Ngaa nagpati ka anay sa ebolusyon?

Bisan pa ginpadaku ako nga Katoliko, nagaduhaduha ako nga may Dios. Halimbawa, daw indi ko mabaton nga ginasunog sang Dios ang mga tawo sa impierno. Gani sang gintudluan ako sang mga propesor sa unibersidad nga ang buhi nga mga butang naghalin sa ebolusyon kag wala gintuga sang Dios, ginbaton ko dayon ini, nga nagahunahuna nga ginasuportahan ini sang ebidensia. Kag wala man ginsikway sang amon simbahan ang ebolusyon, kundi ginkabig ini nga paagi sang Dios.

Ngaa nangin interesado ka sa Biblia?

Ang akon asawa nga si Susana nagtuon sa Biblia sa mga Saksi ni Jehova. Ginpakita nila sa iya sa Biblia nga wala ginasilutan sang Dios ang mga tawo sa kalayuhon nga impierno. * Ginpakita man nila sa iya ang promisa sang Dios nga himuon ang aton planeta nga paraiso. * Nasapwan gid man namon ang panudlo nga makatarunganon! Sang 1989, ang Saksi nga si Nick nagbisita sa akon. Sang nagaistoryahanay kami parte sa lawas sang tawo kag sa ginhalinan sini, nagdayaw gid ako sa simple nga paathag sang Biblia nga makita sa Hebreo 3:4 nga nagasiling nga “ang tagsa ka balay may nagtukod, apang sia nga nagtukod sang tanan nga butang amo ang Dios.”

Nabuligan ka bala sang imo pagtuon sa lawas sang tawo nga batunon ang pagpanuga?

Huo. Halimbawa, gindesinyo sang maayo ang paagi sang aton lawas nga ayuhon ang kaugalingon sini. Pareho sang pag-ayo sang pilas, nagalakip ini sang apat ka sunodsunod nga proseso, kag ginapahanumdom ako sini nga bilang manug-opera, nagabulig lang ako sa sistema sang lawas sa pagpaayo sang iya kaugalingon.

 Sugiri kami, ano ang nagakatabo sa lawas kon mapilasan ini?

Sa sulod sang pila lang ka segundo, ang una nga proseso nga amo ang pagpauntat sang pagdugo nagakatabo. Tuman gid ka komplikado kag ka epektibo sini nga proseso. Dugang pa, ang aton circulatory system nga mga 100,000 ka kilometro ang kalabaon sang mga ugat, mahimo nga ginakahisaan sang mga plumbing engineer, kay may paagi ini nga takpan ang buslot kag ayuhon ang iya kaugalingon.

Ano naman ang nagakatabo sa ikaduha nga proseso sang pagkay-o?

Sa sulod sang pila ka oras, mauntat ang pagdugo kag masugod ang paghubag nga nagalakip sang makatilingala nga proseso. Una, ang ugat nga nagkipot anay para mabuhinan ang pagdugo, nagadaku para madugangan ang dugo sa pilas. Dayon, magahubag ang nahalitan nga parte bangod sa madamo sing protina nga likido. Kinahanglan ini nga likido para mabatuan ang impeksion, maglasaw ang hilo, kag makakas ang nahalitan nga mga tisyu. Ang tagsa ka proseso sunodsunod nga nagapatubas sang minilyon ka pinasahi nga molekula kag selula. Ang iban nga proseso amo ang nagapabaskog sa nagasunod nga proseso, kag pagkatapos mauntat na ini.

Paano nagapadayon ang pag-ayo?

Sa sulod sang duha ka adlaw, nagapatubas ang aton lawas sang mga materyales para sa pagkay-o, ang proseso nga nagapakita nga magasugod na ang ikatlo nga proseso nga magadugay sing mga duha ka semana. Ang mga selula nga nagaporma nga fiber sa palibot sang pilas, nagasaylo sa pilas mismo kag nagadamo. Nagatubo man ang magagmay nga mga ugat sa pilas, nga nagakuha sang mga higko kag nagasuplay sang dugang pa nga nutrisyon sa tion sang pagguba kag pagkay-o. Sa isa pa ka komplikado nga proseso, ginapatubas ang pinasahi nga mga selula nga nagapakipot sang pilas.

Baw, grabe kadamo nga obra ba! Daw ano kadugay ini matapos?

Ang pinakaulihi nga proseso, ang pagpatahom, mahimo maglawig sing binulan. Ang mga nabali nga tul-an nagabalik sa orihinal nga kabaskugon sini, kag ang mga fiber nga ara sa pilas ginaislan sang mas mabakod nga materyales. Sa kabilugan, ang pag-ayo sang pilas isa ka makatilingala nga halimbawa sang mataas nga kalidad sang kooperasyon.

May madumduman ka bala nga hitabo nga nakapadayaw gid sa imo?

Huo. May ginbulong ako sadto nga 16 anyos nga nadisgrasya sa salakyan. Delikado gid ang kahimtangan sang dalagita nga napilasan sa spleen kag nag-internal bleeding. Sadto, ginaoperahan namon ini para kay-uhon ukon kuhaon. Pero subong, mas nagasalig ang mga doktor sa ikasarang sang lawas nga ayuhon ang kaugalingon sini. Ginbulong ko lang ang iya impeksion, nadula nga likido, anemia, kag kasakit. Pagkatapos sang pila lang ka semana, nakita sa scan nga nag-ayo na ang iya spleen! Sang nakita ko kon paano ginaayo sang lawas ang kaugalingon sini, nagdayaw gid ako. Kag nangin mas kumbinsido ako nga gindesinyo gid kita sang Dios.

Ngaa nanamian ka sa mga Saksi ni Jehova?

Mainabyanon sila, kag pirme nila ginasabat ang akon mga pamangkot paagi sa Biblia. Nagadayaw man ako sa ila kaisog nga ipaambit ang ila pagpati kag buligan ang iban nga makatuon parte sa Dios.

Tungod nangin Saksi ni Jehova ka, nakabulig bala ini sa imo obra?

Huo. Nabuligan ako sini nga maatubang ang compassion fatigue, isa ka emosyonal nga kalapyo nga masami nagaapektar sa mga doktor kag nars nga nagaatubang pirme sa mga tawo nga napatay ukon nahalitan. Kag kon luyag sang pasyente makig-istorya, mapaathag ko sa iya ang promisa sang Manunuga nga dulaon ang mga balatian kag pag-antos * kag paluntaron ang kalibutan nga wala na sang isa nga magasiling, “Nagamasakit ako.” *