Posible magbatyag kita nga wala sing mahimo kon ang isa naton ka abyan may problema sa mental health. Pero mapakita naton nga nagaulikid gid kita sa iya paagi sa pagbulig sa iya nga maatubang ang iya sitwasyon. Paano?

“Mangin maabtik sa pagpamati.”—SANTIAGO 1:19.

Ang isa sa pinakamaayo nga paagi para mabuligan ang imo abyan amo ang pagpamati sa iya kon gusto niya maghambal. Indi man kinahanglan nga may isabat ka gid sa tanan niya nga isiling. Ipabatyag sa iya nga ginapamatian mo gid sia, kag nagaulikid ka sa iya. Tinguhai nga intiendiha kon ano ang iya ginabatyag, kag indi dayon magkonklusion ukon maghukom. Tandai nga posible may mahambal sia nga indi niya hungod kag hinulsulan niya sa ulihi.—Job 6:2, 3.

‘Maglugpay.’—1 TESALONICA 5:14.

Mahimo nga indi mahim-os ang imo abyan, ukon nagabatyag sia nga wala sing pulos. Mapaumpawan mo sia kag mapalig-on kon pasaligon mo sia nga palangga mo sia, bisan indi ka kabalo kon ano gid ang dapat mo isiling.

“Ang matuod nga abyan nagahigugma sa tanan nga tion.”—HULUBATON 17:17.

Magtanyag sing bulig. Indi pagpensara nga bal-an mo na kon paano sia buligan, kundi pamangkuta sia kon ano nga bulig ang iya kinahanglan. Kon indi mahambal sang imo abyan kon ano ang iya kinahanglan, tinguhai nga magpanugda sang buluhaton  nga puede mo sia updan, pareho abi sang paglakatlakat. Ukon puede ka man magtanyag nga ikaw ang manindahan, maninlo, ukon maghimo sang iban pa nga ulubrahon.—Galacia 6:2.

“Mangin mapinasensiahon.”—1 TESALONICA 5:14.

Basi indi pa gusto sang imo abyan nga mag-istorya. Pasaliga sia nga handa ka gid mamati kon gusto na niya maghambal. Bangod sa iya ginabatyag, posible may mahambal sia ukon mahimo nga makasakit sang imo balatyagon. Basi abuton sia kag indi na niya pagdayunon ang inyo plano ukon gulpi lang sia maakig. Gani mangin mapinasensiahon kag intiendiha sia samtang ginatinguhaan mo nga buligan sia.—Hulubaton 18:24.

“Ginatinguhaan ko gid nga ara ako kon gusto niya nga may maistorya nga abyan. Bisan indi ko masolusyunan ang iya mga problema, ginatinguhaan ko gid nga mamati sing maayo. Kon kaisa, kinahanglan niya lang nga may mamati sa iya para maghaganhagan ang iya pamatyag.”—Farrah, a nga may abyan nga may eating disorder, anxiety disorder, kag clinical depression.

“May abyan ako nga mabuot gid kag positibo pirme. Gin-agda niya ako nga magkaon sa ila balay. Katawhay gid didto kag nabatyagan ko nga palangga niya ako, gani nasugid ko sa iya ang akon ginabatyag. Nakapalig-on gid ini sa akon!”—Ha-eun, nga may clinical depression.

“Importante gid ang pasensia. Kon may mahimo gani ang akon nga asawa nga nagapaugot sa akon, gina-remind ko ang akon kaugalingon nga nahimo niya ina bangod sa iya balatian. Nakabulig ini sa akon nga indi maakig kag pasensiahan pa gid sia.”—Jacob, nga may asawa nga may clinical depression.

“Daku gid nga bulig sa akon ang akon asawa kag ginapaumpawan gid niya ako. Kon indi ako mapahamtang bangod sa sobra nga kabalaka, wala niya ako ginapilit nga himuon ang indi ko gusto. Amo nga kon kaisa, indi na niya mahimo ang gusto tani niya himuon. Indi gid mabayran ang iya sakripisyo kag konsiderasyon para sa akon.”—Enrico, nga may anxiety disorder.