LEKSION 2
Sin-o ang Dios?
1. Ngaa dapat naton simbahon ang Dios?
Ang matuod nga Dios amo ang Manunuga sang tanan nga butang. Wala sia sing ginsuguran kag wala sing katapusan. (Salmo 90:2) Sia ang Ginhalinan sang maayong balita nga makita sa Biblia. (1 Timoteo 1:11) Tungod ang Dios ang naghatag sa aton sang kabuhi, dapat sia lang ang aton simbahon.—Basaha ang Bugna 4:11.
2. Ano nga sahi sang persona ang Dios?
Wala sing tawo nga nakakita sa Dios bangod Espiritu sia, buot silingon, ang iya kabuhi labaw sa mga tinuga nga nagakabuhi sa duta. (Juan 1:18; 4:24) Ang personalidad sang Dios makita sa mga butang nga iya ginhimo. Halimbawa, ang sarisari nga mga prutas kag mga bulak nagasugid sa aton parte sa iya gugma kag kaalam. Ang kadakuon sang uniberso nagasugid parte sa iya gahom.—Basaha ang Roma 1:20.
Madamo pa kita sing mahibaluan parte sa personalidad sang Dios paagi sa pagbasa sing Biblia. Halimbawa, ginasugid sini sa aton kon ano ang gusto kag indi gusto sang Dios, kon paano niya ginapakig-angutan ang mga tawo, kag kon ano ang iya reaksion sa lainlain nga sitwasyon.—Basaha ang Salmo 103:7-10.
3. May ngalan bala ang Dios?
Si Jesus nagsiling: “Amay namon nga yara sa langit, pakabalaanon ang imo ngalan.” (Mateo 6:9) Bisan pa madamo sing titulo ang Dios, isa lang ang iya ngalan. Lainlain ang pagmitlang sini sa kada lenguahe. Sa Hiligaynon, kinaandan nga ginamitlang ini nga “Jehova.” Pero sa iban ginamitlang ini nga “Yahweh.”—Basaha ang Salmo 83:18.
Sa madamo nga Biblia, ang ngalan sang Dios gin-islan sing mga titulo nga Ginuo ukon Dios. Pero sang ginsulat ang Biblia, mabasa sing mga 7,000 ka beses ang ngalan sang Dios. Ginpakilala ni Jesus ang ngalan sang Dios sang nagtudlo sia sa mga tawo parte sa Dios.—Basaha ang Juan 17:26.
Tan-awa ang video nga May Ngalan Bala ang Dios?
4. Nagaulikid bala si Jehova sa aton?
Pareho sang mahigugmaon nga amay, nagapanghikot ang Dios para sa aton dayon nga kaayuhan
Ang lapnag bala nga pag-antos nagapahangop nga si Jehova isa ka Dios nga wala nagaulikid sa aton? Ang iban nagasiling nga ginapaantos kita sang Dios agod tilawan kita, pero indi ina matuod.—Basaha ang Santiago 1:13.
Ginhatagan sang Dios ang tawo sing kahilwayan sa pagpili. Ginapasalamatan bala naton nga may kahilwayan kita sa pagdesisyon nga alagaron ang Dios? (Josue 24:15) Pero madamo ang nagdesisyon nga himuan sing malain ang iban, gani lapnag gid ang pag-antos. Nasubuan gid si Jehova magtan-aw sa sining inhustisya.—Basaha ang Genesis 6:5, 6.
Si Jehova isa ka Dios nga nagaulikid sa aton. Gusto niya nga mangin malipayon ang aton kabuhi. Sa indi madugay, dulaon niya ang pag-antos kag ang mga kabangdanan sini. Pero may maayo sia nga rason nga tugutan anay ang pag-antos. Sa Leksion 8 mahibaluan naton kon ano ina nga rason.—Basaha ang 2 Pedro 2:9; 3:7, 13.
5. Paano kita makapalapit sa Dios?
Ginaagda kita ni Jehova nga magpalapit sa iya paagi sa pangamuyo. Interesado sia sa kada isa sa aton. (Salmo 65:2; 145:18) Handa sia magpatawad. Nahibaluan niya ang aton panikasog nga mapahamut-an sia, bisan pa nagakapaslawan kita kon kaisa. Gani bisan indi kita perpekto, puede kita mangin suod sa Dios.—Basaha ang Salmo 103:12-14; Santiago 4:8.
Si Jehova ang naghatag sa aton sing kabuhi, gani dapat higugmaon naton sia labaw sa tanan. (Marcos 12:30) Mangin malapit pa gid kita sa Dios kon ginapakita naton nga ginahigugma naton sia paagi sa pagtuon parte sa iya kag pagtuman sa iya.—Basaha ang 1 Timoteo 2:4; 1 Juan 5:3.
