sang padayon nga nagasinggit ang puno nga mga saserdote kag ang mga gulang, ginpamangkot ni Pilato si Jesus: “Wala ka bala makabati sang ila madamo nga panumbungon batok sa imo?” (Mateo 27:13) Wala nagsabat si Jesus. Nakibot si Pilato bangod kalmado gihapon si Jesus bisan grabe ang mga panumbungon sa iya.

Ginsiling sang mga Judiyo nga nagpanudlo si Jesus “halin sa Galilea.” Bangod sini, nahibaluan ni Pilato nga taga-Galilea gali si Jesus. Napensaran niya kon paano sia makalikaw sa iya responsibilidad nga hukman si Jesus. Si Herodes Antipas (ang anak ni Herodes nga Daku) amo ang manuggahom sang Galilea, kag ara sia sa Jerusalem sa sining tion sang Paskua. Gani ginpadala ni Pilato si Jesus kay Herodes. Si Herodes Antipas ang nagpapugot kay Juan nga Manugbawtismo. Sang ulihi, sang nabatian ni Herodes nga nagahimo sing mga milagro si Jesus, nabalaka sia kay basi si Jesus amo ang ginbanhaw nga si Juan.—Lucas 9:7-9.

Nalipay si Herodes kay makita niya si Jesus. Indi bangod gusto niya buligan si Jesus ukon tan-awon kon bala may basihan gid man ang mga panumbungon sa iya. May gusto lang mabal-an si Herodes, kag “nagalaum sia nga makita ang paghimo ni Jesus sing milagro.” (Lucas 23:8) Pero wala ginhimo ni Jesus ang gusto ni Herodes. Ang matuod, sang ginpamangkot sia ni Herodes wala gid sia nagsabat. Naakig si Herodes kag ang mga soldado, gani “gintamay” nila si Jesus. (Lucas 23:11) Ginpasul-ob nila sa iya ang matahom nga bayo kag ginyaguta sia. Dayon ginpabalik ni Herodes si Jesus kay Pilato. Magkaaway sanday Herodes kag Pilato, pero karon mag-abyanay na sila.

Sang nakabalik na si Jesus, ginpatawag ni Pilato ang puno nga mga saserdote, ang mga manugdumala sang mga Judiyo, kag ang katawhan kag nagsiling: “Gin-usisa ko sia sa atubangan ninyo mismo apang wala ako sing nakita nga basihan sang inyo mga panumbungon sa iya. Bisan si Herodes wala man sing nakita nga sala sa iya, amo nga ginpabalik niya sia sa aton, kag wala sia sing  nahimo nga takus sa kamatayon. Gani silutan ko sia kag buy-an.”—Lucas 23:14-16.

Luyag ni Pilato nga hilwayon si Jesus, kay nahibaluan niya nga bangod lamang sa kahisa sang mga saserdote amo nga gintugyan nila sia. Sang gintinguhaan ni Pilato nga buy-an si Jesus, nakabaton sia sing dugang nga rason nga himuon ini. Samtang nagapungko sia sa lingkuran nga hukmanan, ang iya asawa nagpadala sing mensahe sa iya: “Indi paghilabti inang matarong nga tawo, kay natublag gid ako sa akon damgo [mahimo gid nga halin sa Dios] tuhoy sa iya.”—Mateo 27:19.

Paano mahilway ni Pilato ining inosente nga tawo, kay amo gid ini ang eksakto?