“Ang bisan ano nga pangayuon ninyo sa Amay, ihatag niya ini sa inyo sa akon ngalan.”—Juan 16:23.

Maathag nga ginapakita sang ginsiling ni Jesus nga gusto ni Jehova nga mangamuyo kita sa iya, indi paagi sa mga imahen, mga santos, mga anghel, ukon sa aton napatay nga mga katigulangan, kundi paagi sa ngalan ni Jesucristo. Kon nagapangamuyo kita sa Dios paagi sa ngalan ni Jesus, ginapakita ta nga ginakilala naton ang importante nga papel ni Jesus. “Wala sing makakadto sa Amay kon indi paagi sa akon,” siling ni Jesus.—Juan 14:6.

“Ipautwas ninyo sa iya ang inyo ginabatyag.”—Salmo 62:8.

Kon mangamuyo kita kay Jehova, dapat magpakig-istorya kita sa iya pareho sa ginahimo naton kon nagaistorya kita sa isa ka mahigugmaon nga amay. Gani wala naton ginasaulo ang aton mga pangamuyo ukon ginabasa ini halin sa prayer book. Kundi nagahambal kita sing matinahuron kag sing tinagipusuon.

“Bisan ano ang ipangamuyo naton suno sa iya kabubut-on, magapamati sia sa aton.”—1 Juan 5:14.

Sa Biblia, ginasugiran kita ni Jehova nga Dios kon ano ang iya himuon para sa aton kag kon ano ang gusto niya nga himuon naton para sa iya. Para pamatian sang Dios ang aton mga pangamuyo, dapat mangamuyo kita “suno sa iya kabubut-on.” Para mahimo ini, dapat naton tun-an ang Biblia para makilala sia sing maayo. Kon himuon naton ini, malipay sia sa aton mga pangamuyo.

Ipangamuyo ang Imo mga Kinahanglanon. Puede naton ipangamuyo sa Dios ang aton adlaw-adlaw nga mga kinahanglanon—pagkaon, bayo, kag ilistaran. Puede man kita makapangamuyo sing kaalam para makahimo sing insakto nga desisyon kag sing kusog para mabatas ang mga kabudlayan. Puede man kita makapangamuyo sing pagtuo, kapatawaran, ukon sing bulig sang Dios.—Lucas 11:3, 4, 13; Santiago 1:5, 17.

Ipangamuyo ang Iban. Nalipay gid ang mahigugmaon nga mga ginikanan kon ang ila kabataan nagapalanggaanay. Gusto man ni Jehova nga ang iya mga anak sa duta nagaulikid sa isa kag isa. Gani insakto lang nga ipangamuyo naton ang aton bana ukon asawa, kabataan, pamilya, kag mga abyan. “Ipangamuyo ninyo ang isa kag isa,” siling sang disipulo nga si Santiago.—Santiago 5:16.

Magpasalamat. Parte sa aton Manunuga, ang Biblia nagasiling: ‘Nagahimo sia sing maayo, nga nagahatag sa inyo sing ulan halin sa langit kag sing bugana nga patubas sa nagakaigo nga tion, nga nagahatag sing bugana nga kalan-on kag nagapuno sang inyo tagipusuon sing kasadya.’ (Binuhatan 14:17) Kon pamensaron naton ang tanan nga ginhimo sang Dios sa aton, mapahulag kita sini nga pasalamatan sia paagi sa pangamuyo. Kag siempre, dapat man naton ipakita nga nagapasalamat kita sa Dios paagi sa pagsunod sa iya.—Colosas 3:15.

Kon kaisa, mahimo magluya ang aton buot kon daw wala dayon ginasabat ang aton sinsero nga mga pangamuyo. Masiling bala kita nga indi interesado ang Dios sa aton? Indi! Binagbinaga ang masunod nga mga eksperiensia nga nagapakita nga mahimo kinahanglan lang naton magpadayon sa pagpangamuyo.

Si Steve, nga ginsambit kaina, nagsiling, “Kon indi bangod sa pangamuyo, sigurado nga nadulaan na ako sing paglaum.” Ano ang nakabulig sa iya? Nagtuon sia sa Biblia kag natun-an niya nga kinahanglan sia mangamuyo kag dapat padayon niya nga himuon ini. “Nangamuyo ako sa Dios para pasalamatan ang tanan nga mahigugmaon nga bulig nga nabaton ko halin sa akon mga abyan,” siling ni Steve. “Kag mas malipayon na ako subong.”

Kamusta naman si Jenny, nga nagabatyag nga wala sing rason para pamatian sia sang Dios? Nagsiling sia: “Sa tion nga pamatyag ko wala na gid sing paglaum, nakitluoy ako sa Dios nga buligan ako nga maintiendihan kon ngaa nagabatyag ako nga wala sing pulos.” Paano ini nakabulig sa iya? “Ang pagpakig-istorya sa Dios nakabulig sa akon nga tan-awon ang akon kaugalingon base sa pagtan-aw sang Dios, nga bisan pa ginakondenar ako sang akon tagipusuon, wala ako ginakondenar sang Dios. Nakabulig man ini sa akon nga indi mag-untat sa pagpanikasog.” Ano ang resulta? “Ang pangamuyo nakabulig sa akon nga makita si Jehova bilang isa ka matuod, mahigugmaon, kag nagaulikid nga Dios, Amay, kag Abyan. Indi gid niya ako pagpabay-an, kag buligan niya ako basta padayon ako nga manikasog nga himuon ang iya gusto.”

Binagbinaga man ang eksperiensia ni Isabel. Sang nagbusong sia, ginsilingan sia sang iya mga doktor nga ang iya bata mangin dis-ebol. Naglalain gid sia. Ginsilingan pa gani sia sang iban nga dapat niya ini ipahulog. “Daw mapatay ako sa kasubo.” Ano ang ginhimo niya? “Madamo nga beses ako nga nangamuyo sa Dios nga buligan niya ako,” siling niya. Sang ulihi, ginbun-ag niya ang iya bata nga lalaki nga si Gerard, kag dis-ebol ini. Para bala kay Isabel ginsabat sang Dios ang iya mga pangamuyo? Huo! Ngaa nasiling niya ina? “Samtang ginalantaw ko ang akon bata, nga subong 14 anyos na kag malipayon bisan pa dis-ebol sia,” siling ni Isabel, “narealisar ko nga sia amo ang pinakamaayo nga sabat sa akon mga pangamuyo, ang pinakadaku nga pagpakamaayo nga ginhatag sa akon ni Jehova nga Dios.”

Ining sinsero nga mga tinaga ni Isabel nagapahanumdom sa aton sang ginsiling sang salmista: “Pamatian mo ang pangabay sang mahagop, O Jehova. Palig-unon mo ang ila tagipusuon kag pamatian sila.” (Salmo 10:17) Maayo gid ini nga mga rason para magpadayon sa pagpangamuyo!

Mabasa naton sa Biblia ang madamo nga pangamuyo ni Jesus. Ang pinakabantog sa sini amo ang pangamuyo nga gintudlo niya sa iya mga disipulo. Ano ang matun-an naton sa sini?