Gintudluan ni Jesus ang mga tawo nga dapat nila pabaloran ang paghidait. Pero isa ka bes, ginsilingan niya ang iya mga apostoles: “Indi kamo maghunahuna nga nagkari ako sa pagdala sing paghidait sa duta; wala ako magkari sa pagdala sing paghidait, kundi sing espada. Kay nagkari ako sa pagbahinbahin; ang anak nga lalaki batok sa iya amay, ang anak nga babayi batok sa iya iloy, kag ang umagad nga babayi batok sa iya ugangan nga babayi.” (Mat. 10:34, 35) Ano ang buot silingon ni Jesus?

Indi gusto ni Jesus nga gub-on ang mga pamilya, pero kabalo sia nga magaresulta sa pagbahinbahin sang pila ka pamilya ang iya mga gintudlo. Gani, dapat mahangpan sang mga gusto mangin disipulo sang Cristo kag gusto magpabawtismo nga posible maakig ang ila pamilya sa ila desisyon. Kon pamatukan sila sang ila asawa ukon bana ukon sang iban pa nga miembro sang ila pamilya, posible mabudlayan sila nga tumanon ang mga gintudlo sang Cristo.

Ginapalig-on sang Biblia ang mga Cristiano nga ‘magpakighidait sa tanan nga tawo.’ (Roma 12:18) Pero para sa pila ka pamilya, ang mga gintudlo ni Jesus daw nangin pareho sa “espada.” Nagakatabo ini kon ginbaton sang isa ka miembro sang pamilya ang mga gintudlo ni Jesus, pero wala ini ginabaton sang iban nga miembro sang iya pamilya. Kon amo sini ang sitwasyon, nangin “kaaway” sang nagatuon sang kamatuoran ang iya pamilya.—Mat. 10:36.

Kon lainlain ang relihion sang mga miembro sang pamilya, may mga tion nga matilawan kon daw ano ka palangga sang mga nagbaton sang kamatuoran si Jehova kag si Jesus. Halimbawa, posible nga piliton sila sang ila mga paryente nga magselebrar sang mga okasyon nga indi gusto ni Jehova. Sa sini nga sitwasyon, dapat sila magpili kon sin-o ang gusto nila nga malipay sa ila mangin desisyon. Ang ila bala mga paryente ukon si Jehova kag si Jesus? Nagsiling si Jesus: “Ang nagahigugma sa iya amay ukon sa iya iloy labaw sa akon indi takus sa akon.” (Mat. 10:37) Indi buot silingon ni Jesus nga kon gusto sang isa ka tawo nga mangin disipulo niya sia, dapat niya untatan ang pagpalangga sa iya mga ginikanan. Sa baylo, gusto itudlo ni Jesus kon ano ang pinakaimportante. Kon pamatukan sang aton pamilya ang aton pagsimba kay Jehova, padayon naton sila gihapon nga palanggaon, pero mas palangga naton ang Dios kag amo ini ang pinakaimportante para sa aton.

Masubo gid kon pamatukan kita sang aton pamilya. Pero dapat tandaan sang mga disipulo ni Jesus ang iya ginsiling: “Ang bisan sin-o nga wala nagabaton sang iya usok sang pag-antos kag wala nagasunod sa akon indi takus sa akon.” (Mat. 10:38) Buot silingon, dapat batason sang mga Cristiano ang pagpamatok sang pamilya kay nalakip ini sa mga pag-antos nga maeksperiensiahan sang mga disipulo sang Cristo. Pero paagi sa ila maayo nga paggawi, nagalaum sila nga magabag-o ang hunahuna sang mga miembro sang ila pamilya kag mangin interesado man sila sa mensahe sang Biblia.—1 Ped. 3:1, 2.