“Ang inyo paagi sang pagkabuhi mangin wala sing gugma sa kuarta . . . Kay [ang Dios] nagsiling: ‘Indi ko gid kamo pagbayaan ukon pagpatumbayaan.’”—Hebreo 13:5.

PAANO GINAPAKITA SANG DIOS ANG IYA PAG-ULIKID?

Kon mapigaduhan ang isa ka sumilimba ni Jehova nga Dios, ginapakita sang Dios ang iya pag-ulikid sa lainlain nga paagi. Ang isa sa sini amo ang bulig sang iban nga Cristiano. * Ang Santiago 1:27 nagasiling: “Ang porma sang pagsimba nga matinlo kag wala sing dagta sa pagtamod sang aton Dios kag Amay amo ini: ang pag-atipan sa mga ilo kag sa mga balo nga babayi sa ila kapipit-an.”

Ang mga Cristiano sang una nagabuligay. Halimbawa, sang gintagna nga may grabe nga tiggulutom nga maabot sa Judea, ang mga Cristiano sa siudad sang Antioquia sa Siria nagdesisyon nga magpadala “sing bulig sa mga kauturan nga nagapuyo sa Judea.” (Binuhatan 11:28-30) Bangod sini, ang mga imol nga Cristiano wala nawad-an sang ila mga kinahanglanon. Isa ini ka pamatuod sang Cristianong gugma.—1 Juan 3:18.

“Ako ang GINOO nga inyo Dios nga nagtudlo sa inyo kon ano ang maayo para sa inyo.”—Isaias 48:17, 18, APD.

ANG DIOS NAGABULIG SA ATON NGA BULIGAN ANG ATON KAUGALINGON

Subong sang napamatud-an sang minilyon, ang kaalam nga makita sa Biblia praktikal gid kag amo ang pinakamaayo. Ang Hulubaton 2:6, 7 nagasiling: “Kay ang GINOO nagahatag sing kaalam; gikan sa iya baba nagagowa ang ihibalo kag paghangup; sia nagatipon sing maayo nga kaalam nga sa matadlong.” Kon pangitaon kag sundon sang mga tawo ini nga kaalam, makabenepisyo gid sila.

Halimbawa, ginalikawan nila ang makahalalit kag magasto nga mga bisyo, pareho sang droga kag pag-abuso sa alkohol. (2 Corinto 7:1) Nangin bunayag man sila, mas mapisan, kag mas responsable, gani mahapos sila makakita sing trabaho kag nangin mas maayo nga mga trabahador. Ang Efeso 4:28 nagasiling: “Ang kawatan indi na magpangawat, sa baylo magpangabudlay sia sing lakas, . . . agod may mahatag sia sa isa nga nagakinahanglan.”

“Ang kaalam sang Dios mapamatud-an nga husto paagi sa mga resulta sini.”—Mateo 11:19, The New English Bible.

MGA PAMATUOD

Madali na lang matapos ang kontrata ni Wilson, nga isa ka kaswal nga trabahador sa Ghana. Sa iya katapusan nga adlaw sa trabaho, samtang naga-washing sia sang salakyan sang ila direktor, nakakita sia sing kuarta sa likod sang salakyan. Ginsilingan sia sang superbisor nga iya na lang ang kuarta. Pero bangod Saksi ni Jehova si Wilson, wala niya ini ginkawat. Kundi ginbalik niya ang kuarta sa tag-iya. Gani imbes nga pahalinon sa obra, nangin regular sia nga empleyado kag sang ulihi gin-promote pa.

Sa Europa, ginpahalin si Géraldine sa obra kay kontra sang iya amo ang mga Saksi ni Jehova. Apang ang nanay sang iya amo nagsiling nga nagsala gid ang iya bata. Ginsilingan niya ini, “Kon nagapangita ka sang masaligan nga empleyado nga serioso gid sa ila obra, wala ka na sing makita nga mas maayo pa sangsa mga Saksi ni Jehova.” Nag-research ang iya amo parte sa mga Saksi kag bangod sini, ginpabalik si Géraldine sa iya obra.

Sang napigaduhan si Sara, isa ka nagasolo nga iloy sa South Africa, naeksperiensiahan niya ang matuod nga Cristianong gugma sang ginhatagan sia sang mga kaupod niya sa kongregasyon sing pagkaon kag transportasyon. Sang ulihi, ang iya kabataan nagsiling, “Madamo kami sing ginikanan sa kongregasyon.”

Pila lamang ini sa madamo nga halimbawa. Nagapahanumdom ini sa aton sang ginsiling sang Hulubaton 1:33: “Ang nagapamati sa akon magapuyo sing malig-on.” Matuod gid ina!