1-2. Sin-o si Zadok? (1 Cronica 12:​22, 26-28)

 IMADYINA ang sobra 340,000 ka lalaki nga nagtipon para himuon si David nga hari sang bilog nga Israel. Ara sila sa batuhon nga mga bakulod malapit sa Hebron sa sulod sang tatlo ka adlaw. Masadya sila nga nagaistoryahanay, nagakinadlaw sila, kag nagakanta sila para dayawon si Jehova. (1 Cron. 12:39) Sa amo sini kadamo nga tawo, posible nga indi naton matalupangdan ang isa ka pamatan-on nga si Zadok. Pero, ginsigurado ni Jehova nga mabal-an naton nga ara didto si Zadok. (Basaha ang 1 Cronica 12:​22, 26-28.) Sin-o si Zadok?

² Isa ka saserdote si Zadok nga kaupod pirme sang mataas nga saserdote nga si Abiatar. Makakita man sing palanan-awon si Zadok. Ginhatagan sia sang Dios sing kaalam kag sing ikasarang nga mahangpan ang Iya kabubut-on. (2 Sam. 15:27) Si Zadok ang ginakadtuan sang mga tawo kon kinahanglan nila ang laygay. Maisog man si Zadok. Sa sini nga artikulo, tun-an naton ang parte sa iya kaisog.

3. (a) Ngaa dapat mangin maisog ang mga alagad ni Jehova? (b) Ano ang binagbinagon naton sa sini nga artikulo?

³ Sa sining katapusan nga mga adlaw, ginapabaskog pa gid ni Satanas ang iya pagsalakay sa katawhan sang Dios. (1 Ped. 5:8) Gani dapat kita mangin maisog samtang ginahulat naton ang tion nga laglagon na ni Jehova si Satanas kag ang iya malain nga sistema. (Sal. 31:24) Binagbinagon naton ang tatlo ka paagi nga mailog naton ang kaisog ni Zadok.

SUPORTAHI ANG GINHARIAN SANG DIOS

4. Ngaa kinahanglan sang katawhan ni Jehova ang kaisog para masuportahan nila ang Ginharian sang Dios? (Tan-awa man ang piktyur.)

⁴ Bilang katawhan ni Jehova, ginasuportahan naton ang Ginharian sang Dios sing bug-os tagipusuon. Sa masami, kinahanglan naton ang kaisog para mahimo naton ini. (Mat. 6:33) Halimbawa, sa  sining malain nga kalibutan, kinahanglan naton ang kaisog para matuman naton ang mga kasuguan ni Jehova kag para mabantala naton ang maayong balita sang Ginharian. (1 Tes. 2:2) Kag nagalala na gid ang pagbahinbahin sang mga tawo sa kalibutan bangod sa mga isyu sa pulitika, gani kinahanglan naton ang kaisog para makapabilin kita nga neutral. (Juan 18:36) Bangod wala nagaentra sa pulitika ang katawhan ni Jehova kag nagapangindi sila nga magsoldado, madamo sa ila ang ginkastigo, ginpriso, kag nakaeksperiensia sang problema sa kuarta.

5. Ngaa kinahanglan ni Zadok ang kaisog para masuportahan niya si David?

⁵ Wala lang nagkadto si Zadok sa Hebron para himuon si David nga hari. May dala sia nga armas sang nagkadto sia didto, gani handa sia sa pagpakig-away. (1 Cron. 12:38) Handa sia nga magsunod kay David sa inaway kag pangapinan ang Israel sa ila mga kaaway. Posible indi eksperiensiado si Zadok kon parte sa pagpakig-away, pero isa sia ka maisog gid nga tawo.

6. Kon parte sa kaisog, paano nangin isa ka maayo nga halimbawa si David kay Zadok? (Salmo 138:3)

⁶ Paano nakatuon nga mangin maisog gid ang isa ka saserdote pareho kay Zadok? Madamo sia sing kilala nga mabakod kag maisog nga mga tawo. Gani sigurado nga nakatuon sia sa ila kaisog. Halimbawa, bangod maisog nga ‘ginpangunahan ni David ang Israel sa ila mga pagpakig-away,’ gusto sang bilog nga Israel nga himuon sia nga hari. (1 Cron. 11:​1, 2) Pirme nagadangop si David kay Jehova para buligan sia sa iya mga kaaway. (Sal. 28:7; basaha ang Salmo 138:3.) Nakatuon man si Zadok sa iban pa nga maisog nga mga lalaki, pareho kay Jehoiada kag sa anak ni Jehoiada nga si Benaias nga isa ka soldado. Nakatuon man sia sa 22 ka iban pa nga mga pangulo sang mga tribo nga nagsuporta kay David. (1 Cron. 11:​22-25; 12:​26-28) Determinado gid sila tanan nga himuon si David nga ila hari.

7. (a) Kon parte sa kaisog, sin-o ang maayo nga mga halimbawa sa aton tion subong? (b) Base sa video, ano ang natun-an mo sa halimbawa ni Brother Nsilu?

⁷ Kon binagbinagon naton kon paano nagpakita  sang kaisog ang mga nagsuporta kay Jehova kag sa iya Ginharian, mapalig-on kita sini nga mangin maisog man. Malig-on nga nangindi ang aton Hari, nga si Cristo Jesus, nga mangin bahin sang pulitikal nga sistema sang kalibutan ni Satanas. (Mat. 4:​8-11; Juan 6:​14, 15) Pirme sia nagadangop kay Jehova para pabakuron sia. Sa aton tion subong, madamo man kita sang halimbawa sang maisog nga mga pamatan-on. Malig-on sila nga nangindi nga magsoldado kag wala sila nag-entra sa mga isyu sa pulitika. Basaha ang ila mga eksperiensia sa jw.org. a

BULIGI ANG MGA KAUTURAN

8. Sa ano nga sitwasyon posible kinahanglan sang mga gulang ang kaisog para mabuligan nila ang ila mga kauturan?

⁸ Nagabuligay gid ang katawhan ni Jehova, kag nalipay sila nga himuon ini. (2 Cor. 8:4) Pero kon kaisa, kinahanglan ang kaisog para mahimo nila ini. Halimbawa, kon may giyera, kabalo ang mga gulang nga kinahanglan sang ila mga kauturan ang pagpalig-on kag bulig. Posible kinahanglan nila ang bulig para maamanan sila sang ila espirituwal kag pisikal nga mga kinahanglanon. Palangga sang mga gulang ang ila mga kauturan, gani ginaamanan nila sila sang ila mga kinahanglanon. Ginahimo nila ini bisan pa nga mabutang sa peligro ang ila kabuhi. (Juan 15:​12, 13) Gani, ginailog nila ang kaisog nga ginpakita ni Zadok.

9. Suno sa 2 Samuel 15:​27-29, ano ang ginsugo ni David nga himuon ni Zadok? (Tan-awa man ang piktyur.)

⁹ Ara sadto sa peligro ang kabuhi ni David. Gusto gid patyon si David sang iya anak nga si Absalom para sia ang mangin hari. (2 Sam. 15:​12, 13) Gani dapat maghalin dayon si David sa Jerusalem. Ginsilingan niya ang iya mga alagad: “Magdalidali kamo. Malagyo kita, kay basi maabtan kita ni Absalom.” (2 Sam. 15:14) Samtang nagapalagyo sila, narealisar ni David nga kinahanglan may ara magpabilin sa Jerusalem para magsugid sa iya sang mga plano ni Absalom. Gani ginpabalik niya sa siudad si Zadok kag ang iban pa  nga mga saserdote para mag-espiya. (Basaha ang 2 Samuel 15:​27-29.) Kinahanglan gid nila maghalong bangod delikado katama ang ginapahimo sa ila ni David. Bugalon, bayolente, kag traidor nga klase sang tawo si Absalom. Ano sa banta mo ang ginhimo niya kay Zadok kag sa iban pa nga mga saserdote kon nabal-an niya nga nagapang-espiya sila para proteksionan si David?

10. Paano ginproteksionan ni Zadok kag sang mga kaupod niya si David?

¹⁰ Ginpangabay ni David ang iya mainunungon nga mga abyan nga si Zadok kag si Husai nga buligan sia sa iya plano. (2 Sam. 15:​32-37) Ginsunod nila ang plano ni David. Nagpakunokuno si Husai nga ginasuportahan niya si Absalom kag naghatag sia sang panugda kon paano salakayon si David. Kon sundon ni Absalom ini nga panugda, mahatagan si David sang tion nga makapangaman. Dayon, ginsugid ni Husai kay Zadok kag kay Abiatar nga ginsunod ni Absalom ang iya panugda. (2 Sam. 17:​8-16) Ginsigurado ni Zadok kag ni Abiatar nga makalab-ot kay David ang plano ni Absalom. (2 Sam. 17:17) Sa bulig ni Jehova, naproteksionan ni Zadok kag sang iban pa nga mga saserdote si David.​—2 Sam. 17:​21, 22.

11. Paano naton mailog ang kaisog ni Zadok kon nagabulig kita sa aton mga kauturan?

¹¹ Kon ara sa peligro ang kabuhi sang aton mga kauturan kag ginpangabay kita nga buligan sila, paano naton mailog ang kaisog ni Zadok? (1) Sunda ang mga instruksion. Sa delikado nga mga sitwasyon, importante gid nga mangin matinumanon kita para padayon kita nga nahiusa. Sunda ang mga instruksion halin sa branch office. (Heb. 13:17) Para mahandaan ang mga kalamidad, dapat regular nga repasuhon sang mga gulang ang ila mga nadesisyunan nga himuon lakip na ang mga instruksion halin sa organisasyon. (1 Cor. 14:​33, 40) (2) Mangin maisog pero maghalong. (Hulu. 22:3) Pamensari anay sing maayo ang mga dapat mo himuon. Indi pag-ibutang sa peligro ang imo kabuhi kon indi man kinahanglanon. (3) Magsalig kay Jehova. Tandai nga gusto gid ni Jehova nga safe ka kag ang imo mga kauturan. Gani mabuligan ka niya para mangin safe ka sa pagbulig mo sa ila.

12-13. Ano ang natun-an mo sa mga eksperiensia ni Viktor kag ni Vitalii? (Tan-awa man ang piktyur.)

 ¹² Binagbinaga ang eksperiensia sang duha ka brother nga si Viktor kag si Vitalii. Nagadul-ong sila sang pagkaon kag tubig sa ila mga kauturan sa Ukraine. “Nagapangita kami sang pagkaon bisan diin,” siling ni Viktor. “Sa masami, may mga nagatiniruhay malapit sa amon. May isa ka brother nga naghatag sang pagkaon halin sa ginatago niya nga mga pagkaon. Nakabulig gid ini sa madamo nga kauturan. Samtang ginakarga namon ang mga pagkaon sa amon salakyan, may bomba nga nagtupa malapit sa amon pero wala ini naglupok. Mga 20 ka metro lang ang kalayuon sang gintup-an sini halin sa amon. Bilog nga adlaw ako nga nagpangabay kay Jehova nga hatagan niya ako sang kaisog para padayon ko nga mabuligan ang mga kauturan.”

¹³ “Kinahanglan gid namon ang kaisog,” siling ni Vitalii. “Sa akon una nga biyahe, 12 ka oras ako nga nagbiyahe asta nga nakalab-ot ako sa akon kaladtuan. Wala untat ako nga nagapangamuyo kay Jehova sa bilog nga biyahe.” Maisog si Vitalii, pero naghalong man sia. Nagsiling pa sia: “Pirme ako nagapangabay kay Jehova nga hatagan niya ako sing kaalam kag buligan niya ako nga indi magsalig sa akon kaugalingon. Nagaagi lang ako sa mga dalan nga puede agyan suno sa mga awtoridad. Nagbakod gid ang akon pagtuo bangod nakita ko kon paano nagabuligay ang mga kauturan. Ginhawanan nila ang mga dalan. Nagtipon man sila sang mga pagkaon, mga bayo, kag iban pa nga mga butang kag ginkarga nila ini sa amon salakyan. Kag ginsigurado nila nga may pagkaon kami kag lugar nga mapahuwayan.”

MAGPABILIN NGA MAINUNUNGON KAY JEHOVA

14. Kon biyaan sang isa naton ka pinalangga si Jehova, ano ang posible nga epekto sini sa aton?

¹⁴ Kon biyaan sang isa ka miembro sang aton pamilya ukon sang aton suod nga abyan si Jehova, magaluya gid ang aton buot. Kay man, isa ini sa pinakamabudlay nga pagtilaw nga posible maeksperiensiahan naton. (Sal. 78:40; Hulu. 24:10) Kag kon suod kita katama sa tawo nga nagbiya kay Jehova, mas mabudlay ini batunon. Kon naeksperiensiahan mo na ini, makabulig sa imo ang ginpakita ni Zadok nga pagkamainunungon.

15. Ngaa kinahanglan ni Zadok ang kaisog para makapabilin sia nga mainunungon kay Jehova? (1 Hari 1:​5-8)

¹⁵ Bisan pa nangin indi mainunungon ang suod nga abyan ni Zadok nga si Abiatar, padayon nga nangin mainunungon si Zadok kay Jehova. Natabo ini sang malapit na matapos ang paggahom ni David. Sang tigulang na si David kag lapit na lang sia mapatay, gusto sang iya anak nga si Adonias nga sia ang mangin hari bisan pa nga si Solomon ang ginpili ni Jehova nga mangin hari. (1 Cron. 22:​9, 10) Sa sini nga sitwasyon, si Adonias ang ginsuportahan ni Abiatar. (Basaha ang 1 Hari 1:​5-8.) Bangod sa ginhimo ni Abiatar, nangin indi sia mainunungon kay David kag kay Jehova. Sigurado nga nasubuan gid si Zadok kag nagluya gid ang iya buot. Hunahunaa bala: Sobra 40 ka tuig nga nag-updanay sila ni Abiatar bilang mga saserdote. (2 Sam. 8:17) Nagbuligay sila nga duha para maasikaso sing husto “ang Kaban sang matuod nga Dios.” (2 Sam. 15:29) Ginsuportahan nila si David bilang ila hari kag madamo sila sing ginhimo sa ila pag-alagad kay Jehova.​—2 Sam. 19:​11-14.

16. Ano ang posible nagpalig-on kay Zadok nga magpabilin nga mainunungon?

¹⁶ Bisan pa sa ginhimo ni Abiatar, padayon nga nangin mainunungon si Zadok kay Jehova. Wala gid ginduhaduhaan ni David ang pagkamainunungon ni Zadok. Sang nabal-an ni David ang ginhimo ni Adonias, ginsugo ni David si Zadok, si Natan, kag si Benaias nga haplasan si Solomon bilang hari. (1 Hari 1:​32-34) Sigurado gid nga napalig-on si Zadok sa mga kaupod niya nga mainunungon nga nag-alagad kay Jehova, pareho kay Natan kag sa iban pa nga nagsuporta kay Hari David. (1 Hari 1:​38, 39) Sang nangin hari si Solomon, “si Zadok nga saserdote amo ang ginbulos [niya] kay Abiatar.”​—1 Hari 2:35.

17. Kon nangin indi mainunungon kay Jehova ang isa nga suod sa imo, paano mo mailog si Zadok?

 ¹⁷ Paano mo mailog si Zadok? Kon ginbiyaan sang isa nga suod sa imo si Jehova, padayon nga mangin mainunungon kay Jehova. (Jos. 24:15) Hatagan ka ni Jehova sang kusog kag kaisog nga kinahanglan mo. Mangamuyo kay Jehova kag magpabilin nga suod sa imo mga abyan nga mainunungon sa iya. Ginapabaloran ni Jehova ang imo pagkamainunungon, kag padyaan ka gid niya.​—2 Sam. 22:26.

18. Ano ang natun-an mo sa eksperiensia ni Marco kag ni Sidse?

¹⁸ Binagbinaga ang eksperiensia ni Marco kag sang iya asawa nga si Sidse. Nag-untat sa pag-alagad kay Jehova ang duha nila ka anak nga babayi. Nagsiling si Marco: “Palangga mo gid ang imo mga bata sugod sang ginbata sila. Himuon mo gid ang tanan para proteksionan sila. Gani kon biyaan nila si Jehova, grabe gid ini kasakit.” Nagsiling pa sia: “Pero ara gid pirme si Jehova nga nagabulig sa amon. Ginsigurado niya nga kon nasubuan ako, mapaumpawan ako sang akon asawa, kag kon sia naman ang nasubuan, mapaumpawan ko man sia.” Nagsiling si Sidse: “Kon wala kami ginpabakod ni Jehova, wala gid kuntani namon ini nabatas. Ginbasol ko ang akon kaugalingon, gani ginsugid ko kay Jehova ang akon ginabatyag. Pagligad sang pila ka adlaw, ginkadtuan ako sang isa ka sister nga madamo nga tuig ko na nga wala nakita. Gintungtong niya ang iya mga kamot sa akon mga abaga, gintulok niya ako sa mata, kag nagsiling sia: ‘Sidse, tandai nga indi ikaw ang balasulon sa natabo.’ Sa bulig ni Jehova, wala nadula ang akon kalipay sa pag-alagad sa iya.”

19. Ano ang gusto mo nga himuon?

¹⁹ Gusto ni Jehova nga mangin maisog ang tanan niya nga alagad pareho kay Zadok. (2 Tim. 1:7) Pero, indi gusto ni Jehova nga magsalig kita sa aton kaugalingon nga kusog. Gusto niya nga magsalig kita sa iya. Gani kon kinahanglan mo ang kaisog sa isa ka sitwasyon, magdangop kay Jehova. Makasalig ka nga buligan ka niya nga mangin maisog pareho kay Zadok.​—1 Ped. 5:10.