ANO ayhan ang kahimtangan kon ang bug-os nga pungsod kag ang manuggahom sini nagasunod kay Jehova subong ila Soberano kag nagatuman sang Iya mga kasuguan? Ang sabat makita sa 40 ka tuig nga paggahom ni Hari Solomon.

Antes mapatay si David, gintangdo niya ang iya anak nga si Solomon nga magabulos sa iya. Sa iya damgo, ginhambalan sang Dios si Solomon nga mangabay sing bisan ano. Nangabay si Solomon sing kaalam kag ihibalo agod mahukman niya ang katawhan sing alalangay kag maalamon. Nahamuot sa iya si Jehova kag ginhatagan niya si Solomon sing kaalam kag paghangop. Ginsaaran man sia ni Jehova sing manggad, himaya, kag malawig nga kabuhi kon magpabilin sia nga matinumanon.

Nangin bantog si Solomon bangod sang iya maalam nga paghukom. Isa ka bes, gin-agawan sang duha ka babayi ang isa ka lapsag, ang kada isa nagapangangkon nga sia ang nanay. Nagmando si Solomon nga pihakon ang lapsag sa duha ka babayi. Nagsugot ang una nga babayi, pero ang matuod nga nanay nagpakiluoy nga ihatag na lang sa una nga babayi ang lapsag. Nakita karon ni Solomon nga ang nagpakiluoy nga babayi amo ang matuod nga iloy gani ginhatag ang lapsag sa iya. Wala madugay, nabalitaan sang bug-os nga Israel ini nga desisyon, kag narealisar sang katawhan nga ang kaalam ni Solomon naghalin sa Dios.

Ang pinakadaku nga nahimuan ni Solomon amo ang pagpatindog sang templo ni Jehova, isa ka matahom nga tinukod sa Jerusalem nga amo ang sentro sang pagsimba sa Israel. Sa inagurasyon sang templo, nangamuyo si Solomon: “Yari karon, ang langit kag ang langit sang mga langit indi makaigo sa imo; daw ano pa gid kadiotay ining balay nga akon ginpatindug!”—1 Hari 8:27.

Nabatian sa iban nga mga lugar ang kaalam ni Solomon, bisan sa malayo nga Sheba, sa Arabia. Naglakbay ang rayna sang Sheba agod makita ang kahimayaan kag kamanggaran ni Solomon kag agod tilawan ang kadalumon sang iya kaalam. Nagdayaw gid ang rayna sa kaalam ni Solomon kag sa kabuganaan sang Israel amo nga gindayaw niya si Jehova sa pagtangdo sini sang isa ka maalam nga hari. Sa pagkamatuod, paagi sa pagpakamaayo ni Jehova, ang paggahom ni Solomon amo ang labing bugana kag labing malinong sa kasaysayan sang Israel sang una.

Makapasubo nga wala nagpadayon si Solomon sa pagsunod sa kaalam ni Jehova. Ginsikway niya ang sugo sang Dios kag nangasawa sing ginatos ka mga babayi, kag madamo sa ila ang nagasimba sa iban nga dios. Amat-amat sia nga ginbuyok sang iya mga asawa nga talikdan si Jehova kag magsimba sa mga imahen. Ginsilingan ni Jehova si Solomon nga may bahin sang ginharian nga kuhaon gikan sa iya. May bahin lang nga mabilin para sa iya pamilya, siling sang Dios, bangod sang saad sang Dios sa iya amay nga si David. Bisan pa nag-untat si Solomon sa pag-alagad sa Dios, nagpabilin nga matutom si Jehova sa iya katipan kay David parte sa Ginharian.

—Base sa 1 Hari kapitulo 1 asta 11; 2 Cronica kapitulo 1 asta 9; Deuteronomio 17:17.