“MAKALAKAT na ang bus, pero ibilin ang Intsik!” Amo ina ang nabatian ni Alexandra samtang nagapungko sia sa bus, nga nagahulat nga makatabok sa dulunan sang duha ka pungsod sa South America. Nanaug sia para tan-awon kon ano ang nagakatabo kag nakita niya ang pamatan-on nga lalaki nga Intsik nga nabudlayan mag-Espanyol samtang ginapaathag sini ang iya kahimtangan sa guardia sang dulunan. Bangod nagatambong si Alexandra sa Chinese nga kongregasyon sang mga Saksi ni Jehova, nagboluntaryo sia nga mag-interpret.

Ang tawo nagsiling nga legal sia nga residente pero ginkawat ang iya mga dokumento kag kuarta. Sang primero, wala nagpati ang guardia sa iya istorya kag ginsuspetsahan pa gani si Alexandra nga konektado sa ilegal nga pagbaligya sang mga tawo. Sang ulihi, nagpati ang guardia sa paathag sang tawo, pero kinahanglan niya magbayad sing multa kay wala sia sing dokumento. Bangod wala sia sing kuarta, ginpahulam sia ni Alexandra sing $20. Nagpasalamat gid ang tawo, pero nagsiling sia nga bayaran niya si Alexandra sing sobra pa sa sini. Ginpaathag ni Alexandra nga wala sia nagapaabot sing bayad, kag nalipay sia nga magbulig kay sa banta niya amo ini ang dapat himuon. Ginhatagan niya ang lalaki sing pila ka literatura nga base sa Biblia kag ginpalig-on nga magtuon sing Biblia upod sa mga Saksi.

Nalipay gid kita nga mabatian ang parte sa kaalwan nga ginapakita sa mga estranghero, kag sigurado gid nga ginahimo man ini sang mga tawo, may relihion man sila ukon wala. Handa ka man bala nga magsakripisyo para sa iban? Makapainteres gid ini nga pamangkot kay si Jesus nagsiling: “Mas malipayon ang nagahatag sangsa nagabaton.” (Binuhatan 20:35) Interesado man sa sini ang siensia kay nakita sang mga researcher nga makahatag ini sing kaayuhan sa imo. Hibaluon naton kon paano.

Ginapakita sang eksperiensia nga may kaangtanan ang paghatag kag ang kalipay. Si apostol Pablo nagsulat nga “ginahigugma sang Dios ang nagahatag sing malipayon.” Ginapatuhuyan niya ang mga Cristiano nga naghatag sing kinabubut-on nga amot para buligan ang pareho nila nga mga Cristiano nga ginabudlayan. (2 Corinto 8:4; 9:7) Wala si Pablo nagsiling nga naghatag sila bangod malipayon sila. Ang matuod, nangin malipayon sila bangod naghatag sila.

Suno sa isa ka pagtuon, ang paghatag “nagapukaw sang bahin sang utok nga naangot sa kalipay, pagpakig-angot sa iban, kag pagsalig, nga nagahatag sing kalipay sa isa.” Nakita sa isa pa ka pagtuon nga “mas daku ang kalipay sang mga nagahatag sing kuarta sa iban sangsa ginagasto nila ini para sa ila kaugalingon.”

Nagabatyag ka bala nga daw wala ka sing mahatag bangod sa imo kahimtangan? Ang matuod,  tanan kita makaeksperiensia sing kasadya sa ‘paghatag sing malipayon.’ Basta husto ang motibo sa paghatag, indi kinahanglan nga daku gid ang ihatag. Ang isa sa mga Saksi ni Jehova nagpadala sing sulat sa nagbalhag sini nga magasin lakip ang iya amot. Nagsiling sia: “Sa sulod sang madamo nga tuig, gamay lang ang ginaamot ko nga kuarta sa Kingdom Hall.” Pero, nagsiling pa sia: “Mas daku pa ang ginbalos ni Jehova nga Dios sangsa akon ginhatag. . . . Salamat gid kay ginhatagan ninyo ako sing kahigayunan nga ihatag ini nga regalo—nakapaumpaw gid ini sa akon.”

Pero indi lang kuarta ang puede ihatag. Madamo pa sing paagi nga makahatag kita.

Ang Biblia nagasiling: “Ang mabuot nga tawo nagadala sing kaayuhan sa iya kaugalingon, apang ang mapintas nga tawo nagadala sing halit sa iya kaugalingon.” (Hulubaton 11:17) Ang maayo nga mga tawo maalwan, nga handa magsakripisyo sang ila kaugalingon—sang ila tion, kusog, atension, kag iban pa. Ang paghimo sini nakahatag sing madamo nga benepisyo sa ila, kag lakip na sa sini ang kaayuhan sa ila panglawas.

Ginapakita sang mga pagtuon nga ang mga nagaboluntaryo sa pagbulig sa iban mas diutay ang ginabatyag nga sakit kag depresyon. Buot silingon, mas maayo ang ila panglawas. Ang paghatag sing kinabubut-on nagapaayo man sa pamatyag sang may malala nga mga balatian, pareho sang multiple sclerosis ukon HIV. Ginapakita man nga kon nagabulig sa iban ang mga palahubog nga gusto magbag-o, mas daku ang posibilidad nga malikawan nila ang depresyon kag indi na magbalik sa ila bisyo.

Paano? Ginapakita nga ang “pagbatyag sing kaluoy kag kaayo nagabuhin sang negatibo nga balatyagon.” Ang paghatag mahimo man magbuhin sang stress kag magpanubo sang presyon sa dugo. Kag ang mga napatyan sing tiayon mas madasig nga maumpawan sa depresyon kon nagabulig sila sa iban.

Gani, ang paghatag makapaayo gid sa imo.

Si Jesus nagpalig-on sa iya mga sumulunod: “Himua nga kinabatasan ang paghatag sa iban, kag sila magahatag sa inyo. Ibubo nila sa inyo sabak ang bug-os nga sukob nga nadasok, nauyog, kag nagaawas. Kay kon ano nga talaksan ang ginagamit ninyo sa iban, amo man nga talaksan ang gamiton nila sa inyo.” (Lucas 6:38) Kon nagahatag ka, sa masami ang mga tawo magabalos man sa imo kaalwan kag mangin mahinatagon man sila. Gani ang paghatag nagapalig-on sing pagbuligay kag pag-abyanay.

Natalupangdan sang mga nagatuon parte sa kaangtanan sang mga tawo nga “ang mga tawo nga padayon nga nagabulig nagapalig-on sa iban nga mangin mabinuligon man.” Ang matuod, “bisan ang pagbasa lang parte sa tumalagsahon nga pagpakita sing kaayo nagapahulag sa mga tawo nga mangin mas maalwan.” Gani suno sa isa ka pagtuon, “ang kada miembro sang isa ka grupo makaimpluwensia sa madamo nga tawo ukon ginatos pa gani, nga ang iban indi niya kilala kag wala pa niya makita.” Buot silingon, ang isa  lang ka buhat sang kaalwan padayon nga makaimpluwensia sa madamo nga tawo sa bilog nga komunidad. Indi bala nga gusto mo mag-istar sa sina nga klase sang lugar? Huo, madamo gid sing benepisyo kon mas madamo nga tawo ang mahinatagon.

Ang isa ka eksperiensia nga nagapakita sing positibo nga epekto sini natabo sa Florida, U.S.A. Ang isa ka grupo sang mga Saksi ni Jehova nagboluntaryo sa pagbulig pagkatapos sang makahalalit nga bagyo. Samtang nagahulat sila sing materyales para sa balay nga ila kay-uhon, natalupangdan nila nga naguba ang kudal sang kaingod, gani nagboluntaryo sila nga kay-uhon ini. “Nagapasalamat gid ako,” sulat sang kaingod sa ulong talatapan sang mga Saksi ni Jehova pagligad sang pila ka tion. “Para sa akon, lakip sila sa pinakamaayo nga mga tawo nga nakilala ko.” Bangod nagapasalamat gid sia, nagpadala sia sing daku nga amot para sa ginatawag niya nga pinasahi nga hilikuton sang mga Saksi.

Ang talalupangdon gid nga natukiban sa mga pagtuon amo nga “normal na sa tawo ang pagbulig sa iban.” Ang mga kabataan, suno sa pagtuon, “nagabulig na sa iban antes pa sila makahibalo maghambal.” Ngaa? Ang Biblia nagasiling nga ang tawo gintuga “suno sa larawan sang Dios,” buot silingon, ang mga tawo may maayo nga mga kinaiya nga pareho sa Dios.—Genesis 1:27.

Ang isa sa dalayawon nga mga kinaiya sang aton Manunuga nga si Jehova nga Dios, amo ang kaalwan. Ginhatagan niya kita sang kabuhi kag sang tanan naton nga kinahanglanon para mangin malipayon. (Binuhatan 14:17; 17:26-28) Makilala naton ang aton Amay sa langit kag mahibaluan ang iya mahigugmaon nga mga katuyuan para sa aton paagi sa pagtuon sang iya Pulong, ang Biblia. Ginapakita man sina nga libro nga may gin-aman ang Dios para mangin malipayon kita sa palaabuton. * (1 Juan 4:9, 10) Bangod si Jehova nga Dios ang pinakamaalwan kag ginhimo ikaw sa iya larawan, indi na makapakibot nga ang paghatag—bilang pagsunod sa Dios—makapaayo sa imo kag makapahalipay sa iya.—Hebreo 13:16.

Nadumduman mo bala si Alexandra, nga ginsambit sa umpisa sini nga artikulo? Ano ang resulta sang iya ginhimo? Bisan pa ginsilingan sia sang isa ka pasahero nga daw ginhaboy lang niya ang iya kuarta, ang ginbuligan niya nga tawo nagtawag sa iya mga abyan sa siudad nga pagadulugan sang bus, kag ginbayaran niya dayon ang iya ginhulam nga $20. Dugang pa, ginhimo sang tawo ang ginsiling ni Alexandra, gani nagsugod sia sa pagtuon sing Biblia. Nalipay gid si Alexandra sang nakita niya liwat ang tawo pagligad sang tatlo ka bulan sa Chinese nga kombension sang mga Saksi ni Jehova sa Peru. Para ipakita sang tawo ang iya pagpasalamat sa pagbulig ni Alexandra, gin-agda niya sa iya restawran si Alexandra kag ang mga upod sini nga nagbiyahe pakadto sa kombension.

Ang paghatag kag pagbulig sa iban makahatag gid sing daku nga kalipay. Mangin mas malipayon ka pa gid kon mabuligan mo ang mga tawo nga mas makilala ang ginahalinan sang tanan nga maayo nga regalo—si Jehova nga Dios! (Santiago 1:17) Naeksperiensiahan mo man bala ang mga benepisyo sa paghatag?