Ginpakamaayo ang Pagpanikasog ni Hulda
MAY tatlo kita ka sister nga nagaistar sa gamay nga isla sang Sangir Besar sa Indonesia. Kilala sila sa isla sa ila pagbantala kag sa ila pagtudlo sa mga tawo nga mahangpan ang Biblia. Pero mga pila ka tuig na ang nagligad, makita sila pirme sa higad sang baybay nga may ginahimo nga lain naman nga hilikuton.
Ang isla sang Sangir Besar sa aminhan sang Indonesia
Nagapanguha sila sang dalagku nga mga bato sa baybay kag ginadala nila ini sa higad. Ang pila sa sini nga mga bato daw pareho kadaku sa bola sang soccer. Dayon nagapungko sila sa gamay nga pulungkuan nga kahoy para dugmukon ang mga bato. Nagagamit sila sang martilyo para madugmok ini asta nga mangin gamay pa ini sa itlog sang manok. Pagkatapos sini, ginasulod nila ini sa mga balde kag ginahakwat nila ini pakadto sa ila mga balay. Taklaron ang ila alagyan kag nagaagi sila sa isa ka hagdan. Dayon ginasulod nila ang mga bato sa mga sako, kag ginakarga ini sa mga trak para gamiton sa konstruksion sang mga dalan.
Nagapanguha si Hulda sang mga bato sa higad sang baybay
Ang isa ka sister amo si Hulda. Kon ikumparar sa iban, mas madamo sia sing tion nga makaobra bangod sa iya kahimtangan. Ginagamit niya ang iya kuarta para sa kinahanglanon sang iya pamilya. Pero gindugangan niya ang iya tion sa pag-obra kay gusto niya magbakal sang tablet para magamit niya ang JW Library® nga app. Kabalo si Hulda nga makabulig ini nga app sa iya pagbantala kag pagtuon sang Biblia.
Kada aga, sa sulod sang isa ka bulan kag tunga, gindugangan ni Hulda sing duha ka oras ang iya pagpanguha sang mga bato kag pagdugmok sini. Sang ulihi, napuno niya sang mga bato ang isa ka gamay nga trak kag nakabakal sia sang tablet.
Ginauyatan ni Hulda ang iya tablet
Nagsiling si Hulda: “Grabe kakapoy ang pagpanguha kag pagdugmok sang mga bato, pero daw nadula dayon ang pagpalanakit sang akon lawas sang nagamit ko na ang akon bag-o nga tablet. Nakabulig ini sa akon nga mangin mas epektibo sa pagbantala, kag nangin mas mahapos sa akon ang paghanda para sa mga miting.” Nagsiling man sia nga nakabulig ang iya tablet sa tion sang pandemic bangod virtual, ukon ginahiwat paagi sa Internet, ang tanan nga hilikuton sa kongregasyon. Nalipay gid kita para kay Hulda bangod ginpakamaayo ang iya pagpanikasog.
