Nagapadayon sa pagbantala ang mga apostoles ni Jesus sa Galilea, pero ang isa nga nagpakilala kay Jesus indi makahimo sini. Ara gihapon sa prisuhan si Juan nga Manugbawtismo sa sulod na sang halos duha ka tuig.

Ginbuyagyag ni Juan nga sala ang pag-agaw ni Hari Herodes Antipas kay Herodias, ang asawa sang iya utod nga si Felipe. Gindiborsiohan ni Herodes ang iya una nga asawa para makapakasal kay Herodias. Suno sa Mosaikong Kasuguan, nga ginasunod kuno ni Herodes, ini nga kasal isa ka pagpakighilahi kag ilegal. Bangod sang pagsaway ni Juan, ginpapriso sia ni Herodes kay mahimo ginsugyot sia ni Herodias.

Nagalibog ang ulo ni Herodes kon ano ang himuon niya kay Juan, kay “ginakabig [sang mga tawo] si Juan nga isa ka manalagna.” (Mateo 14:5) Pero determinado gid si Herodias. ‘Nagadumot sia kay Juan,’ kag luyag niya nga patyon sia. (Marcos 6:19) Karon, may kahigayunan na sia.

Antes sang Paskua sang 32 C.E., naghimos si Herodes sang daku nga selebrasyon para sa iya kaadlawan. Ang tanan nga mataas nga opisyal ni Herodes kag mga opisyal sang mga soldado, subong man mga prominente sa Galilea, nagtambong sa iya kaadlawan. Sa sini nga okasyon, ginpasaot para sa mga bisita si Salome, ang bata ni Herodias sa iya anay bana nga si Felipe. Nagdayaw gid ang mga lalaki sa iya saot.

Nalipay gid si Herodes sa iya manak, gani nagsiling sia: “Ihatag ko sa imo ang tanan nga pangayuon mo.” Nanumpa pa sia: “Ihatag ko sa imo ang bisan ano nga pangayuon mo, bisan pa ang katunga sang akon ginharian.” Antes magsabat, naggua si Salome kag nagpamangkot sa iya iloy: “Ano ang pangayuon ko?”—Marcos 6:22-24.

Amo na ini ang ginahulat nga kahigayunan ni Herodias! “Ang ulo ni Juan nga Manugbawtismo,” sabat niya gilayon. Nagbalik dayon si Salome kay Herodes kag nagsiling: “Luyag ko nga ihatag mo sa akon sa gilayon ang ulo ni Juan nga Manugbawtismo nga nabutang sa bandehado.”—Marcos 6:24, 25.

Nasubuan gid si Herodes, pero nabatian sang iya mga bisita ang iya panumpa kay Salome. Mahuy-an sia kon indi niya ini pagtumanon, bisan pa ang ipapatay niya inosente nga tawo. Gani ginpakadto ni Herodes ang bantay sa prisuhan kag ginpahimo ang makasiligni nga sugo. Wala madugay, nagbalik ang bantay nga dala ang ulo ni Juan sa bandehado. Ginhatag niya ini kay Salome, kag ginhatag ini ni Salome sa iya iloy.

Sang nabalitaan ini sang mga disipulo ni Juan, ginkuha nila ang bangkay sini kag ginlubong. Dayon ginsugid nila ini kay Jesus.

Sang ulihi, sang nabatian ni Herodes nga si Jesus nagapang-ayo kag nagapagua sing mga demonyo, hinadlukan sia. Naghunahuna sia kon bala ini nga tawo—si Jesus—amo ang “ginbanhaw” nga si Juan nga Manugbawtismo. (Lucas 9:7) Gani gusto gid makita ni Herodes Antipas si Jesus. Pero pat-od nga indi bangod gusto niya mabatian ang pagbantala ni Jesus. Kundi gusto niya pat-uron kon matuod gid man ang iya ginahunahuna.