Ano ang Ngalan sang Dios?
Kon gusto mo makilala ang isa, ang una mo nga ginapamangkot, “Ano imo ngalan?” Kon ipamangkot mo ini sa Dios, ano ang iya sabat?
“Ako si Jehova. Amo ina ang akon ngalan.”—Isaias 42:8.
Bag-o mo pa lang bala nabatian ina nga ngalan? Indi ina katingalahan kay madamo nga translator sang Biblia ang wala nagagamit sang ngalan sang Dios. Ginbuslan nila ini sing titulo nga “GINUO.” Pero mga 7,000 ka beses nga makita ang ngalan sang Dios sa orihinal nga kopya sang Biblia. Ang ngalan may apat ka Hebreo nga letra, nga sa Ingles YHWH ukon JHVH, kag madugay na nga gin-translate ini nga “Jehova” sa Hiligaynon.
Dead Sea Psalms Scroll Unang siglo C.E., HEBREO
Translation ni Tyndale 1530, INGLES
Reina-Valera nga bersion 1602, SPANISH
Union Version 1919, CHINESE
Ang ngalan sang Dios makita sa orihinal nga Hebreo nga Biblia kag sa madamo nga translation
IMPORTANTE ANG NGALAN SANG DIOS
Importante sa Dios ang iya ngalan. Wala sing naghatag sang ngalan sang Dios; sia ang nagpili sini. Si Jehova nagsiling: “Amo ini ang akon ngalan tubtob san-o, kag paagi sini dumdumon ako sang tanan nga kaliwatan.” (Exodo 3:15) Sa Biblia, mas madamo ang ngalan sang Dios sangsa iya mga titulo, pareho sang Labing Gamhanan, Amay, Ginuo, ukon Dios, kag mas madamo ini sangsa iban nga ngalan, pareho sang Abraham, Moises, David, ukon Jesus. Kabubut-on man ni Jehova nga makilala ang iya ngalan. Ang Biblia nagasiling: “Kabay nga mahibaluan sang mga tawo nga ikaw, nga ang ngalan amo si Jehova, ikaw lamang ang Labing Mataas sa bug-os nga duta.”—Salmo 83:18.
Importante kay Jesus ang ngalan sang Dios. Sa Amay Namon ukon Pangamuyo sang Ginuo, gintudluan ni Jesus ang iya mga sumulunod nga magpangamuyo sa Dios: “Pakabalaanon ang imo ngalan.” (Mateo 6:9) Nangamuyo si Jesus sa Dios: “Amay, himayaa ang imo ngalan.” (Juan 12:28) Gin-una ni Jesus ang paghimaya sa ngalan sang Dios, amo nga nakapangamuyo sia: “Ginpakilala ko ang imo ngalan sa ila kag padayon ko nga ipakilala ini.”—Juan 17:26.
Importante ang ngalan sang Dios sa mga nakakilala sa iya. Nahibaluan sang katawhan sang Dios sang una nga maamligan sila kag maluwas bangod sa pinasahi nga ngalan sang Dios. “Ang ngalan ni Jehova isa ka torre nga mabakod. Ang matarong nagadalagan sa sini kag ginaamligan.” (Hulubaton 18:10) “Ang tagsatagsa nga nagatawag sa ngalan ni Jehova maluwas.” (Joel 2:32) Ginapakita sang Biblia nga makilala ang mga nagaalagad sa Dios paagi sa iya ngalan. “Ang tanan nga tawo magalakat sa ngalan sang ila dios, apang magalakat kita sa ngalan ni Jehova nga aton Dios sa wala sing katubtuban.”—Miqueas 4:5; Binuhatan 15:14.
KON ANO ANG GINAPAKITA SANG NGALAN
Ang ngalan nagapakilala sa Dios. Madamo nga iskolar ang nagsiling nga ang ngalan nga Jehova nagakahulugan sing “Ginapahanabo Niya nga Mangin Amo.” Ginsugid ni Jehova nga Dios ang kahulugan sang iya ngalan sang nakighambal sia kay Moises: “Mangin Amo Ako Kon Ano ang Luyag Ko nga Mangin Amo Ako.” (Exodo 3:14) Gani ang ngalan sang Dios nagapakita nga indi lang sia ang Manunuga sang tanan nga butang, kundi may ikasarang man sia nga mapahanabo sa iya kaugalingon ukon sa iya mga tinuga ang bisan ano para matuman ang iya kabubut-on. Bisan pa nga ginapakita sang mga titulo ang posisyon, awtoridad, ukon gahom sang Dios, ang ngalan lamang niya nga Jehova ang nagarepresentar kon sin-o sia kag kon ano ang iya mahimo.
Ginapakita sang ngalan nga interesado ang Dios sa aton. Ang ngalan sang Dios nagapahangop nga palangga niya ang iya mga tinuga, lakip kita. Dugang pa, ginsugid sang Dios ang iya ngalan kay gusto niya nga makilala naton sia. Sia pa gani ang una nga nagpakilala sa aton. Gani maathag nga gusto sang Dios nga mangin malapit kita sa iya kag kilalahon naton sia bilang matuod nga Persona, indi isa ka misteryoso nga diosdios nga mabudlay palapitan.—Salmo 73:28.
Ginapakita naton nga interesado kita sa Dios kon gamiton naton ang iya ngalan. Halimbawa, gusto mo nga tawgon ka sa ngalan sang imo mangin abyan. Ano ang imo batyagon kon indi ka niya pagtawgon sa imo ngalan? Mahimo sa ulihi magapalibog ka kon bala gusto gid niya nga mangin suod sa imo. Pareho man sini sa Dios. Ginsugid ni Jehova ang iya ngalan, kag gusto niya nga gamiton naton ini. Kon himuon naton ini, ginapakita naton nga gusto naton mangin suod kay Jehova. Ginatalupangod gid niya ang “mga nagapamalandong [ukon, “nagapakabahandi,” footnote] sa iya ngalan!”—Malaquias 3:16.
Ang paghibalo sang ngalan sang Dios importante gid para makilala sia. Pero dapat may himuon pa kita. Dapat kilalahon naton ang Persona nga nagagamit sina nga ngalan. Dapat hibaluon naton kon ano ang iya mga kinaiya.
ANO ANG NGALAN SANG DIOS? Si Jehova ang ngalan sang Dios. Ginapakita sini nga ngalan nga ang Dios isa ka Persona nga makatuman sang iya katuyuan
Basi Manamian Ka Man
IMPORTANTE NGA MGA PANUDLO SANG BIBLIA
May Ngalan Bala ang Dios?
Ang Dios may madamo nga titulo, lakip ang Labing Gamhanan, Manunuga, kag Ginuo. Pero ang personal nga ngalan sang Dios gingamit sing mga 7,000 ka beses sa Biblia.
SABAT SA MGA PAMANGKOT SA BIBLIA
Sin-o si Jehova?
Sia bala ang Dios sang isa lang ka grupo sang mga tawo, pareho sang mga Israelinhon?
SABAT SA MGA PAMANGKOT SA BIBLIA
Pila ang Ngalan sang Dios?
Nagapati ang mga tawo nga ang ngalan sang Dios amo ang ‘Allah,’ ‘Alpha kag Omega,’ ‘El Shaddai,’ kag ‘Jehova-Jireh.’ Importante bala kon ano ang pagtawag naton sa Dios?
ANG LALANTAWAN
