ANG hambalanon nga “Ang kuarta amo ang gamot sang tanan nga kalainan” masami nga ginasiling nga naghalin sa Biblia. Apang ang ginasiling sang Biblia amo: “Ang gugma sa kuarta amo ang gamot sang tanan nga sahi sang makahalalit nga mga butang.” (1 Timoteo 6:10) Sa pagkamatuod may pila gid man ka tawo nga mahigugmaon sa kuarta nga nagahimakas pa gani agod magmanggaranon. Ang iban nangin ulipon na sang kuarta kag nagresulta ini sa daku nga mga problema. Apang kon maalamon ang paggamit sing kuarta, mapuslanon gid ini. Nagsiling ang Biblia nga “ang cuarta nagasabat sang tanan nga butang.”​—Manugwali 10:19.

Bisan pa nga ang Biblia indi isa ka libro nga nagabinagbinag tuhoy sa kuarta, nagaunod ini sing praktikal nga mga laygay kon paano mo gamiton sing maalamon ang kuarta. Ang masunod nga lima ka pamaagi kinaandan na nga ginarekomendar sang mga manuglaygay tuhoy sa pinansial, kag nahisanto man ini sa mga prinsipio nga narekord sa Biblia.

Magsupot. Ginapakita sang Biblia nga gintudluan ang mga Israelinhon sang una nga dapat sila magsupot. Ginsilingan sila nga magpain sing ikanapulo (ukon 10 porsiento) kada tuig agod gamiton lamang sa pagtambong sa mga kapiestahan sang pungsod. (Deuteronomio 14:22-27) Ginpalig-on man ni apostol Pablo ang mga Cristiano sang una nga magpain sing kuarta kada semana agod sa ulihi may ibulig sila sa ila pareho nga mga Cristiano nga nagakinahanglan. (1 Corinto 16:1, 2) Kalabanan sa mga manuglaygay tuhoy sa pinansial nagapalig-on nga kinahanglan magsupot. Dapat mo ini himuon nga prioridad. Kon makakuarta ka, ideposito sa bangko ukon ihulog sa alkansiya ang kantidad nga luyag mo taguon. Makabulig ini sa imo agod indi mo ini magasto tanan.

Magbadyet. Amo lamang ini ang praktikal nga paagi agod mahibaluan, makontrol kag mabuhinan mo ang imo ginagasto. Paagi sa maayo nga pagbadyet mahibaluan mo kon sa diin nagakadto ang imo kuarta, kag makabulig ini sa imo nga malab-ot ang imo mga tulumuron sa pinansial. Hibalua kon pila ang imo kita, kag indi ini paggastuha tanan. Hibalua kon ano ang imo kinahanglanon kag ang imo mga gusto lamang. Tuhoy sini, si Jesus nagpalig-on sa iya mga tagpalamati nga ‘sumahon ang kagastuhanan’ antes sugdan ang bisan ano nga proyekto. (Lucas 14:28) Ginalaygayan kita sang Biblia nga likawan ang indi kinahanglanon nga pagpangutang.​—Hulubaton 22:7.

 Magplano. Pamensara sing maayo ang imo mga kinahanglanon sa palaabuton. Halimbawa, kon nagaplano ka nga magbakal sing balay ukon isa ka apartment, mahimo nga maayo ang pag-loan nga may manubo sing interes. Sing kaanggid, mahimo man magkuha sing insurance ang ulo sang pamilya para sa iya panimalay. Ang pagpamensar sang imo palaabuton mahimo nga magdalahig sa pagplano sa tion sang imo pagretiro. Ang Hulubaton 21:5 nagpahanumdom sa aton nga “ang mga hunahuna [ukon mga plano] sang mapisan nagapadolong lamang sa kabuganaan.”

Magtuon. Magtuon sing mga ikasarang kag atipana ang imo pisikal kag emosyonal nga kinahanglanon. May maayo gid ini nga resulta. Padayuna ang pagtuon. Ginapabaloran gid sang Biblia ang “maayo nga kaalam kag pagbinagbinag,” kag ginapalig-on kita nga pauswagon ini.​—Hulubaton 3:21, 22; Manugwali 10:10.

Mangin Balanse. Ibutang sa husto nga lugar ang kuarta. Ginapakita sang mga surbe nga mas malipayon ang mga tawo nga nagaulikid sa ila isigkatawo sangsa kuarta. Ang pila nangin indi balanse bangod sang pagkasakon. Paano? Kon matigayon na nila ang ila panguna nga mga kinahanglanon, nagatinguha pa gid sila nga magmanggaranon. Apang, luwas sa pagkaon, bayo, kag balay, ano pa bala ang kinahanglan sang tawo? Amo sini kon ngaa ang manunulat sang Biblia nga ginsambit kaina sa umpisa sa sini nga artikulo nagsulat man: “Kon kita may pagkaon, panapton kag pasilungan, mangin kontento na kita sa sini nga mga butang.” (1 Timoteo 6:8) Kon kontento kita, malikawan naton ang gugma sa kuarta kag ang tanan nga mga problema bangod sa sini.

Ang gugma sa kuarta amo gid man ang gamot sang tanan nga kalainan. Kon pasugtan mo lang ang kuarta, mangin agalon mo ini. Pero, kon gamiton mo ini sing maalamon, matigayon mo ang mas importante nga mga butang kaangay sang suod nga relasyon sa pamilya, sa mga abyan, kag sa Dios. Sa karon, daw indi mo gid malikawan ang pagkabalaka sa kuarta. Padayon bala kita nga magakabalaka bangod sa kuarta? Ano ang aton paglaum agod matapna ang kaimulon? Ang masunod nga artikulo magasabat sa sini nga mga pamangkot.