Kon aktibo ka, mangin mas malipayon ka kag mapagsik. Makapamensar ka man sing maayo kag madamo sing mahimo. Kon husto pa gid ang imo ginakaon, malikawan mo nga magtambok. Indi kinahanglan nga sobrasobra ukon masakit ang pag-ehersisyo. Bisan haganhagan lang ini basta regular kag pila ka beses kada semana, daku ang mabulig sini sa imo.

Ang pag-jogging, paglakat sing madasig, pag-bike kag pag-entra sa mga sports makapabalhas sa imo kag makapatagumba sang imo dughan. Gani malikawan mo ang atake sa tagipusuon, istrok, kag indi ka madali kapuyon. Ang aerobic exercise, haganhagan nga pag-weights, kag simple nga mga ehersisyo makapabakod sang imo tul-an, maskulo, kamot, kag tiil. Kon himuon mo ini, magadasig ang imo metabolismo kag indi ka masyado magtambok.

Ang ehersisyo makabulig sa tanan kag indi kinahanglan nga magkadto gid sa gym. Imbes nga magsakay sa salakyan ukon elebeytor, mas maayo nga maglakat. Ngaa abi maghulat sang salakyan kon puede ka man lang maglakat, kag basi mas madasig pa? Dapat palig-unon sang mga ginikanan ang ila kabataan nga maghampang sa gua kon posible. Makapabakod ini kag makabulig sa koordinasyon sang ila lawas sangsa nagapungko lang kag nagahampang sang video games.

Makabulig sa imo ang haganhagan nga pag-ehersisyo bisan ano man ang imo edad. Kon may edad ka na ukon may balatian kag wala na nagaehersisyo, mas maayo nga magpadoktor ka anay antes magsugod. Pero tinguhai gid nga masugdan ini! Ang haganhagan nga pag-ehersisyo makabulig bisan sa mga tigulang na para magbakod ang ila maskulo kag tul-an kag malikawan ang pagkatumba.

Ang pag-ehersisyo amo ang nakabulig kay Rustam nga ginsambit sa una nga artikulo. Mga pito na ka tuig sang nagsugod sila sang iya asawa sa pag-jogging kada aga, lima ka beses kada semana. ‘Sang primero, nagapangita kami sing rason para indi maka-jogging,’ siling niya. “Pero ginapalig-on namon ang isa kag isa. Subong, nanamian na kami kag regular na namon ini nga ginahimo.”