MAHUYUGON gid magboksing si Hilton. Sa edad nga siete anyos, pirme sia nagapakig-away sa sulod kag sa gua sang boxing ring! Sang hayskul sia, nagalagaw sila sang iya mga abyan agod mangita sing saputihon. “Nagapangawat ako, nagasugal, nagalantaw sing pornograpiya, nagapangbastos sing mga babayi, kag ginabuyayaw ko ang akon mga ginikanan,” siling niya. “Katonto gid sa akon amo nga pagdumdom sang akon mga ginikanan indi na gid ako magbag-o. Pagkatapos ko sa hayskul, naghalin ako sa balay.”

Sang magbalik si Hilton pagligad sang 12 ka tuig, daw indi makapati ang iya mga ginikanan nga anak nila sia! Kalmado sia, indi maakigon, kag matinahuron. Ano ang nagpabag-o sa iya? Sang wala na sia sa ila balay, ginbinagbinag niya kon diin nagapadulong ang iya kabuhi. Nagbasa sia sing Biblia agod tan-awon kon bala makabulig ini sa iya sa pagbag-o. “Gin-aplikar ko ang akon nabasa sa Biblia,” siling ni Hilton, “nga buot silingon, ginbag-o ko ang akon daan nga personalidad kag gintuman ang sugo sa Efeso 6:2, 3 nga padunggan ang akon mga ginikanan. Sa una nga tion sa akon kabuhi, nalipay gid ako, kag nalipay man si Tatay kag si Nanay nga wala na sila sing ugtasan!”

Ginapadaku sang natabo kay Hilton nga ang Biblia praktikal kag ang mga kinaiya nga ginasambit sa sini may gahom sa pagpabag-o sa isa ka tawo. (Hebreo 4:12) Binagbinagon naton ang pila sini nga kinaiya nga amo ang pagkabunayag, pagpugong sa kaugalingon, katutom, kag gugma, kag kon paano ini makapauswag sang kabuhi.