Ano ang Ngalan sang Dios? Ang Dios mismo nagsiling: “Ako si Jehova. Amo ina ang akon ngalan.” (Isaias 42:8) Ang personal nga ngalan sang Dios makita sing mga 7,000 ka beses sa Biblia. Pero, gin-islan sang madamo nga translation sang Biblia ina nga ngalan sing mga titulo, pareho sang “Ginuo.” Gusto sang Dios nga mangin abyan ka niya, amo nga ginaagda ka niya nga ‘magpanawag sa iya ngalan.’—Salmo 105:1.

Mga Titulo ni Jehova. Ang Biblia nagagamit man sing mga titulo sa pagtawag kay Jehova subong sang “Dios,” “Labing Gamhanan,” “Manunuga,” “Amay,” “Ginuo,” kag “Soberano.” Madamo nga pangamuyo kay Jehova nga nasulat sa Biblia ang nagagamit sing matinahuron nga titulo kag sang iya personal nga ngalan, nga Jehova.—Daniel 9:4.

 Dagway sang Dios. Ang Dios isa ka indi makita nga espiritu. (Juan 4:24) Ang Biblia nagsiling nga “wala sing tawo nga nakakita sa Dios.” (Juan 1:18) Ginasugid sang Biblia ang iya mga ginabatyag. Ang ginahimo sang mga tawo puede makapasubo, ukon ‘makapahamuot sa iya.’—Hulubaton 11:20; Salmo 78:40, 41.

Dalayawon nga mga Kinaiya sang Dios. Ang Dios wala sing ginapasulabi sa mga tawo bisan ano man ang ila nasyonalidad kag gindak-an. (Binuhatan 10:34, 35) Dios man sia nga “maluluy-on kag mainawaon, indi dali maakig kag bugana sa mainunungon nga gugma kag kamatuoran.” (Exodo 34:6, 7) Pero, may apat ka kinaiya ang Dios nga nagapangibabaw gid.

Gahom. Bangod sia ang “Dios nga Labing Gamhanan,” wala sing limitasyon ang iya gahom para tumanon ang bisan ano nga iya ginpromisa.—Genesis 17:1.

Kaalam. Ang kaalam sang Dios labaw sangsa kaalam sang bisan sin-o. Amo nga ginapatuhuyan sia sang Biblia nga “amo lamang ang maalam.”—Roma 16:27.

Katarungan. Pirme husto ang tanan nga ginahimo sang Dios. Ang iya mga ginahimo “himpit” kag “wala gid sing pagkadimatarong sa iya.”—Deuteronomio 32:4.

Gugma. Ang Biblia nagasiling nga “ang Dios gugma.” (1 Juan 4:8) Wala lang niya ini ginapakita—kundi sia gid ang personipikasyon sang gugma. Ang iya wala tupong nga gugma makita sa tanan niya nga ginahimo, kag makabenepisyo kita sa sini sa madamo nga paagi.

Ang Pagpakig-abyan sang Dios sa mga Tawo. Ang Dios amo ang aton mapinalanggaon nga Amay sa langit. (Mateo 6:9) Kon magtuo kita sa iya, mangin abyan kita niya. (Salmo 25:14) Ang matuod, ginaagda ka sang Dios nga magpalapit sa iya paagi sa pagpangamuyo kag ‘itugyan sa iya ang tanan mo nga kabalaka, kay nagaulikid sia sa imo.’—1 Pedro 5:7; Santiago 4:8.

Si Jesus Indi Amo ang Dios. Si Jesus pinasahi—sia lamang ang direkta nga gintuga sang Dios. Amo kon ngaa ang Biblia nagatawag sa iya nga Anak sang Dios. (Juan 1:14) Pagkatapos gintuga ni Jehova si Jesus, gingamit ni Jehova ang iya panganay bilang “batid nga manugpangabudlay” sa pagtuga sang tanan iban pa nga tinuga.—Hulubaton 8:30, 31; Colosas 1:15, 16.

 Si Jesucristo wala nangangkon nga Sia ang Dios. Sa baylo, nagsiling sia: ‘Tiglawas ako sang Dios, kag inang Isa ang nagpadala sa akon.’ (Juan 7:29) Sang nakig-istorya sia sa isa sa iya mga disipulo, gintawag ni Jesus si Jehova nga “akon Amay kag inyo Amay” kag “akon Dios kag inyo Dios.” (Juan 20:17) Sang napatay si Jesus, ginbanhaw sia ni Jehova para magkabuhi sa langit kag ginhatagan sing daku nga awtoridad sa Iya tuo nga kamot.—Mateo 28:18; Binuhatan 2:32, 33.

Mabuligan Ka ni Jesucristo nga Mangin Suod sa Dios

Nagkari si Jesus sa duta para tudluan kita parte sa iya Amay. Nagsiling si Jehova parte kay Jesus: “Ini ang akon Anak, ang hinigugma. Magpamati kamo sa iya.” (Marcos 9:7) Mas kilala ni Jesus ang Dios sangsa kay bisan sin-o. Nagsiling si Jesus: “Wala sing nakakilala sa Amay kundi ang Anak, kag ang bisan sin-o nga luyag sang Anak nga magpaathag tuhoy sa iya.”—Lucas 10:22.

Perpekto nga ginpakita ni Jesus ang mga kinaiya sang Dios. Gin-ilog gid sing maayo ni Jesus ang mga kinaiya sang iya Amay amo nga makasiling sia: “Ang bisan sin-o nga nakakita sa akon nakakita man sa Amay.” (Juan 14:9) Ginpakita ni Jesus sa iya ginhambal kag ginhimo ang gugma sang iya Amay, gani nangin suod ang mga tawo sa Dios. Nagsiling sia: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Nagsiling pa gid sia: “Ang matuod nga mga sumilimba magsimba sa Amay sa espiritu kag kamatuoran, kay amo ini nga sahi sang mga sumilimba ang ginapangita sang Amay nga magasimba sa iya.” (Juan 4:23) Imadyina ina! Si Jehova nagapangita sing tawo pareho sa imo nga gusto makatuon sang kamatuoran parte sa iya.