ANG PAGTAMOD SANG BIBLIA
Mga Anghel
Mabasa naton sa mga literatura, kag makita sa mga art kag mga pelikula ang parte sa mga anghel. Pero sin-o ang mga anghel? Kag ano ang ila responsibilidad?
Sin-o ang mga anghel?
ANG GINASILING SANG BIBLIA
Antes pa gintuga sang Dios ang uniberso kag ang una nga mga tawo, gintuga na niya ang mas mataas kag maalam nga mga tinuga. Mas gamhanan sila sangsa mga tawo, kag nagaistar sila upod sa Dios—sa lugar nga indi makadtuan kag makita sang mga tawo. (Job 38:4, 7) Ginatawag sila sang Biblia nga “gamhanan nga mga puersa,” ukon mga espiritu, kag “mga anghel.”—Salmo 104:4. *
Ano kadamo ang mga anghel? Tuman gid kadamo. “Linaksa ka linaksa” ukon “tignapulo ka libo ka tignapulo ka libo” ka anghel ang ara sa palibot sang trono sang Dios. (Bugna 5:11; footnote) Kon hangpon ini sing literal, makasiling kita nga may ginatos ka milyon ka anghel!
“Nakita ko, kag nabatian ang tingog sang madamo nga anghel sa palibot sang trono . . . , kag ang kadamuon nila linaksa ka linaksa kag linibo ka linibo.”—Bugna 5:11.
Ano ang ginahimo sang mga anghel sang una?
ANG GINASILING SANG BIBLIA
Sa masami ang mga anghel mga humalambal ukon mensahero sang Dios. * Ginsambit man sa Biblia nga nagahimo sila sang mga milagro halin sa Dios. Nagpadala ang Dios sang anghel agod pakamaayuhon si Abraham kag punggan sia sa paghalad sang iya anak nga si Isaac. (Genesis 22:11-18) Nagpakita man ang isa ka anghel kay Moises sa nagadabdab nga tunukon nga kahoykahoy agod ipaalinton ang mensahe nga nagpabag-o sang iya kabuhi. (Exodo 3:1, 2) Sang gintagbong si manalagna Daniel sa lungib sang mga leon, “ang . . . Dios nagpadala sing anghel kag ginkipot niya ang baba sang mga leon.”—Daniel 6:22.
“Dayon nagpakita [kay Moises] ang anghel ni Jehova sa nagadabdab nga tunukon nga kahoykahoy.” —Exodo 3:2.
Ano ang ginahimo sang mga anghel subong?
ANG GINASILING SANG BIBLIA
Wala naton mahibaluan ang tanan nga ginahimo sang mga anghel subong. Pero nagasiling ang Biblia nga ginabuligan nila ang sinsero nga mga tawo nga makilala pa gid ang Dios.—Binuhatan 8:26-35; 10:1-22; Bugna 14:6, 7.
Ginpadamgo ni Jehova ang patriarka nga si Jacob kag nakita niya sa damgo ang mga anghel nga nagasaka-panaug sa “isa ka hagdanan sa duta nga nagalambot sa langit.” (Genesis 28:10-12) Paagi sa sina nga damgo, mahimo nga nakahinakop si Jacob sang posible nga mahinakop man naton—nga ginapadala ni Jehova nga Dios ang mga anghel sa duta para buligan ang matutom nga mga tawo nga nagakinahanglan sang iya bulig.—Genesis 24:40; Exodo 14:19; Salmo 34:7.
“May isa ka hagdanan sa duta nga nagalambot sa langit; kag nagasaka-panaug sa sini ang mga anghel sang Dios.”—Genesis 28:12.
^ par. 6 Ginasugid sang Biblia nga ang pila ka espiritu nagrebelde sa Dios, kag gintawag ining malain nga mga anghel nga “mga demonyo.”—Lucas 10:17-20.
^ par. 11 Sa Biblia, ang orihinal nga Hebreo kag Griego nga mga tinaga para sa “anghel” pareho nga nagakahulugan sing “mensahero.”
Basi Manamian Ka Man
SABAT SA MGA PAMANGKOT SA BIBLIA
Matuod Bala ang mga Demonyo?
Ano ang mga demonyo? Diin sila naghalin?
SABAT SA MGA PAMANGKOT SA BIBLIA
Sin-o Ukon Ano ang mga Anghel?
Daw ano sila kadamo? May ngalan bala kag personalidad ang kada anghel?
