ANG agama mahapos lang makalumpat halin sa salog pakadto sa dingding. Apang kon madanlog ang iya ginatapakan, indi sia makasikad sa husto nga anggulo, pero eksakto gihapon ang iya tupa sa dingding. Paano niya ini mahimo? Ang sekreto ara sa iya ikog.

Binagbinaga: Kon ang ginatapakan sang agama magaras, indi ini mabudlayan maglumpat. Ginabalanse lang sini ang iya lawas kag indi na kinahanglan hulagon ang iya ikog para makalumpat sa husto nga anggulo. Ugaling kon madanlog ang iya ginatapakan, indi ini makasikad sing maayo kag nagalumpat sa sala nga anggulo. Pero samtang ara sa hangin, ginakay-o sini ang anggulo sang iya lawas paagi sa pagpataas sang iya ikog. Mabudlay ini himuon. “Dapat padayon sini nga ipasibu ang anggulo sang iya ikog para makapabilin sia nga balanse,” report sang University of California, Berkeley. Kon mas madanlog ang iya halinan, labi man nga dapat pataason sang agama ang iya ikog para makatupa sing eksakto.

Ang ikog sang agama makabulig sa mga engineer para makadesinyo sang maabtik kag indi dali matumba nga salakyan nga robot nga magamit sa pagpangita sang mga biktima sang linog ukon iban pa nga kalamidad. “Ang mga robot indi pareho kaabtik sa mga sapat kag dali ini matumba,” siling sang researcher nga si Thomas Libby, “kon may makabulig sa desinyo sang robot para indi ini madali matumba, isa gid ini ka daku nga pag-uswag.”

Ano sa banta mo? Ang ikog bala sang agama resulta sang ebolusyon? Ukon gindesinyo ini?