1, 2. Ano ang ginapaabot ni Pedro sang nagbantala si Jesus sa Capernaum, pero ano ang natabo?

GINLIBOT ni Pedro ang iya panulok sa mga nagapamati kay Jesus. Ara sila sa sinagoga sa Capernaum, ang tilipunan sang mga Judiyo kon magsimba. Nagaistar si Pedro sa sini nga banwa. Ari diri ang iya palangabuhian nga pagpangisda sa Dagat sang Galilea. Diri man nagaistar ang iya mga abyan, paryente, kag mga kaupod sa pagpangisda. Luyag ni Pedro nga makilala man nila kon sin-o gid si Jesus, kag malipay nga mabatian ang mga saad sang Ginharian sang Dios halin mismo sa pinakamaayo nga manunudlo. Pero, indi amo sini ang natabo sang magkadto si Jesus sa Capernaum.

² Madamo ang wala na namati kay Jesus. Ang iban nagreklamo sa iya mga gintudlo. Pero, ang ginakabalak-an gid ni Pedro amo ang reaksion sang pila ka disipulo ni Jesus. Wala na sila subong nalipay kag nadula na ang ila gana nga mahibaluan ang kamatuoran. Naakig sila kag ang iban nagsiling pa nga daw indi nila mabatas ang mga ginapanghambal ni Jesus. Gani bangod natak-an na sila mamati, naggua sila sa sinagoga kag nag-untat sa pagsunod sa iya.—Basaha ang Juan 6:60, 66.

3. Nakabulig ang pagtuo ni Pedro sa iya nga himuon ang ano?

³ Mahimo sa sini nga tion, si Pedro kag ang mga apostoles daw indi man kabalo kon ano ang ila himuon. Daw indi maintiendihan ni Pedro ang mga ginpanghambal ni Jesus sa sina nga adlaw. Para sa iya, daw kalaw-ay gid man pamatian sang mga ginsiling ni Jesus. Pero, ano ang himuon ni Pedro? Indi ini ang una ukon ang katapusan nga tion nga matilawan ang iya pagkamainunungon sa iya Agalon. Tan-awon naton kon paano ang pagtuo ni Pedro nakabulig sa iya nga atubangon ang mga pagtilaw kag magpabilin nga mainunungon.

4, 5. Paano nanghikot si Jesus sing tuhay sa ginapaabot sang mga tawo sa iya?

⁴ Pirme lang nagakakibot si Pedro sa mga ginapanghimo ni Jesus. Wala gid pirme ginapaabot sang mga tawo ang ginahimo kag  ginasiling sang iya Agalon. Sang nagligad lang nga adlaw, ginpakaon ni Jesus ang linibo ka tawo paagi sa milagro, gani gusto nila sia nga himuon nga hari. Pero, nakibot ang mga tawo sang nalagyo sia kag ginsugo ang iya mga disipulo nga masakay sa sakayan pakadto sa Capernaum. Samtang nagapanakayon ang mga disipulo sina nga gab-i, nakibot naman sila sang maglakat si Jesus sa mabalod nga Dagat sang Galilea. Didto gintudluan niya si Pedro sing importante nga leksion parte sa pagtuo.

⁵ Pagkaaga, nakita sang mga apostoles nga nagsunod sa ila ang mga tawo. Pero maathag nga nagasunodsunod sila kay Jesus indi para mamati sa iya, kundi para makakaon paagi sa iya mga milagro. Ginsaway sila ni Jesus kay interesado lang sila sa materyal nga mga butang. (Juan 6:25-27) Nagpadayon pa ini asta sa sinagoga sa Capernaum. Didto, may importante nga ginhambal si Jesus nga wala nila maintiendihan.

6. Ano nga ilustrasyon ang ginsugid ni Jesus, kag ano ang reaksion sang iya tagpalamati?

⁶ Gusto ni Jesus nga mabal-an sang mga tawo nga indi lamang sia kuluhaan sing literal nga pagkaon kundi makahatag man sia sing espirituwal nga pagkaon halin sa Dios. Paagi sa iya kamatayon, matigayon sang mga tawo ang kabuhi nga walay katapusan. Gani, naghatag sia sing ilustrasyon nga ginpaanggid ang iya kaugalingon sa manna, ang tinapay nga naghalin sa langit sang adlaw ni Moises. Wala nagpati ang iban sa sini, amo nga naggamit sia sing ilustrasyon nga nagpakibot gid sa ila. Nagsiling sia nga dapat kaunon sang mga tawo ang iya unod kag dugo para matigayon nila ang kabuhi. Sa sini nga tion, naakig na ang mga tawo kag ang iban nagsiling: “Ini nga mga pulong makakilibang; sin-o ang makapamati sini?” Gani, madamo sa mga disipulo ni Jesus ang nag-untat sa pagsunod sa iya. *—Juan 6:48-60, 66.

7, 8. (a) Ano ang wala pa maintiendihan ni Pedro tuhoy sa papel ni Jesus? (b) Ano ang sabat ni Pedro sa pamangkot ni Jesus sa mga apostoles?

⁷ Ano ang himuon ni Pedro? Mahimo nga nagalibog man ang iya ulo sa ginsiling ni Jesus. Wala pa niya maintiendihan nga dapat mapatay si Jesus para matuman ang kabubut-on sang Dios. Namensar man bala sia nga bayaan si Jesus pareho sa ginhimo sang iban? Wala. Lain gid si Pedro sa ila. Ngaa?

⁸ Ginbalikid ni Jesus ang iya mga apostoles kag nagsiling: “Indi man ninyo luyag nga magbiya, indi bala?” (Juan 6:67) Sila nga 12 ang iya ginaistorya, pero si Pedro lang ang nagsabat. Amo gid sini pirme ang nagakatabo. Mahimo si Pedro ang pinakamagulang sa  ila kag sia gid ang palahambal sa tanan. Pirme gid niya ginahambal kon ano ang ara sa iya pensar. Sia nagsiling: “Ginuo, kay sin-o kami makadto? Ikaw ang may mga pinamulong sang kabuhi nga walay katapusan.”—Juan 6:68.

9. Paano nangin mainunungon si Pedro kay Jesus?

⁹ Wala ka bala natandog sa ginsiling ni Pedro? Ang iya pagtuo kay Jesus nakabulig sa iya nga ipakita ang isa gid ka maayo nga kinaiya—ang pagkamainunungon. Kumbinsido si Pedro nga wala na sang iban pa nga Manluluwas nga gin-aman si Jehova magluwas kay Jesus. Nagapati man sia nga maluwas ang katawhan paagi sa mga panudlo ni Jesus parte sa Ginharian sang Dios. Bisan may mga butang nga wala gid niya maintiendihan, nahibaluan niya nga wala na sia sing kadtuan kon gusto niya nga kahamut-an sia sang Dios kag mabaton ang kabuhi nga walay katapusan.

10. Paano naton mailog ang pagkamainunungon ni Pedro?

¹⁰ Amo man bala sini ang imo pagpati? Madamo sa karon ang nagasiling nga palangga nila si Jesus pero indi sila mainunungon. Mapamatud-an naton nga mainunungon kita sa Cristo kon nagapati kita nga matigayon lamang naton ang kabuhi nga walay katapusan paagi sa iya mga panudlo. Dapat naton ini tun-an, intiendihon, kag iaplikar sa aton kabuhi bisan pa daw mabudlay ini batunon. Matigayon lamang naton ang kabuhi nga walay katapusan kon pamatud-an naton ang aton pagkamainunungon kay Jesus.—Basaha ang  Salmo 97:10.

11. Diin gin-upod ni Jesus ang iya mga sumulunod? (Tan-awa man ang footnote.)

¹¹ Wala madugay sa tapos sadto nga hitabo, gin-upod ni Jesus ang iya mga apostoles kag ang pila niya ka disipulo sa malawig nga pagpanglakaton paaminhan. Kit-anon halin sa Dagat sang Galilea ang putukputukan sang Bukid Hermon nga natabunan sang yelo, nga ara nayon sa punta sang aminhan sang Ginsaad nga Duta. Amat-amat ini nga nagataas tan-awon samtang nagapalapit sila kag nagataklad sa mga lugar malapit sa Cesarea Filipos. * Sa bagatnan sini, kitaon ang Ginsaad nga Duta. Sa sining matahom nga lugar, ginpamangkot ni Jesus ang iya mga sumulunod.

12, 13. (a) Ngaa namangkot si Jesus kon sin-o sia para sa kadam-an? (b) Paano ginpakita ni Pedro paagi sa iya sabat kay Jesus ang iya matuod nga pagtuo?

¹² “Sin-o ako suno sa ginasiling sang kadam-an?” pamangkot ni Jesus. Mahanduraw naton nga ginatulok ni Pedro ang mga mata ni  Jesus, kag nabatyagan niya ang kaayo kag tuman nga kaalam sang iya Agalon. Interesado gid si Jesus sa sabat sang iya mga tagpalamati base sa kon ano ang ila nakita kag nabatian sa iya. Ang sabat sang iya mga disipulo amo ang sala nga mga pagpati sang mga tawo parte sa iya. Gusto man niya mahibal-an kon bala amo man sini ang pagpati sang iya pinakasuod nga mga sumulunod. Gani namangkot sia, “Kamo naman, sin-o ako suno sa inyo?”—Luc. 9:18-20.

¹³ Sa liwat, hinali lang nagsabat si Pedro. Ang iya sabat amo gid ang ginahunahuna sang kalabanan didto. “Ikaw ang Cristo, ang Anak sang buhi nga Dios,” siling niya. Mahanduraw naton nga nalipay gid si Jesus sa sabat ni Pedro amo nga gindayaw niya sia. Ginpahanumdom ni Jesus si Pedro nga indi tawo ang nagsugid sining importante nga kamatuoran sa mga may matuod nga pagtuo, kundi si Jehova nga Dios mismo. Naintiendihan ni Pedro kon sin-o gid ang madugay na nga ginsaad nga Mesias, ukon Cristo kay ginpahibalo sa iya ni Jehova ining isa sa pinakaimportante nga kamatuoran!—Basaha ang Mateo 16:16, 17.

14. Anong importante nga mga pribilehiyo ang ginhatag ni Jesus kay Pedro?

¹⁴ Ang Cristo amo ang gintagna nga bato nga ginsikway sang mga manugtukod. (Sal. 118:22; Luc. 20:17) Base sa sini nga mga tagna, ginpakita ni Jesus nga tukuron ni Jehova ang kongregasyon sa bato ukon igang nga bag-o lang ginhingadlan ni Pedro. Ginhatagan dayon ni Jesus si Pedro sang pila ka importante nga pribilehiyo sa sini nga kongregasyon. Wala niya ginhimo si Pedro nga pinakamataas sa mga apostoles subong sang ginasiling sang iban. Sa baylo, ginhatagan niya sia sang mga responsibilidad, “mga yabi sang ginharian sang langit.” (Mat. 16:19) Si Pedro ang magabukas sang paglaum nga makasulod sa Ginharian sang Dios ang tatlo ka grupo sang tawo. Una ang mga Judiyo, dayon mga Samaritano, kag sa ulihi ang mga Gentil ukon ang mga indi Judiyo.

15. Ngaa ginsaway ni Pedro si Jesus, kag paano?

¹⁵ Pero, sang ulihi nagsiling si Jesus nga ang ginhatagan sing madamo, madamo man ang pangayuon sa iya, kag nangin matuod gid ini kay Pedro. (Luc. 12:48) Padayon nga ginsugid ni Jesus ang importante nga mga kamatuoran parte sa Mesias, pati na ang iya nagahilapit nga pag-antos kag kamatayon sa Jerusalem. Naglalain gid si Pedro sang mabatian niya ini. Gani, gindala niya si Jesus sa uluunhan kag ginsaway: “Maluoy ka sa imo kaugalingon, Ginuo; indi gid ini matabo sa imo.”—Mat. 16:21, 22.

16. Paano gintadlong ni Jesus si Pedro, kag ano ang matun-an naton sa ginsiling ni Jesus?

 ¹⁶ Sigurado nga maayo gid ang motibo ni Pedro, amo nga nakibot gid sia sa reaksion ni Jesus. Gintalikdan ni Jesus si Pedro kag gintulok ang iban nga disipulo nga mahimo amo man ang ginapensar, kag nagsiling: “Palayo sa akon, Satanas! Kasandaran ka sa akon, bangod nagahunahuna ka, indi sang panghunahuna sang Dios, kundi sang iya sang mga tawo.” (Mat. 16:23; Mar. 8:32, 33) May makuha kita nga leksion sa ginsiling ni Jesus. Daw kahapos lang pirme nga unahon ang aton gusto sangsa gusto sang Dios. Kon ginahimo naton ini, bisan pa maayo ang aton tuyo, ginasuportahan naton si Satanas sa baylo nga ang Dios. Pero, ano ang nangin reaksion ni Pedro?

17. Ano ang buot silingon ni Jesus sang ginsilingan niya si Pedro nga ‘diri ka sa likod ko’?

¹⁷ Nahibaluan niya nga wala man gid sia ginatawag ni Jesus nga Satanas nga Yawa. Kay man, wala sia ginsilingan ni Jesus pareho sa ginsiling niya kay Satanas nga “Palayo ka,” kundi naggamit sia sing lain nga mga tinaga kay Pedro nga sa orihinal nga lenguahe mahimo i-translate nga ‘diri ka sa likod ko.’ (Mat. 4:10) Nakita ni Jesus nga madamo sing maayo nga kinaiya si Pedro. Gani, wala sia gintabog kundi gintadlong lang ni Jesus ang iya sala nga panghunahuna. Maathag nga indi dapat mangin kasandaran si Pedro sa atubangan sang iya Agalon, kundi dapat ara sia sa likod para magsakdag kay Jesus.

18. Paano ginpakita ni Pedro ang iya pagkamainunungon, kag paano naton sia mailog?

¹⁸ Nangrason bala si Pedro, nangakig, ukon nagsunggod? Wala. Ginbaton niya ang pagtadlong sa iya. Gani, nagpakita naman sia sing pagkamainunungon. Kon kaisa, ang tanan nga sumulunod sang Cristo kinahanglan nga tadlungon. Kon mapainubuson naton nga batunon ang disiplina kag magtuon sa sini, magasuod pa gid kita kay Jesucristo kag sa iya Amay nga si Jehova nga Dios.—Basaha ang Hulubaton 4:13.

19. Ano ang makapakibot nga ginhambal ni Jesus, kag ano ang ginhunahuna ni Pedro?

¹⁹ Sang ulihi, nakibot naman sila sa ginhambal ni Jesus: “Sa pagkamatuod nagasiling ako sa inyo nga may pila sa mga nagatindog diri nga indi na mapatay tubtob nga makita anay nila ang Anak  sang tawo nga nagakari sa iya ginharian.” (Mat. 16:28) Sigurado nga interesado gid sa sini si Pedro. Ano bala ang buot silingon ni Jesus? Mahimo ginhunahuna ni Pedro nga indi na sia pagpilion sa sining pinasahi nga mga pribilehiyo kay bag-o lang sia gintadlong ni Jesus.

20, 21. (a) Ilaragway ang palanan-awon nga nasaksihan ni Pedro. (b) Paano nakabulig ang pag-istoryahanay sa palanan-awon para matadlong si Pedro?

²⁰ Pero pagligad sang isa ka semana, gin-upod ni Jesus sanday Santiago, Juan, kag Pedro sa “mataas nga bukid”—mahimo sa Bukid Hermon, nga mga pila lang ka kilometro ang kalayuon. Siguro gab-i na sadto kay natuyo na ang tatlo ka apostoles. Pero samtang nagapangamuyo si Jesus, gulpi lang nadula ang ila katuyo. Ano ang natabo?—Mat. 17:1; Luc. 9:28, 29, 32.

²¹ Nagbaylo ang dagway ni Jesus. Amat-amat nga nagsilak ang iya guya, pareho kasanag sang adlaw. Ang iya bayo nagbadlak sa kaputi. Dayon may nagpakita nga duha ka tawo, nga nagarepresentar  kay Moises kag kay Elias. Nag-istorya sila kay Jesus parte sa iya “pagtaliwan, nga pat-od nga mahanabo sa Jerusalem.” Buot silingon, mapatay sia kag dayon banhawon. Gani, nagsala gid si Pedro sang magsiling sia nga indi gid magaantos si Jesus!—Luc. 9:30, 31.

22, 23. (a) Paano ginpakita ni Pedro ang iya pagkaalisto kag kahanda sa pagbulig? (b) Ano pa nga pagpakamaayo ang nabaton nanday Pedro, Santiago, kag Juan sina nga gab-i?

²² Gusto naman ni Pedro nga mag-entra sa sining pinasahi nga hitabo. Abi niya malakat na sanday Moises kag Elias, gani nagsiling sia: “Manunudlo, maayo nga yari kami diri, gani mahimo kami sang tatlo ka tolda, isa para sa imo kag isa para kay Moises kag isa para kay Elias.” Siempre, indi na nila kinahanglan ang tolda kay ginarepresentar lang nila ang mga alagad ni Jehova nga madugay na nga napatay. Wala gid nakaintiende si Pedro sang iya ginapanghambal. Pero bisan pa amo sini si Pedro, wala ka bala nanamian sa iya pagkaalisto kag kahanda sa pagbulig?—Luc. 9:33.

²³ Sina man nga gab-i, nakabaton pa gid sanday Pedro, Santiago, kag Juan sang isa pa ka pagpakamaayo. May nagporma nga panganod kag naglikop sa ila sa bukid. Dayon nabatian nila ang tingog mismo ni Jehova nga Dios nga nagsiling: “Ini ang akon Anak, ang isa nga pinili. Magpamati kamo sa iya.” Pagkatapos sini, sila na lang nga tatlo kag si Jesus ang nabilin sa bukid.—Luc. 9:34-36.

24. (a) Paano nakabenepisyo si Pedro sa palanan-awon? (b) Paano kita subong makabenepisyo sa palanan-awon?

²⁴ Isa gid ka pagpakamaayo kay Pedro kag sa aton ini nga palanan-awon! Mga pila ka dekada sang ulihi, nagsulat sia nga pribilehiyo gid niya sadto nga gab-i nga ‘nasaksihan mismo ang pagkahalangdon’ ni Jesus kag makita ang iya himaya kon mangin Hari na sia sa langit. Ginpamatud-an sini nga palanan-awon ang madamo nga tagna sa Pulong sang Dios. Ginpalig-on man sini ang pagtuo ni Pedro kay magaatubang pa sia sing mga pagtilaw sa palaabuton. (Basaha ang 2 Pedro 1:16-19.) Mapalig-on man kita kaangay ni Pedro, kon magpabilin kita nga mainunungon sa Agalon nga gintangdo ni Jehova, magtuon sa iya, magbaton sing disiplina kag pagtadlong, kag mapainubuson nga magsunod sa iya adlaw-adlaw.