Gintuga sang Dios ang aton lawas nga may tumalagsahon nga ikasarang nga mag-ayo. Kon ang lawas mapilas, mabagrasan, ukon matunok, “nagapanghikot sing komplikado ang lawas para ayuhon ang dalagku kag magagmay nga mga pilas.” (Johns Hopkins Medicine) Ginapatugon dayon sang lawas ang pagdugo, ginapapali ang pilas, kag ginapapag-on ang unod.

BINAGBINAGA: Kon gindesinyo sang Manunuga ang aton lawas nga makaayo sang pilas, indi bala nga dapat saligan naton ang iya promisa nga ayuhon ang aton masakit nga balatyagon? “Ginaayo niya ang buong sing tagipusuon,” sulat sang salmista. “Ginabugkusan niya ang ila mga pilas.” (Salmo 147:3) Pero kon nagaantos ka bangod sa malain nga eksperiensia sadto ukon subong, paano mo masiguro nga bugkusan ni Jehova ang imo mga pilas, subong kag sa palaabuton?

Ang Dios nagapromisa: “Indi ka mahadlok, kay kaupod mo ako. Indi ka magkabalaka, kay ako imo Dios. Pabaskugon ko ikaw, huo, buligan ko ikaw.” (Isaias 41:10) Ang isa nga nakahibalo nga nagaulikid sa iya si Jehova may kalinong sa panghunahuna kag may kusog nga maatubang ang sarisari nga mga pagtilaw. Gintawag ni apostol Pablo ining kalinong nga “paghidait sang Dios nga labaw sa tanan nga paghangop.” Si Pablo nagsiling pa: “Sa tanan nga butang may kusog ako paagi sa isa nga nagapabakod sa akon.”—Filipos 4:4-7, 9, 13.

Ginapabakod sang Biblia ang aton pagtuo sa mga promisa ni Jehova parte sa palaabuton sang katawhan. Halimbawa, ang Bugna 21:4, 5 (nga mabasa sa masunod nga pahina) nagasugid sa aton sang iya himuon kag kon ngaa masaligan naton ini:

• “Pahiran niya ang tagsa ka luha” sa mga mata sang katawhan. Dulaon ni Jehova ang tanan nga pag-antos kag kabalaka, bisan pa daw indi ini salapakon para sa iban.

• Samtang “nagapungko sa trono” nga may himaya, gamiton sang Labing Gamhanan nga Hari sang tanan nga tinuga ang iya gahom kag awtoridad para buligan kita kag para indi na kita mag-antos.

• Ginapasalig ni Jehova nga ang iya mga promisa “matutom kag matuod.” Buot silingon, kon indi matuman ang iya mga promisa, maguba ang iya ngalan bilang matuod nga Dios.

“‘Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.’ Kag ang Isa nga nagapungko sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat mo, kay ini nga mga pulong matutom kag matuod.’”—Bugna 21:4, 5.

Ginapakita sang uniberso kag sang Biblia ang personalidad sang aton Amay sa langit. Bisan pa ang mga tinuga nagapahulag sa aton nga mangin suod nga Abyan sang Dios, ginasilingan kita sang Biblia: “Magpalapit kamo sa Dios, kag magapalapit sia sa inyo.” (Santiago 4:8) Ang Binuhatan 17:27 nagsiling: “Indi sia malayo sa tagsa sa aton.”

Samtang ginakilala mo ang Dios, mangin kumbinsido ka pa gid nga ‘nagaulikid sia sa imo.’ (1 Pedro 5:7) Ano ang kaayuhan sa pagsalig kay Jehova?

Talupangda ang kahimtangan ni Toru, nga taga-Japan. Ginpadaku sia sang iya iloy nga isa ka Cristiano, pero nangin miembro sia sang mapintas nga yakuza, ang Mafia sa Japan. Sia nagsiling: “Nagapati ako nga ginakaugtan ako sang Dios, kag pamatyag ko ginasilutan ako kon mapatay ang akon mga kaupod, ilabi na ang mga suod sa akon.” Gin-aku ni Toru nga bangod sini nga kahimtangan kag panghunahuna, ginkibulan ang iya tagipusuon kag nangin kabalan sia. Parte sa iya ambisyon, nagsiling sia, “Kon makapatay ako sang mas sikat sa akon, OK lang bisan temprano pa ako mapatay.”

 Pero sang nakatuon sila sang Biblia sang iya asawa nga si Hannah, daku gid ang ginbag-o ni Toru. “Nakita ko gid ang pagbag-o sang akon bana,” siling ni Hannah. Subong, si Toru nagsiling: “May Dios gid nga nagaulikid sa kada isa sa aton. Indi niya gusto nga may mapatay, kag handa sia nga patawaron ang mga nagahinulsol. Nagapamati sia sa aton mga ginahambal nga indi naton masugid sa iban kag nahangpan gid niya kita. Sa indi madugay, dulaon ni Jehova ang tanan nga problema, pag-antos, kag kasakit. Bisan subong, ginabuligan niya kita sa wala ginapaabot nga mga paagi. Nagaulikid sia kag nagabulig sa aton kon indi maayo ang aton kahimtangan.”—Salmo 136:23.

Ginapakita sang eksperiensia ni Toru nga ang paghibalo nga masarangan kag malapit na lang dulaon sang Dios ang tanan nga trahedya kag pahiran niya ang tagsa ka luha magahatag sa aton sing pat-od nga paglaum sa palaabuton kag malipayon nga kabuhi subong. Huo, bisan sa kalibutan nga puno sang pag-antos, makabenepisyo ka sa mahigugmaon nga pag-atipan sang Dios.