MGA 500 ka tuig ang nagligad, sang nag-abot ang mga Espanyol sa ginatawag na subong nga El Salvador, ang pinakadaku nga tribo sa sini nga lugar nagtawag sa ila teritoryo nga Cuscatlán—nga nagakahulugan “Duta sang Bahandi.” Sa karon, ang kalabanan sa El Salvador kaliwatan sang mga tribo kag sang mga naghalin sa Europa.

Kilala ang mga Salvadoran nga mapisan kag mainabyanon. Matinahuron man sila. Mainayuhon nga nagatamyawanay anay ang mga tawo antes sila mag-istorya ukon magsugod sa pagnegosyo paagi sa pagsiling, “Buenos días” (maayong aga) ukon “Buenas tardes” (maayong hapon). Ang matuod, ang mga Salvadoran nga malayo sa siudad ukon mga banwa nagakabig nga bastos ang indi pagsapak ukon indi pagtamyaw sa mga nagalabay.

Ang pagkaon nga nanamian gid sang mga Salvadoran amo ang pupusa—tortilla nga mais (ukon bugas) nga ginabutangan sang keso kag mga uyas, amo man sang karne sang baboy kag iban pa. Masami nga ginakaon ang pupusa nga may tomato sauce kag curtido—sawsawan nga may repolyo, carrot, bombay, kag makahang nga langgaw. Bisan pa nagagamit ang iban sang sundang kag tinidor, ang kinaandan nga paagi sa pagkaon sini amo ang pagkinamot.

 NAHIBALUAN MO BALA? Ginatawag ang El Salvador nga lugar sang mga bulkan. May sobra 20 ka bulkan diri, kag ang pila sini aktibo gihapon. Ang busay nga Los Tercios nagailig sa mga bato nga may anom ka anggulo nga naporma bangod sang paglupok sang bulkan.

May sobra 38,000 ka Saksi ni Jehova sa El Salvador, kag gin-organisar sila sa mga 700 ka kongregasyon. Nagatudlo sila sing Biblia sa mga 43,000 ka tawo sa Espanyol, Ingles, kag Salvadoran Sign Language.