Madamo sing nahimo si Jesus sa lapnag nga pagministeryo niya sa Galilea. Pero sang magsiling sia, “Dapat ko man ibantala ang maayong balita sang Ginharian sang Dios sa iban nga mga siudad,” ginapatuhuyan niya indi lang ang Galilea. “Gani, nagpadayon sia sa pagbantala sa mga sinagoga sa Judea.” (Lucas 4:43, 44) Tayming ini kay tigpamulak na kag dali na lang ang isa ka kapiestahan sa Jerusalem.

Kon ipaanggid sa nabasa naton sa pagministeryo ni Jesus sa Galilea, diutay lang ang ginsambit sa Ebanghelyo parte sa iya hilikuton sa Judea. Bisan pa wala sia ginasapak sang kalabanan sa Judea, wala sia mag-untat sa pagbantala kag sa paghimo sing maayong mga buhat bisan diin sia magkadto.

Wala magdugay nagkadto si Jesus sa Judea sa daku nga siudad sang Jerusalem para sa Paskua sang 31 C.E. Sa masako nga lugar malapit sa Gawang sang mga Karnero, may daku nga punong nga may atop nga ginatawag Bethzatha. Madamo sang nagabalatian, bulag, kag lupog ang nagakadto diri. Ngaa? Kay ginapatihan sang mga tawo nga magaayo ang isa kon maglusong sia samtang nagalabugay ang tubig.

Adlaw nga Inugpahuway sadto, kag nakita ni Jesus ang tawo nga 38 ka tuig na nga nagabalatian. Namangkot si Jesus: “Luyag mo bala mag-ayo?” Nagsabat ang tawo: “Ginuo, wala sing nagabulig sa akon pakadto sa punong kon malabugay ang tubig, samtang nagapakadto ako may nauna na sa akon.”—Juan 5:6, 7.

Mahimo nga nakibot ang tawo kag ang iban man sa ginsiling ni Jesus: “Bangon ka, dal-a ang imo hiligdaan kag maglakat.” (Juan 5:8) Kag amo gid sini ang iya ginhimo. Nag-ayo sa gilayon ang tawo amo nga gindala niya ang iya hiligdaan kag naglakat!

Sa baylo nga magkalipay sa sining makatilingala nga hitabo, ang mga Judiyo nakigkita sa tawo kag naghukom: “Adlaw nga Inugpahuway karon, kag wala ginatugot sang kasuguan nga bitbiton mo ang hiligdaan.” Ang tawo nagsabat: “Ang nag-ayo mismo sa akon nagsiling, ‘Dal-a ang imo hiligdaan kag maglakat.’” (Juan 5:10, 11) Yadtong mga Judiyo nagapakalain sa isa nga nagpang-ayo sa Adlaw nga Inugpahuway.

“Sin-o ang nagsiling sa imo, ‘Dal-a ini kag maglakat’?” luyag nila hibaluon. Ngaa ginpamangkot nila ang tawo? Kay “naglakat na si Jesus bangod madamo ang tawo didto,” kag wala makilala sang gin-ayo ang ngalan ni Jesus. (Juan 5:12, 13) Pero nagkit-anay sila liwat ni Jesus. Sang ulihi, sa templo, nakita niya si Jesus kag nakilala niya ang nagpaayo sa iya sa punong.

Ginpangita sang nag-ayo nga tawo ang mga Judiyo nga namangkot kon sin-o ang nag-ayo sa iya. Ginsugiran niya sila parte kay Jesus. Sang mahibaluan ini sang mga Judiyo, nagkadto sila kay Jesus. Nagkadto bala sila para mahibaluan kon paano ginhimo ni Jesus ining makatilingala nga mga butang? Indi, kundi para pangitaan sing sala si Jesus kay naghimo sia sing maayo nga mga butang sa Adlaw nga Inugpahuway. Kag ginhingabot pa gani nila sia!