Ang Ginasiling sang Iban Parte sa Pagpangamuyo

I-PLAY

“Kon nagapangamuyo ako, pamatyag ko daw ara lang sa tupad ko ang Dios. Daw ginauyatan niya ang akon kamot kag ginabuligan ako kon indi ako kabalo sang akon himuon.”—MARÍA.

“Napatay ang akon asawa pagkatapos sang 13 ka tuig nga pagpakigbato sa kanser. Madumduman ko pa nga nagapangamuyo ako sa Dios kada adlaw kag nabatyagan ko nga nagapamati gid sia samtang ginapautwas ko ang akon kasakit. Dayon nakabatyag ako sing kalinong.”—RAÚL.

“Ang pagpangamuyo isa gid ka matahom nga regalo sang Dios sa mga tawo.”—ARNE.

Para kanday María, Raúl, Arne, kag sa madamo pa, ang pangamuyo isa ka espesyal nga regalo. Nagapati sila nga paagi sa pangamuyo, maistorya nila ang Dios, mapasalamatan sia, kag makapangayo sang bulig sa iya. Kumbinsido gid sila sa ginasiling sang Biblia parte sa pagpangamuyo sa Dios: “May pagsalig kita sa iya, nga bisan ano ang ipangamuyo naton suno sa iya kabubut-on, magapamati sia sa aton.”—1 Juan 5:14.

Pero madamo nga tawo ang nabudlayan magpati sa ginasiling sang Biblia parte sa pangamuyo. Nadumduman ni Steve kon ano ang iya ginbatyag sadto parte sa pagpangamuyo: “Sang mag-17 anyos ako, ang tatlo ko ka abyan napatay sa aksidente. Ang isa napatay sa aksidente sa salakyan kag ang duha nalumos sa dagat.” Ano ang ginhimo ni Steve? “Nangamuyo ako sa Dios kag ginpamangkot ko sia kon ngaa natabo ini. Pero wala gid ako sing nabaton nga sabat. Gani ginpamangkot ko ang akon kaugalingon, ‘Ngaa mangamuyo pa ’ko?’” Madamo ang nagabatyag nga daw wala ginasabat ang ila mga pangamuyo, gani nagapamensar sila kon may pulos gid man bala ang pagpangamuyo.

May iban pa nga rason kon ngaa ginakuestyon sang mga tawo ang pulos sang pagpangamuyo. Ang pila sa ila nagasiling nga bal-an sang Dios ang tanan nga butang, kag kabalo na sia sang aton mga kinahanglanon ukon mga problema, gani indi na kinahanglan nga isugid ini sa iya.

Ang iban naman nagapati nga hungod nga wala ginapamatian sang Dios ang ila mga pangamuyo bangod sang mga sala nga ginhimo nila sang una. “Ang pinakadaku ko gid nga problema,” siling ni Jenny, “amo nga nagabatyag ako nga wala sing pulos. Nakahimo ako sang mga butang nga ginhinulsulan ko, gani ginakumbinsi ko ang akon kaugalingon nga wala sing rason para pamatian ako sang Dios.”

Ano ’ya ang imo pagpati parte sa pagpangamuyo? Kon pareho man sini ang imo mga pagpati ukon pangduhaduha parte sa pangamuyo, malipay ka mabal-an nga may sabat sa sini ang Biblia. Masaligan mo ang sabat sang Biblia parte sa pangamuyo. * Mabuligan ka sini nga makita ang sabat sa mga pamangkot pareho sang:

Ginapamatian gid bala sang Dios ang aton mga pangamuyo?
Ngaa may mga pangamuyo nga wala ginasabat?
Paano mo masiguro nga pamatian sang Dios ang imo mga pangamuyo?
Ano ang mabulig sa imo sang pangamuyo?

^ par. 9 Mabasa sa Biblia ang mga pangamuyo sang madamo nga alagad sang Dios, lakip ang mga pangamuyo ni Jesucristo. Sa Hebreong Kasulatan, nga ginatawag man nga Daan nga Katipan, mabasa ang sobra 150 ka pangamuyo.