TOPIKO SA KOBER | NGAA INDI DAPAT MANGAMPO?
Bangod May Bulig
“[Itugyan ninyo sa Dios] ang tanan ninyo nga kabalaka, bangod nagaulikid sia sa inyo.”—1 PEDRO 5:7.
Mas maayo pa nga mapatay sangsa mabuhi kon nagabatyag ka nga daw wala ka na gid sang mahimo. Pero binagbinaga ang pila ka bulig nga mahimo mo matigayon.
Pangamuyo. Ang pangamuyo indi lang paagi para mangin maayo ang imo pamatyag; ukon himuon lang ini bangod wala ka na sing mahimo. Pagpakigkomunikar ini kay Jehova nga Dios, nga nagaulikid gid sa imo. Luyag ni Jehova nga ihambal mo sa iya ang imo mga kabalaka. Ang matuod, ginapalig-on kita sang Biblia: “Itungtung sa GINOO ang imo lulan, kag sia magaalay-ay sa imo.”—Salmo 55:22.
Ngaa indi mag-istorya sa Dios sa pangamuyo subong? Gamita ang iya ngalan nga Jehova, kag maghambal sing tinagipusuon. (Salmo 62:8) Luyag ni Jehova nga mangin abyan mo sia. (Isaias 55:6; Santiago 2:23) Ang pangamuyo isa ka paagi sang komunikasyon nga puede mo himuon bisan diin kag bisan ano nga oras.
Suno sa American Foundation for Suicide Prevention, “masami nga makita sa mga pagtuon nga madamo sa mga nagahikog, mga 90% ukon labaw pa, ang may balatian sa panghunahuna. Pero sa masami wala mahibaluan, mapakonsulta, ukon mapabulong ang ila balatian”
Ang mga tawo nga nagaulikid. Importante ka para sa iban, lakip na sa imo pamilya ukon mga abyan nga nagakabalaka gid sa imo. May mga tawo man nga nagaulikid sa imo bisan pa indi kamo kilalahay. Halimbawa, kon kaisa may makilala nga problemado nga mga tawo ang mga Saksi ni Jehova sa ila pagwali, ang iban sa ila nag-ako nga luyag gid nila sang bulig kag nagahunahuna nga maghikog. Ang pagwali sa mga balay nagahatag sing kahigayunan sa mga Saksi ni Jehova nga buligan ini nga mga tawo. Nagakabalaka ang mga Saksi ni Jehova sa ila isigkatawo bangod ginasunod nila ang halimbawa ni Jesus. Nagaulikid sila sa imo.—Juan 13:35.
Propesyonal nga bulig. Ang paghunahuna nga maghikog masami sintomas sang problema sa emosyon, pareho sang depresyon. Indi ka dapat mahuya kon may balatian ka sa emosyon, pareho man kon may balatian ka sa pisikal. Ang matuod, ginatawag ang depresyon nga “kinaandan nga trangkaso sang hunahuna.” Bisan sin-o puede malatnan sini, kag mahimo ini mabulong. *
DUMDUMA INI: Mabudlay nga makalampuwas sa depresyon kon ikaw lang. Pero kon magpabulig ka, masarangan mo ini.
KON ANO ANG MAHIMO MO SUBONG: Magpangita sang masaligan nga doktor para bulngon ang imo balatian sa emosyon pareho sang depresyon.
^ par. 8 Kon pirme mo lang ginahunahuna nga maghikog, hibalua kon ano nga mga bulig ang sarang mo matigayon, mahimo paagi sa pagtawag sa suicide prevention hotline ukon sa mental hospital. May mga tawo diri nga ginhanas para maghatag sang bulig sa imo.
Basi Manamian Ka Man
MAGMATA!
Padayon nga Mabuhi—Bangod May Paglaum
Pareho sang kasanag, mabuligan ka man sang paglaum nga malampuwasan ang kadulom sang kabuhi.
SABAT SA MGA PAMANGKOT SA BIBLIA
Buligan Bala Ako sang Dios Kon Magpangamuyo Ako?
Nagaulikid gid bala ang Dios sa aton mga problema?
